ការសិក្សា៖ ប្រភេទត្រីមួយភាគប្រាំនៅក្នុងទន្លេមេគង្គប្រឈមនឹងគ្រោះផុតពូជ
នៅក្នុងរបាយការណ៍របស់អង្គការការពារធម្មជាតិដឹកនាំដោយWWF ដែលចេញផ្សាយនៅថ្ងៃចន្ទទី៤មីនា២០២ ពូជត្រីមួយភាគប្រាំនៅក្នុងទន្លេមេគង្គកំពុងប្រឈមនឹងការគំរាមកំហែងផុតពូជ។ មូលហេតុធំបណ្តាលមកពីការធ្វើទំនប់វារីអគ្គិសនី ឬការបូមខ្យាច់។
ចុះផ្សាយនៅថ្ងៃ៖
ស្តាប់ - ០២:១៨
ត្រីនៅទន្លេមេគង្គកំពុងប្រឈមនឹងគ្រោះថ្នាក់។ ជិតមួយភាគប្រាំនៃពូជត្រីកំពុងស្ថិតក្រោមការគំរាមកំហែងផុតពូជ។ នេះបើតាមសេចក្តីប្រកាសរបស់លោកស្រី Lan Mercadoនាយិកាអង្គការWWF សម្រាប់តំបន់អាស៊ីប៉ាស៊ីហ្វិក នៅក្នុងអារម្ភកថានៃរបាយការណ៍របស់សហភាពអន្តរជាតិដើម្បីកិច្ចការពាររក្សាធម្មជាតិ ចេញផ្សាយនាថ្ងៃចន្ទទី ៤មីនា២០២៤នេះ។
ទន្លេមេគង្គជាអាងស្តុកធនធានជីវចម្រុះត្រីប្រមាណជាង១១៤៨ពូជ ក្នុងនោះត្រីបបែលយក្សទឹកសាប ដែលគេចាត់ទុកជាត្រីទឹកសាបដ៏ធំជាងគេបំផុតនៅលើពិភពលោកផង។ ប៉ុន្តែបើតាមអង្គការការពារធម្មជាតិ ពូជត្រីប្រមាណ៧៤កំពុងរងគ្រោះផុតពូជ ក្នុងនោះ១៨ប្រភេទស្ថិតក្នុងចំណាត់ថ្នាក់រងគ្រោះខ្លាំងបំផុត ប៉ុន្តែតួលេខពិតប្រហែលជាច្រើននិងធ្ងន់ធ្ងរជាងនេះ។ នេះបើតាមក្រុមអ្នកសិក្សាដដែល ដែលលម្អិតទៀតថា មូលហេតុនៃការបាត់បង់ និងធ្លាក់ចុះចំនួនត្រីនៅទន្លេមេគង្គ បណ្តាលមកពីការសាងទំនប់វារីអគ្គិសនី ការនេសាទមិនត្រឹមត្រូវ ការបូមខ្យាច់ ការបំពុលបរិស្ថាន និងការបាត់បង់ជម្រកត្រី ហើយគួបផ្សំបន្ថែមដោយបាតុភូតប្រែប្រួលអាកាសធាតុទៀត។
ចំនួនត្រីនៅបឹងទន្លេសាប ដែលជាបឹងទឹកសាបនិងជម្រុកត្រីដ៏ធំជាងគេបំផុតនៅតំបន់អាស៊ីអាគ្នេយ៍ បានធ្លាក់ចុះអស់៨៨%នៅឆ្នាំរវាងពីឆ្នាំ២០០៣ ដល់ឆ្នាំ២០១៩។ ហើយនៅចន្លោះឆ្នាំ២០១៥និងឆ្នាំ២០២០ ការសិក្សាមួយផ្សេងទៀតបានបង្ហាញថា ការនេសាទត្រីនៅទន្លេមេគង្គបានខាតបង់អស់មួយភាគបី។
សម្រាប់លោកស្រីនាយិកាអង្គការWWFប្រចាំតំបន់អាស៊ីប៉ាស៊ីហ្វិក របាយការណ៍របស់អង្គការការពារធម្មជាតិ ជាសារដាស់ស្មារតី ឱ្យប្រជាពលរដ្ឋនិងអង្គការអាស៊ីខាងត្បូងរួសរាន់ បញ្ចេញសកម្មភាពជាបន្ទាន់។ លោក Zeb Hogan នៃអង្គការWonders of the Mekong ដែលចូលរួមចំណែកបង់វិភាគទានក្នុងរបាយការណ៍នេះ បានផ្តល់អនុសាសន៍ឱ្យដំឡើងគុណភាពទឹកទន្លេមេគង្គ និងស្តារជម្រកព្រមទាំងពូជត្រីស្ថិតក្នុងគ្រោះថ្នាក់ជិតផុតពូជ ព្រោះមិនទាន់ហួសពេលទេ។ ទន្លេមេគង្គនិងត្រី ជាប្រភពធនធានធម្មជាតិសម្រាប់ប្រជាពលរដ្ឋរាប់លាននាក់ តាំងពីប្រទេសចិនរហូតដល់វៀតណាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ