អាមេរិកផ្តល់ប្រាក់៥៥៣លានដុល្លារ ឲ្យស្រីលង្កាខ្ចីសាងសង់កំពង់ផែទឹកជ្រៅមួយទៀត ក្បែរកំពង់ផែចិន
សហរដ្ឋអាមេរិក នឹងផ្តល់ប្រាក់កម្ចី ចំនួន៥៥៣លានដុល្លារ ទៅឲ្យស្រីលង្ការ ដើម្បីសម្រេចគម្រោងសាងសង់កំពង់ផែទឹកជ្រៅថ្មីមួយទៀត នៅក្រុងកូឡុំបូ ដោយសហការជាមួយក្រុមហ៊ុនឥណ្ឌា។ គម្រោងនេះ ត្រូវបានគេមើលឃើញថា គឺជាការឆ្លើយតបរបស់ឥណ្ឌានិងសហរដ្ឋអាមេរិក ទាក់ទិននឹងវត្តមានចាក់ឬសរបស់ចិននៅស្រីលង្កា ហើយដែលធ្វើឲ្យគេបារម្ភអំពីលទ្ធភាព នៃការដាក់ពង្រាយកម្លាំងយោធាចិន នៅក្នុងតំបន់មហាសមុទ្រឥណ្ឌា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០៩
ថវិកាកម្ចីនឹងផ្តល់ទៅឲ្យស្រីលង្កា តាមរយៈ Development Finance Corporation (DFC) ដែលជាទីភ្នាក់ងារមួយនៃរដ្ឋាភិបាលអាមេរិក។ លោក Scott Nathan អ្នកទទួលខុសត្រូវម្នាក់នៃទីភ្នាក់ងារនេះ បានឲ្យដឹងថា កំពង់ផែទឹកជ្រៅថ្មី ឈ្មោះ “កំពង់ផែអន្តរជាតិកូឡុំបូខាងលិច” ត្រូវសាងសង់ដោយសម្ព័ន្ធក្រុមហ៊ុន ដែលមានក្រុមហ៊ុនឥណ្ឌា ឈ្មោះ Adani ជាអ្នកដឹកមុខ។ មានតម្លៃសាងសង់ប្រមាណ ៧០០លានដុល្លារ កំពង់ផែថ្មីនេះមាន បណ្តោយលយចូលទឹក ប្រវែង១៤០០ម៉ែត្រ និងអាចមានសមត្ថភាព ទទួលកុងទឺន័រទំនិញ ចំនួន៣លាន២សែនកុងទឺន័រ ក្នុងមួយឆ្នាំ។
សូមបញ្ជាក់ថា កាលពីឆ្នាំ២០២២ រដ្ឋស្រីលង្កាបានប្រកាសក្ស័យធន គ្មានប្រាក់សងបំណុលបរទេសដ៏ច្រើនសន្ធឹក ដោយសារជួបវិបត្តិហិរញ្ញវត្ថុជាបន្តបន្ទាប់។ យ៉ាងណាក៏ដោយ តំណាងទីភ្នាក់ងារអាមេរិកខាងលើ បានអះអាងថា ការផ្តល់ប្រាក់កម្ចី ទៅឲ្យវិស័យឯកជនស្រីលង្ការនេះ គឺវានឹងមិនទៅបង្កើនទំហំបំណុលសាធារណៈ របស់រដ្ឋាភិបាលស្រីលង្កាទេ។ ផ្ទុយទៅវិញ គឺវានឹងពង្រឹង វត្តមានរបស់សម្ព័ន្ធមិត្តអាមេរិក នៅក្នុងតំបន់នេះ។
គួរកត់សំគាល់ថា ស្រីលង្កា គឺជាកោះស្ថិតនៅត្រង់ចំណុចយុទ្ធសាស្ត្របំផុត ព្រោះជាផ្លូវឆ្លងកាត់នៃចរាចរណ៍ទំនិញ រវាងតំបន់ដើមបូព៌ា និងទ្វីបអាស៊ីទាំងមូល។ ផ្អែកតាមលោក Scott Nathan ប្រមាណពាក់កណ្តាលនៃនាវាដឹកទំនិញអន្តរជាតិ គឺត្រូវឆ្លងកាត់ដែនទឹករបស់ស្រីលង្កា។
គួរបញ្ជាក់ដែរ កំពង់ផែទឹកជ្រៅថ្មីរបស់ស្រីលង្កានេះ វាស្ថិតនៅជាប់នឹងកំពង់ផែមួយទៀត ដែលត្រូវបានសាងសង់ឡើង ដោយក្រុមហ៊ុនចិន China Merchants Ports Holdings។ កំពង់ផែចិននៅស្រីលង្កានេះ បានបង្កឲ្យមានការតវ៉ាជាខ្លាំងពីសំណាក់ឥណ្ឌា ព្រោះឥណ្ឌាខ្លាចក្រែងចិនប្រើយុទ្ធសាស្ត្រ យកកំពង់ផែនេះប្រើប្រាស់ជាមូលដ្ឋានទ័ព។ ជាក់ស្តែង កាលពីឆ្នាំ២០១៤ នាវាមុជទឹកបាតសមុទ្រ២គ្រឿងរបស់ចិន បានចូលទៅចតនៅកំពង់ផែក្រុងកូឡុំបូ ដែលបានធ្វើឲ្យឥណ្ឌាខឹងច្រឡោត។
ជាងនេះទៀត ដោយសារតែជាប់បំណុលចិនវ័នក កាលពីឆ្នាំ២០១៧ រដ្ឋាភិបាលស្រីលង្កា បានសម្រេចចិត្តប្រគល់កំពង់ផែមួយទៀតរបស់ខ្លួន ឈ្មោះ Hambantota ស្ថិតនៅភាគខាងត្បូងកោះ ទៅឲ្យក្រុមហ៊ុនចិន China Merchants Ports Holdings គ្រប់គ្រងរយៈពេល៩៩ឆ្នាំ។ អន្ទាក់បំណុលរបស់ចិននេះ បានធ្វើឲ្យអាមេរិក និងឥណ្ឌា មានការព្រួយបារម្ភ ថាចិនអាចនឹងប្រើប្រាស់កំពង់ផែស្រីលង្កា ធ្វើជាទីតាំងយុទ្ធសាស្ត្រ ដាក់ពង្រាយកងទ័ពចិននៅក្នុងតំបន់មហាសមុទ្រឥណ្ឌា។ តែទោះជាយ៉ាងណា រដ្ឋាភិបាលស្រីលង្កា បានធានាអះអាងថា ខ្លួននឹងមិនអនុញ្ញាតឲ្យចិន ប្រើប្រាស់កំពង់ផែទំនិញរបស់ខ្លួន ដើម្បីបំពេញកម្មវត្ថុយោធាចិនឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ