រុស្ស៊ីចាប់ឃុំខ្លួនអ្នកកាសែតអាមេរិកក្នុងបទចោទប្រកាន់លួចស៊ើបការណ៍សម្ងាត់
ទីភ្នាក់ងារសន្តិសុខរុស្ស៊ីបានប្រកាសនៅថ្ងៃព្រហស្បតិ៍ទី ៣០មីនា ថា គេបានចាប់ខ្លួនអ្នកកាសែតអាមេរិកាំងម្នាក់ គឺ លោក Evan Gershkovich ដែលយកព័ត៌មានក្នុងទឹកដីរុស្ស៊ី សម្រាប់កាសែត Wall Street Journal។ នៅប៉ុន្មានម៉ោងក្រោយការប្រកាសរបស់ទីភ្នាក់ងារសន្តិសុខរុស្ស៊ី តុលាការក្នុងក្រុងម៉ូស្គូបានប្រកាសដាក់ឃុំបណ្តោះអាសន្ន អ្នកកាសែតអាមេរិកាំង។ គិតចាប់តាំងពីសម័យសង្រ្គាមត្រជាក់ នេះជាលើកទី១ ដែលរុស្ស៊ីចាប់អ្នកកាសែតអាមេរិកាំង ក្នុងបទចោទប្រកាន់ធ្វើចារកម្ម។
ចុះផ្សាយនៅថ្ងៃ៖
ស្តាប់ - ០៣:១៨
លោកEvan Gershkovich ជាអ្នកកាសែតអាមេរិកាំងដំបូងគេ នៅក្នុងប្រវត្តិសម័យទំនើប ដែលត្រូវអាជ្ញាធររុស្ស៊ី ចាប់ខ្លួនក្នុងបទចោទប្រកាន់លួចធ្វើចារកម្ម។ នៅថ្ងៃព្រហស្បតិ៍ តុលាការរុស្ស៊ី Lefortovo ក្នុងទីក្រុងម៉ូស្គូ បានចេញសម្រេចឃុំអ្នកកាសែតអាមេរិក លោកEvan Gershkovich រយៈពេល ២ខែ ពីថ្ងៃចាប់ខ្លួន រហូតថ្ងៃទី ២៩មិថុនា។ តាមសេចក្តីប្រកាសរបស់តុលាការ រយៈពេលឃុំខ្លួនអ្នកកាសែតអាមេរិកាំងអាចត្រូវពន្យារពេល ក្នុងពេលរង់ចាំការបើកសវនាការជំនុំជម្រះ។ តាមទីភ្នាក់ងារព័ត៌មានរុស្ស៊ី Tass គឺទីភ្នាក់ងារសន្តិសុខ ឬទីភ្នាក់ងារស៊ើបការណ៍សម្ងាត់រុស្ស៊ីFSBដែលបានស្នើឲ្យតុលាការរុស្ស៊ីចេញដីការចាប់ដាក់ឃុំបណ្តោះអាសន្នអ្នកកាសែតអាមេរិក។
មានអាយុ ៣១ឆ្នាំ លោកEvan Gershkovichជាអ្នកយកព័ត៌មានរបស់កាសែតអាមេរិក Wall Street Journal ប្រចាំទីក្រុងម៉ូស្គូ។ នៅក្រោយការប្រកាសរបស់អាជ្ញាធររុស្ស៊ី កាសែតWall Street Journal ចេញសេចក្តីថ្លែងការណ៍សំដែងការព្រួយបារម្ភពីសុវត្ថិភាពរបស់អ្នកកាសែតខ្លួន និងបានទាត់ចោលការលើកឡើងរបស់ភ្នាក់ងារសន្តិសុខរុស្ស៊ី ដែលថា លោកEvan Gershkovichត្រូវចាប់ខ្លួន ក្នុងបទសង្ស័យ លួចយកការណ៍សម្ងាត់ឲ្យរដ្ឋាភិបាលអាមេរិក។
តាមទីភ្នាក់ងារព័ត៌មានរុស្ស៊ី Tass ដែលបានដកស្រង់ទីភ្នាក់ងារចារកម្មរុស្ស៊ី អ្នកកាសែតអាមេរិក លោកEvan Gershkovichត្រូវអាជ្ញាធររុស្ស៊ីចាប់ខ្លួន នៅក្នុងពេលកំពុងប្រព្រឹត្តបទល្មើសជាក់ស្តែង នៅទីក្រុងYekaterinburg ដែលមានចម្ងាយ១៨០០គីឡូម៉ែត្រពីម៉ូស្គូ។ តាមទីភ្នាក់ងារសន្តិសុខរុស្ស៊ី អ្នកកាសែតអាមេរិកាំងបានលួចប្រមូលយកព័ត៌មានសម្ងាត់ នៅរោងចក្រឧស្សាហកម្មយោធា នៅទីនោះ។ ក្នុងករណី តុលាការរកឃើញភស្តុតាងដូចការចោទប្រកាន់ អ្នកកាសែតអាមេរិកអាចប្រឈមនឹងការដាក់ទោសជាប់ពន្ធនាគារ ពី ១០ ទៅ ២០ឆ្នាំ។
អង្គការអ្នកកាសែតគ្មានព្រំដែន Reporter Sans Frontière បានអះអាងថា អង្គការបានទទួលដំណឹងថា នៅមុនចាប់ខ្លួន អ្នកកាសែតរបស់Wall Street Journal លោកEvan Gershkovichកំពុងធ្វើព័ត៌មានស៊ើបអង្កេតស្តីពីក្រុមហ៊ុនទាហានស៊ីឈ្នួលរុស្ស៊ី វ៉ាក់ណែរ ដែលដើរតួនាទីសំខាន់ នៅក្នុងសង្រ្គាមរុស្ស៊ី ឈ្លានពានអ៊ុយក្រែន។
តាមទីភ្នាក់ងារព័ត៌មានរុស្ស៊ី អ្នកកាសែតអាមេរិកនៅតែអះអាងថា ខ្លួនស្អាតស្អំ មិនបានធ្វើដូចការចោទប្រកាន់។ និយាយភាសារុស្ស៊ីយ៉ាងស្ទាត់ជំនាញ អ្នកកាសែតអាមេរិកាំងដើមកំណើតរុស្ស៊ី បានផ្លាស់ទៅរស់នៅអាមេរិកជាមួយឪពុកម្តាយ តាំងពីតូច។ នៅមុនចូលធ្វើការយកព័ត៌មានឲ្យ កាសែត Wall Street Journal នៅឆ្នាំ ២០២២ លោកEvan Gershkovich ធ្លាប់ជាអ្នកកាសែតឆ្លើយឆ្លងរបស់ទីភ្នាក់ងារព័ត៌មានបារាំងAFP និងធ្វើការឲ្យកាសែត Russia News នៅទីក្រុងម៉ូស្គូ។
អង្គការ Reporter Sans Frontièreដែលមានទីស្នាក់ការនៅទីក្រុងប៉ារីស កំពុងព្រួយបារម្ភខ្លាចថា អ្នកកាសែតត្រូវចាប់ខ្លួន យកធ្វើថ្នូរ នៅក្នុងការប្រឈមមុខដាក់គ្នារវាងរុស្ស៊ី និងប្រទេសលោកខាងលិច។ នៅក្រោយការចាប់ខ្លួនអ្នកកាសែតអាមេរិក អ្នកនាំពាក្យរបស់ក្រេមឡាំង លោកឌីមីទ្រី ប៉េស្កូវ បានព្រមានរួចជាស្រេច ភាគីអាមេរិកកុំឲ្យសងសឹកចាប់ខ្លួនអ្នកកាសែតរុស្ស៊ី ដែលកំពុងធ្វើការនៅទឹកដីអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ