សហរដ្ឋអាមេរិកនិងឥណ្ឌាបញ្ជាក់ឆន្ទៈខិតចូលគ្នា ដើម្បីទប់ទល់ចិន
ប្រឈមនឹងសន្ទុះអំណាចចិន នៅតំបន់អាស៊ីប៉ាស៊ីហ្វិក និងក្នុងបរិបទនៃសង្គ្រាមអ៊ីស្រាអែល-ហាម៉ាសផង និងសង្គ្រាមនៅអ៊ុយក្រែនផង នៅថ្ងៃសុក្រទី១០វិច្ឆិកា២០២៣សហរដ្ឋអាមេរិកនិងឥណ្ឌា បានបង្ហាញឆន្ទៈរឹតចំណងភាពជាដៃគូយុទ្ធសាស្ត្រនឹងគ្នា។
ចុះផ្សាយនៅថ្ងៃ៖
ស្តាប់ - ០២:២៦
សហរដ្ឋអាមេរិកនិងឥណ្ឌាកំពុងបើកជំនួបប្រចាំឆ្នាំ២+២ គឺជំនួបថ្នាក់រដ្ឋមន្ត្រីការបរទេសនិងការពារជាតិ នៅទីក្រុងញូវដេលី។ វាជាការចាំបាច់បំផុតដែលប្រទេសប្រជាធិបតេយ្យដ៏ធំជាងគេនៅលើកទាំងពីរត្រូវផ្តោះប្តូរទស្សនៈគ្នានិងស្វែងរកកម្មវត្ថុរួមសម្រាប់សុខុមាភាពជូនប្រជាពលរដ្ឋទាំងពីរប្រទេស។ នេះជាប្រសាសន៍របស់លោក ឡូយ អូស្ទីន រដ្ឋមន្ត្រីក្រសួងការពារជាតិ ដោយលើកសរសើរថា កិច្ចសហប្រតិបត្តិការអាមេរិកឥណ្ឌាត្រូវបានពង្រឹងលើគ្រប់វិស័យ។ រីឯលោកប្រមុខការទូតអាមេរិក អង់តូនីប្លីងកិនវិញ បានទទូចបញ្ជាក់អំពីការប្តេជ្ញាចិត្តជាថ្មីរបស់អាមេរិកចំពោះតំបន់អាស៊ីប៉ាស៊ីហ្វិក និងភាពចាំបាច់នៃការតំបន់អាស៊ីប៉ាស៊ីហ្វិកឱ្យរុងរឿង សេរី ពិត និងប្រាកដ ពោលគឺអាមេរិកចង់ដៅរិះគន់ដោយមិនចំហមហិច្ឆតាសេដ្ឋកិច្ច នយោបាយនិងយុទ្ធសាស្ត្រចិននៅក្នុងតំបន់។
ចំណែកភាគីឥណ្ឌាវិញ លោកប្រមុខការទូត ជៃស្ហាន់ការបានលើកសរសើរជំនួបប្រចាំឆ្នាំ២+២ ថាជាទំព័រទំនាក់ទំនងថ្មីរវាងសហរដ្ឋអាមេរិក-ឥណ្ឌា តាមគន្លងនៃទស្សនកិច្ចផ្លូវរដ្ឋរបស់លោកនាយករដ្ឋមន្ត្រីឥណ្ឌាណារិនដ្រា ម៉ូឌី នៅវ៉ាស៊ីនតោនកាលពីខែមិថុនាកន្លងទៅ។
ឥណ្ឌាសមាជិកសម្ព័ន្ធកិច្ចសហប្រតិបត្តិការការពារជាតិហៅកាត់ថាQuad ជាមួយបីប្រទេសផ្សេងទៀតគឺសហរដ្ឋអាមេរិក អូស្ត្រាលី ជប៉ុន ត្រូវបានសម្ព័ន្ធមិត្តចាត់ទុកជារបងទប់ឥទ្ធិពលនិងមហិច្ឆតាចិនដែលរីកធំធាត់ជាលំដាប់នៅក្នុងតំបន់អាស៊ីប៉ាស៊ីហ្វិក។ រដ្ឋបាលអាមេរិកត្រូវការផ្តល់អាទិភាពដល់ទំនាក់ទំនងជាមួយឥណ្ឌាព្រោះមានកង្វល់រួមគឺប្រឆាំងនឹងចិន។ជាងនេះទៅទៀត វ៉ាស៊ីនតោនសង្ឃឹមថាការបង្ខិតទំនាក់ទំនងក្នុងវិស័យការពារជាតិឱ្យបានកាន់តែស្អិតល្មួតជិតគ្នា អាចចូលរួមចំណែកធ្វើឱ្យឥណ្ឌាងាកចេញ ឬខិតឆ្ងាយពីរុស្ស៊ីបានខ្លះ។
ហេតុដូច្នេះហើយបានជាអាមេរិកមានចេតនាលើកទឹកចិត្តឱ្យមានកិច្ចសហប្រតិបត្តិការអន្តរជាតិក្នុងវិស័យការពារជាតិតាមសេចក្តីត្រូវការរបស់ឥណ្ឌាផង និងអាចជួយពិភពលោកឱ្យមានសន្តិសុខកាន់តែប្រសើរផង។
ក្នុងន័យនេះ ជំនួប២+២ ត្រូវជជែកផងដែរអំពីប្រធានបទរុស្ស៊ីធ្វើសង្គ្រាមចូលឈ្លានពានអ៊ុយក្រែន ពីសង្គ្រាមអ៊ីស្រាអែលនិងហាម៉ាស។ ជម្លោះនេះបាននិងកំពុងក្លាយជាឧបសគ្គចម្បងនៃគម្រោងបង្កើតផ្លូវពាណិជ្ជកម្មថ្មីភ្ជាប់ពីអឺរ៉ុប-ដើមបូព៌ានិងប្រទេសឥណ្ឌា ដែលទើបបង្ហាញឱ្យដឹងក្នុងជំនួបកំពូលហ្សេ៧នៅទីក្រុងញូវដេលី កាលពីខែកញ្ញា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ