អឺរ៉ុបបើកជំនួបកំពូលដើម្បីពង្រឹងឧស្សាហកម្មដែលជួបបញ្ហាដោយសារសង្គ្រាមអ៊ុយក្រែន
ជំនួបកំពូលអឺរ៉ុបដែលប្រជុំដោយមេដឹកនាំរដ្ឋជាសមាជិកសហភាពអឺរ៉ុបទាំង២៧ ត្រូវចាប់បើកនៅថ្ងៃព្រហស្បតិ៍ទី ១៥ធ្នូនេះ នៅទីក្រុងព្រុចសែល មានកម្មវត្ថុចម្បងគឺពង្រឹងវិស័យឧស្សាហកម្ម។ អឺរ៉ុបត្រូវសាកល្បងស្វែងដំណោះស្រាយរួមមួយ សម្រាប់ជួយវិស័យឧស្សាហកម្មដែលកំពុងប្រឈមនឹងវិបត្តិថាមពលបង្កឡើងដោយសង្គ្រាមនៅអ៊ុយក្រែនផង និងភាពប្រកួតប្រជែងខ្លាំងរបស់អាមេរិកផង។
ចុះផ្សាយនៅថ្ងៃ៖
ស្តាប់ - ០២:១៣
លែងមានហើយគំរូសេដ្ឋកិច្ចរំពឹងលើតម្លៃថាមពលថោកនាំមកពីរុស្ស៊ី ! នេះជាប្រសាសន៍ របស់លោកស្រីប្រធានគណៈកម្មការអឺរ៉ុប អួរស៊ូឡា វ៉ុនឌែរ ឡេយែន ដោយលើកឡើងថា តាំងពីបើកប្រតិបត្តិការចូលឈ្លានពានអ៊ុយក្រែននៅខែកុម្ភៈដើមឆ្នាំមក រុស្ស៊ីបានកាត់បន្ថយការនាំចេញឧស្ម័នមកអឺរ៉ុបអស់៨០%។ ថ្វីបើពេលនេះអឺរ៉ុបមិនខ្វះហ្កាសប្រើមែន ព្រោះមានការនាំចូលឧស្ម័នធម្មជាតិពង្រាវមកបង្គ្រប់ តែតម្លៃឧស្ម័នបានឡើងកប់ពពក ជាហេតុធ្វើឱ្យវិស័យឧស្សាហកម្មអឺរ៉ុបរងការគំរាមកំហែងយ៉ាងធ្ងន់ធ្ងរ។ នេះជាបញ្ហាមួយ។ បញ្ហាមួយទៀត បើតាមលោកស្រី វ៉ុនឌែរ ឡេយែន ដដែល ផែនការអាមេរិកប្រយុទ្ធប្រឆាំងនឹងការប្រែប្រួលអាកាសធាតុតម្លៃ៣៧០ពាន់លានដុល្លារអនុម័តកាលពីរដូវក្តៅមុន មានបង្កប់នូវជំនួយពិសេសដល់ឧស្សាហកម្មអាមេរិក។ ជាផែនការបែបការពារផលប្រយោជន៍និយម ដែលអាចមានប្រៀបខ្លាំង និងដែលធ្វើឱ្យមានការប្រកួតប្រជែងមិនត្រឹមត្រូវជាមួយនឹងឧស្សាហកម្មអឺរ៉ុប។
ដូច្នេះអឺរ៉ុប ដាច់ខាតត្រូវតែគិតឡើងវិញ រកវិធីពង្រឹងឧស្សាហកម្មរបស់ខ្លួន។ នេះហើយជាកម្មវត្ថុដែលប្រមុខរដ្ឋ-រដ្ឋាភិបាលសហភាពអឺរ៉ុបទាំង២៧ត្រូវជួបពិភាក្សាគ្នា។ អឺរ៉ុបត្រូវបញ្ចុះបញ្ចូលអាមេរិក ឱ្យគិតដល់សម្ព័ន្ធមិត្ត ដោយត្រូវធ្វើការជាមួយគ្នាកាន់តែស្អិតល្មួតជាងមុន។ តែអឺរ៉ុបខ្លួនឯងត្រូវរួមគ្នាជាធ្លុងមួយ កុំប្រេះឆាគ្នា។ ក្នុងពេលរង់ចាំសម្បទានអាមេរិក លោកស្រីវ៉ុនឌែរ ឡេយែន បានអំពាវនាវឱ្យអឺរ៉ុបរៀបចំផែនការខ្លួនឯង ដោយរដ្ឋព្រមផ្តល់ជំនួយដល់ក្រុមហ៊ុន សម្រាប់រយៈពេលខ្លី ដើម្បីពន្យុះក្រុមហ៊ុនឱ្យមកវិនិយោគនៅអឺរ៉ុប និងពង្រឹងផែនការអភិវឌ្ឍថាមពេលកើតឡើងវិញ ផ្តាច់ខ្លួនពីការរំពឹងលើប្រភពថាមពលរុស្ស៊ី។ លោកស្រីក៏ជំរុញបន្ថែម ការបង្កើតមូលនិធិអឺរ៉ុបសម្រាប់អភិវឌ្ឍនយោបាយឧស្សាហកម្មតែមួយរួមគ្នា និងវិនិយោគកាន់តែច្រើនលើគម្រោងស្រាវជ្រាវ និងធ្វើទំនើបកម្មកំរិតអឺរ៉ុប ក្នុងវិស័យ អ៊ីដ្រូហ្សែន ព័ត៌មានវិទ្យាកង់ទិក ឬបញ្ញាសប្បនិម្មិត ។ល។
ក្រៅអំពីសំណុំរឿងសេដ្ឋកិច្ច មេដឹកនាំអឺរ៉ុប ក៏នឹងជជែករកមធ្យោបាយដាក់សម្ពាធបន្ថែមលើរុស្ស៊ី និងគាំទ្រអ៊ុយក្រែន ផ្នែកនយោបាយ ហិរញ្ញវត្ថុ និងមនុស្សធម៌៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ