រដ្ឋាភិបាលបារាំងកោះហៅក្រុមហ៊ុនឧស្សាហកម្មដែលបញ្ចេញផ្សែងពុលខ្លាំង
គ្រាន់តែត្រលប់មកពីចូលរួមក្នុងសន្និសីទអន្តរជាតិស្តីពីអាកាសធាតុ នៅប្រទេសអេហ្ស៊ីប Cop27 ភ្លាម ប្រធានាធិបតីបារាំងចង់បង្ហាញចំណាត់ការជាក់ស្តែង នៅក្នុងរឿងការពារបរិស្ថាន។ នៅថ្ងៃអង្គារទី៨វិច្ឆិកា វិមានប្រធានាធិបតីបារាំងបានកោះប្រជុំជាមួយ ប្រធានក្រុមហ៊ុន រោងចក្រឧស្សាហកម្ម ដើម្បីដាក់សម្ពាធឲ្យក្រុមហ៊ុន រោងចក្រទាំងនោះ កាត់បន្ថយការបញ្ចេញឧស្ម័នកាបូនិក ឧស្ម័នផ្ទះកញ្ចក់ ដែលជាប្រភពធ្វើឲ្យផែនដីឡើងកំដៅ និងការប្រែប្រួលអាកាសធាតុ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៥
ខណៈដែលការបំពុលរបស់ឧស្សាហកម្មផលិតអាលុយមីញ៉ូម ដែក ជីគីមី ប្រេងឥន្ធនៈ កំពុងត្រូវគេលើកយកទៅពិភាក្សាយ៉ាងផុសផុល នៅក្នុងសន្និសីទអាកាសធាតុ Cop27 នៅអេហ្ស៊ីប ប្រធានាធិបតីបារាំង ដែលទើបធ្វើដំណើរត្រលប់មកសន្និសីទអាកាសធាតុបានកោះហៅប្រធានក្រុមហ៊ុនឧស្សាហកម្មធំៗ ដែលទទួលខុសត្រូវខាងបញ្ចេញឧស្ម័នកាបូនិក ឧស្ម័នផ្ទះកញ្ចក់។
តាមវិមានប្រធានាធិបតី បារាំង ថ្នាក់ដឹកនាំរបស់ក្រុមហ៊ុន រោងចក្រ ឧស្សាហកម្ម ជាតិ និងអន្តរជាតិ ចំនួន ៣០ ដែលមានដូចជា ក្រុមហ៊ុនស្លដែក នៅDunderque ក្រុមហ៊ុនប្រេងតូតាល់ ក្រុមហ៊ុនផលិតស៊ីម៉ង់ Holcim រោងចក្រផលិតកែវ រោងចក្រផលិតស្កស និងរោងចក្រផលិតសារធាតុគីមី ដែលមានទីតាំង ជាង៥០កន្លែង ក្នុងប្រទេសបារាំង ត្រូវបានកោះហៅឲ្យចូលរួមប្រជុំពិសេសជាមួយលោកប្រធានាធិបតីម៉ាក្រុង នៅថ្ងៃអង្គារ។
ក្រុមហ៊ុនរោងចក្រ ដែលរដ្ឋាភិបាលបារាំង កោះហៅប្រជុំ ជាក្រុមហ៊ុន រោងចក្រដែលបញ្ចេញឧស្ម័នកាបូនិកក្រាសក្រែល ពោលគឺពាក់កណ្តាលនៃឧស្ម័នកាបូនិកសរុប ដែលវិស័យឧស្សាហកម្ម នៅបារាំង បានបញ្ចេញទៅក្នុងបរិយាកាស។ វិស័យឧស្សាហកម្មបញ្ចេញឧស្ម័នកាបូនិក ដែលតំណាងឲ្យ២០%នៃឧស្ម័នកាបូនិកសរុប របស់បារាំង។
តាមការបញ្ជាក់របស់វិមានប្រធានាធិបតីបារាំង ការកោះហៅប្រជុំនៅថ្ងៃអង្គារ មានគោលដៅ បញ្ចុះបញ្ចូលឲ្យក្រុមហ៊ុនរោងចក្រ ឧស្សាហកម្ម កាត់បន្ថយ ការបញ្ចេញឧស្ម័នកាបូនិក ដោយមិនចាំបាច់ត្រូវកាត់បន្ថយសកម្មភាពផលិត។ តាមន័យនេះ រដ្ឋាភិបាលបារាំងចង់ឲ្យក្រុមហ៊ុនរោងចក្រឧស្សាកម្ម កាត់បន្ថយថាមពលដែលបានមកពីការប្រើឧស្ម័ន ប្រេងឥន្ធនៈ ដោយត្រលប់មកប្រើថាមពលស្អាតស្អំ ដូចជាថាមពលសូឡា វាយោថាមពល និងថាមពលនុយក្លេអ៊ែរជាដើម។
ការផ្លាស់ប្តូរប្រភពថាមពល ដែលមិនបញ្ចេញឧស្ម័នកាបូនិកនឹងធ្វើខ្ទង់ចំណាយវិនិយោគ របស់ក្រុមហ៊ុនរោងចក្រ នៅបារាំង កើនឡើងខ្ពស់។ ផលវិបាក គឺផលិតផលឧស្សាហកម្មរបស់បារាំង នឹងឡើងថ្លៃ ដែលជាហេតុធ្វើឲ្យក្រុមហ៊ុននៅបារាំង ពិបាកនឹងប្រកួតប្រជែង ជាមួយក្រុមហ៊ុនដទៃទៀត ដែលបោះទីតាំងនៅប្រទេសផ្សេងទៀត ជាទី ដែលគ្មានការចាប់តម្រូវឲ្យកាត់បន្ថយការបញ្ចេញឧស្ម័នផ្ទះកញ្ចក់។
រដ្ឋាភិបាលរបស់លោកម៉ាក្រុង ទើបទាក់ទាញឲ្យក្រុមហ៊ុនបារាំង និងបរទេសឲ្យត្រលប់មកវិនិយោគបានច្រើននៅបារាំង នៅឆ្នាំ ២០២០។ ដូច្នេះ ដើម្បីជៀសវាងការដាក់សម្ពាធ ធ្វើឲ្យក្រុមហ៊ុនបាក់ទឹកចិត្ត រត់ផ្លាស់ទីទៅបោះទីតាំង វិនិយោគនៅបរទេស គេរំពឹងថា រដ្ឋាភិបាលនឹងអាចប្រកាសកញ្ចប់ថវិការដ្ឋ សម្រាប់ជួយលើកទឹកចិត្តក្រុមហ៊ុនឧស្សាហកម្មឲ្យកាត់បន្ថយការបញ្ចេញឧស្ម័ន ទាំងបន្តបោះទីតាំងវិនិយោគនៅបារាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ