ដើម្បីទប់ការឡើងកំដៅផែនដីឲ្យនៅត្រឹម២អង្សា គេត្រូវការវិនិយោគទឹកប្រាក់ ២៧០ទ្រីលានដុល្លារ
កិច្ចព្រមព្រៀងក្រុងប៉ារីស ស្តីពីអាកាសធាតុ ឬCop១៥ មានគោលដៅ ទប់ស្កាត់កុំឲ្យសីតុណ្ហភាព មធ្យមលើផែនដី កើនឡើង លើស២អង្សា ពីពេលនេះរហូតដល់ឆ្នាំ ២០៥០។ ប៉ុន្តែ ជាមួយសកម្មភាពនយោបាយសព្វថ្ងៃ គេអាចសម្រេចគោលដៅ នៅឆ្នាំ ២០៦៩ ពោលគឺ ២០ឆ្នាំក្រោយ តាមកាលកំណត់។ នេះបើតាមការវាយតម្លៃរបស់ក្រុមហ៊ុនធានារ៉ាប់រ៉ងស្វ៊ីស Swiss Re នៅក្នុងរបាយការណ៍ចេញផ្សាយ កាលពីថ្ងៃសុក្រទី ៧តុលា។ បើតាមក្រុមហ៊ុនធានារ៉ាប់រងស្វ៊ីសខាងលើ គេត្រូវការវិនិយោគបន្ថែម ប្រមាណ ២៧០ទ្រីលានដុល្លារ ដើម្បី អាចសម្រេចតាមគោលដៅនៃកិច្ចព្រមព្រៀងប៉ារីសស្តីពីអាកាសធាតុ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
ចាប់តាំងពីឆ្នាំ ២០១៦ ការវិនិយោគដើម្បីកាត់បន្ថយការបញ្ចេញឧស្ម័នកាបូនិក បានកើនឡើងជាមធ្យម ៥% ក្នុងមួយឆ្នាំៗ ប៉ុន្តែ ទោះជាយ៉ាងណា វានៅតែតិចតួចណាស់ បើសិនគេចង់សម្រេចគោលដៅនៃកិច្ចព្រមព្រៀងក្រុងប៉ារីស។ នេះជាការវាយតម្លៃរបស់ក្រុមហ៊ុនធានារ៉ាប់រងស្វ៊ីស Swiss Re មុននឹងបន្ថែមថា ជាមួយសកម្មភាព និងការវិនិយោគសព្វថ្ងៃ ពិភពលោកនឹងអាចសម្រេចគោលដៅ នៅ២០ឆ្នាំ ក្រោយ នៃកាលកំណត់(ឆ្នាំ ២០៥០)។
កិច្ចព្រមព្រៀងក្រុងប៉ារីស ស្តីពីអាកាសធាតុឆ្នាំ ២០១៥ បានចែងពីគោលដៅ ទប់ស្កាត់កុំឲ្យសីតុណ្ហភាពមធ្យមលើផែនដី កើនឡើង២អង្សា ឬឲ្យនៅត្រឹម ១,៥អង្សា ពីពេលនេះ ដល់ឆ្នាំ ២០៥០។
តាមការគុណគណនារបស់ក្រុមហ៊ុនធានារ៉ាប់រងស្វ៊ីស ដើម្បីសម្រេចតាមគោលដៅនៃកិច្ចព្រមព្រៀងស្តីពីអាកាសធាតុ ដែលមានចែងពីហ្សេរ៉ូ កាបូន ឬកាបូនសូន្យ គេចាំបាច់ ត្រូវចាក់ទឹកប្រាក់ វិនិយោគ ២៧០ ទ្រីលានដុល្លារបន្ថែមទៀត ទៅលើវិស័យ ដឹកជញ្ជូន ថាមពល សំណង់ និងឧស្សាហកម្ម។ វិស័យដឹកជញ្ជូនត្រូវការទឹកប្រាក់វិនិយោគច្រើនជាងគេ ដល់ទៅ ១១៤ទ្រីលានដុល្លារ ក្នុងហេតុផលថា គេនឹងត្រូវការចំណាយច្រើនទៅលើការអភិវឌ្ឍហេដ្ឋារចនាសម្ព័ន្ធថ្មី សម្រាប់ការចរាចរណ៍រថយន្តអគ្គិសនី។ ចំណែក ទឹកប្រាក់ ៦៥ពាន់លានដុល្លារបន្ថែមទៀត នឹងត្រូវវិនិយោគលើវិស័យសំណង់ ខណៈដែលវិស័យឧស្សាហកម្ម នឹងត្រូវការទឹកប្រាក់វិនិយោគ បន្ថែម ១៤ពាន់លានដុល្លារ។ ការវិនិយោគទឹកប្រាក់ដ៏មហាសាលនឹងផ្តោតសំខាន់ទៅលើយន្តការ កាត់បន្ថយការបញ្ចេញឧស្ម័នកាបូនិកនៅក្នុងវិស័យសំណង់ និងឧស្សាហកម្ម តាមរយៈការប្រើប្រាស់ថាមពល ប្រកបដោយប្រសិទ្ធិភាព។
សម្រាប់ក្រុមហ៊ុនធានារ៉ាប់រងស្វ៊ីស ការវិនិយោគបន្ថែម ក្នុងទឹកប្រាក់ ២៧០ទ្រីលានដុល្លារ នឹងទៅជួយកាត់បន្ថយហានិភ័យ នៃវិបត្តិសេដ្ឋកិច្ចសកល។ ផ្ទុយទៅវិញ បើសិនគេមិនធ្វើអ្វីសោះ ឬនៅតែបន្ត វិនិយោគតិចតួចដូចសព្វថ្ងៃ នោះពិភពលោកនឹងអាចបាត់បង់ កំណើនសេដ្ឋកិច្ច ពី៧ ទៅ ១០% ពីពេលនេះ រហូតដល់ពាក់កណ្តាលសតវត្សរ៍ទី២១។
ក្រុមហ៊ុនធានារ៉ាប់រងស្វ៊ីស បានបញ្ចេញរបាយការណ៍ ទាក់ទាញ ចំណាប់អារម្មណ៍ឲ្យគេបង្កើនការវិនិយោគបន្ថែម ដើម្បីទប់ស្កាត់ការឡើងកំដៅផែនដី ដែលជាដើមហេតុ នាំឲ្យមានការប្រែប្រួលអាកាសធាតុ។ ដូចជាក្រុមហ៊ុនធានារ៉ាប់រងដទៃទៀត ក្រុមហ៊ុនស្វ៊ីស Swiss Reត្រូវធានារ៉ាប់រងបង់សងថ្លៃខូចខាត កាន់តែច្រើន ដែលបង្កឡើងដោយគ្រោះមហន្តរាយ ធម្មជាតិ ដូចជាទឹកជំនន់ ខ្យល់ព្យុះ ភ្លើងឆេះព្រៃ និងរលកកំដៅជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ