សង្គ្រាមអ៊ុយក្រែន ៖ ទីផ្សារភាគហ៊ុនអឺរ៉ុបជ្រួល រុស្ស៊ីចាប់រងឥទ្ធិពលនៃទណ្ឌកម្ម
តម្លៃប្រេងឡើងថ្លៃ កំណើនសេដ្ឋកិច្ចរងការគំរាមកំហែង អ្នកវិនិយោគផ្តើមព្រួយបារម្ភ... ការដាក់ទណ្ឌកម្មសេដ្ឋកិច្ចលើរុស្ស៊ី ពីសំណាក់ក្រុមបស្ចឹមលោក ការគំរាមប្រើអាវុធនុយក្លេអ៊ែររបស់លោកពូទីន បាននិងកំពុងអង្រួនទីផ្សារភាគហ៊ុនអឺរ៉ុបឱ្យស្ថិតក្នុងភាពមិនជាក់លាក់ និងជ្រួលច្របល់ទៅតាមស្ថានភាពវិវឌ្ឍនៃសង្គ្រាមនៅអ៊ុយក្រែន។ ចំណែកក្នុងផ្ទៃប្រទេសរុស្ស៊ី ទណ្ឌកម្មចាប់សាយឥទ្ធិពល។ លុយរូប្លិ៍បានដាំក្បាលចុះអស់៣០%។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣១
ទណ្ឌកម្មមួយខ្សែរបស់សហភាពអឺរ៉ុបព្រមទាំងក្រុមប្រទេសមហាអំណាចG៧ សម្រេចកាលពីចុងសប្តាហ៍ ដូចជា បង្កកលុយរបស់ធនាគារកណ្តាលរុស្ស៊ីនៅបរទេស ផ្តាច់រុស្ស៊ីពីប្រព័ន្ធ SWIFT បិទព្រំដែនអាកាសអឺរ៉ុបមិនឱ្យយន្តហោះរុស្ស៊ីឆ្លងកាត់ ព្រមទាំងបញ្ចេញថវិកា ៤៥០លានអឺរ៉ូ ដើម្បីទិញអាវុធឱ្យអ៊ុយក្រែន ជាទណ្ឌកម្មគាបករុស្ស៊ីជាអតិបរិមារ។ ប៉ុន្តែយុទ្ធសាស្ត្រនេះ បូកនិងពាក្យគំរាមរបស់លោកពូទីនប្រើអាវុធនុយក្លេអ៊ែរ បានជះផលវិបាកខ្លាំងលើទីផ្សារភាគហ៊ុនរបស់អឺរ៉ុបខ្លួនឯងដែរ ជាពិសេសគឺទីផ្សារវត្ថុធាតុដើម និងបានធ្វើឱ្យមានវិបត្តិអតិផរណាកាន់តែខ្លាំងឡើង។
វត្ថុធាតុដើមបានឡើងថ្លៃជាថ្មី ៖ ប្រេងឡើងថ្លៃ៥%ក្នុងមួយធុង។ ឧស្ម័នធម្មជាតិអឺរ៉ុបឡើងថ្លៃ២៣% ស្រូវសាឡីឡើង៤,៤៨%។
គ្រប់ទីផ្សារភាគហ៊ុនសំខាន់ៗរបស់អឺរ៉ុបបានដាំក្បាលចុះស្ទើរទាំងអស់នៅថ្ងៃចន្ទទី ២៨ កុម្ភៈនេះ។ ភាគហ៊ុនCAC40 ប៉ារីសបានធ្លាក់ថ្លៃអស់ ៣,០៥% និងអស់២,៣៩% សម្រាប់ភាគហ៊ុនDAXហ្វ្រង់ហ្វ័រអាល្លឺម៉ង់ -១,៥៤% នៅឡុងដ៍ មីឡង់-២,៥៩និង-៣,១៨%សម្រាប់EuroStoxx50។ ទីផ្សារភាគហ៊ុននៅអាស៊ីធន់គួរសម ៖ តូក្យូឡើងបាន០,១៩% សៀងហៃ ០,៣២% តែហុងកុងធ្លាក់ថ្លៃបន្តិច (-០,២៤%)។
នៅប៉ារីស វិស័យធនាគាររងផលប៉ះពាល់ជាពិសេសតែម្តង ព្រោះធនាគារខ្លះមានរកស៊ីពាក់ព័ន្ធនឹងរុស្ស៊ី ជាក់ស្តែង¨ភាគហ៊ុនរបស់ធនាគារ Société générale និងធនាគារBNP បានធ្លាក់ចុះ៧% ធនាគារCrédit agricole -៥%។ ផ្ទុយទៅវិញ ក្នុងវិស័យការពារជាតិនិងអាកាសចរណ៍ ភាគហ៊ុនរបស់ក្រុមហ៊ុនផលិតសព្វាវុធបារាំង Thalès បានស្ទុះឡើង១៥% និង៨,៤%សម្រាប់ក្រុមហ៊ុនផលិតយន្តហោះDassault។
ចំណែកខាងរុស្ស៊ីវិញ ប្រាក់រូប្ល បានធ្លាក់ថ្លៃអស់៣០%។ នៅថ្ងៃចន្ទទី ២៨កុម្ភៈនេះ លុយរូប្លធ្លាក់ថ្លៃទាបបំផុតជាប្រវត្តិសាស្ត្រ ១១៩,៥០រូប្ល ទើបទិញបានមួយដុល្លារ ។ កាតធនាគារបរទេសគាំងប្រើលែងកើតនៅក្នុងប្រទេសរុស្ស៊ីតាំងពីថ្ងៃអាទិត្យមក ហើយលុយសុទ្ធកាត់ក្រៗទៅ ដោយគេលែងអាចទាញដូរយកលុយដុល្លារ ឬអឺរ៉ូពីធនាគាររុស្ស៊ីបានទៀតហើយ។ គឺមានតែលុយរូប្លប៉ុណ្ណោះ។
លុយរូប្លធ្លាក់ថ្លៃខ្លាំងមិនធ្លាប់មាន បានជំរុញឱ្យធនាគារកណ្តាលរុស្ស៊ី ផ្អាករាល់គ្រប់សកម្មភាពដោះដូរលុយ រហូតដល់ម៉ោង៣រសៀល ឬពេញមួយថ្ងៃនេះតែម្តងផង។ Sberbank ធនាគារជាតិរុស្ស៊ី កំពុងជួបការលំបាកយ៉ាងខ្លាំង និងអាចបើកប្រាក់បៀរវត្សរ៍ឱ្យតែអ្នករដ្ឋការណាមានគណនីក្នុងធនាគារជាតិនេះទេ។ ប៉ុន្តែនេះមិនមែនជាផលវិបាកធ្ងន់ធ្ងរខ្លាំងនៅឡើយទេ នៅមានផលវិបាកមើលមិនឃើញជាច្រើនផ្សេងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ