បោះឆ្នោតនៅអ៊ីរ៉ង់ ដោយគ្មានសង្ឃឹមថានឹងមានការផ្លាស់ប្តូរ ទាំងនយោបាយទាំងសេដ្ឋកិច្ច
ថ្ងៃសុក្រទី១មីនានេះ ប្រជាជនអ៊ីរ៉ង់ប្រមាណ៦០លាននាក់ ត្រូវទៅបោះឆ្នោតជ្រើសរើសសមាជិកសភា និងសមាជិកក្រុមប្រឹក្សាជំនាញ ដែលមានតួនាទីទៅតែងតាំងមគុទេសន៍កំពូលអ៊ីរ៉ង់។ ជាការបោះឆ្នោត ដែលគេមិនរំពឹងថា នឹង អាចធ្វើឲ្យមានការផ្លាស់ប្តូរអ្វីឡើយ ទាំងនយោបាយទាំងសេដ្ឋកិច្ច ព្រោះក្រុមនយោបាយអភិរក្សនិយមជ្រុល នឹងបន្តគ្រប់គ្រងអំណាចយ៉ាងណែនដដែល បើទោះបីជាជីវភាពរស់នៅ របស់ប្រជាជនអ៊ីរ៉ង់ កាន់តែលំបាក។
ចុះផ្សាយនៅថ្ងៃ៖
ស្តាប់ - ០៣:១៥
ព្រឹកម៉ោង៨ អាយ៉ាតូឡា អាលីខាមឺណី បានទៅបើកឆាក ទម្លាក់សន្លឹកឆ្នោតចូលហិប មុនគេនៅក្រុង តេអេរ៉ង់។ បោះរួច អាយ៉ាតូឡា អាលីខាមឺណី បានថ្លែងអំពាវនាវ ឲ្យប្រជាជនអ៊ីរ៉ង់ ជាពិសេសយុវជនដែលទើបតែគ្រប់អាយុបោះឆ្នោត ត្រូវទៅចូលរួមបោះឆ្នោត ឲ្យបានភ្លូកទឹកភ្លូកដី ដើម្បីបង្ហាញប្រាប់ពិភពលោក ថាប្រជាជនអ៊ីរ៉ង់សកម្ម ហើយស្រលាញ់ជាតិ។
មគុទេសន៍កំពូលផ្តាច់ការអ៊ីរ៉ង់រូបនេះ បានថ្លែងថា សត្រូវរបស់អ៊ីរ៉ង់ ដែលមានអាមេរិក អឺរ៉ុប និងពួកអ៊ីស្រាអែល គឺពួកនេះខ្លាចកម្លាំងថាមពលរបស់ប្រជាជនអ៊ីរ៉ង់ណាស់។ ពួកនេះរងចាំតាមដានមើល ថាតើប្រជាជនអ៊ីរ៉ង់ មានកម្លាំងរួបរួមគ្នាកម្រិតណា ព្រោះថាពួកវា ចាំតែឆក់ឱកាស ដើម្បីគំរាមមកលើសន្តិសុខរបស់អ៊ីរ៉ង់តែប៉ុណ្ណោះ។
គួរកត់សំគាល់ថា អ្វីដែលអំណាចនយោបាយអ៊ីរ៉ង់ ចង់បានបំផុត គឺការចូលរួមបោះឆ្នោតរបស់ប្រជាជនក្នុងអត្រាខ្ពស់ ព្រោះវាជាសក្ខីកម្មបញ្ជាក់ពីភាពស្របច្បាប់នៃរបបផ្តាច់ការនេះ។ យ៉ាងណាក៏ដោយ គឺមិនរំពឹងថា ប្រជាជនអ៊ីរ៉ង់នឹងទៅចូលរួមបោះឆ្នោតច្រើននោះទេ។ កាលពីពេលបោះឆ្នោតឆ្នាំ២០២០ អត្រាអ្នកទៅបោះឆ្នោតមានតែ ៤២,៥៧% ដែលជាអត្រាទាបបំផុត ចាប់តាំងពីរបបសាធារណរដ្ឋអ៊ីស្លាមអ៊ីរ៉ង់បានកកើតមក នៅឆ្នាំ១៩៧៩។ ផ្អែកតាមការស្ទាបស្ទង់មតិមួយ ផ្សាយដោយបណ្តាញទូរទស្សន៍ជាតិអ៊ីរ៉ង់ គឺមានតែប្រជាជន៤១%ទេ ដែលគិតថានឹងទៅបោះឆ្នោត។
គួរបញ្ជាក់ថា បើនិយាយពីនយោបាយវិញ គឺមិនសង្ឃឹមថា ការបោះឆ្នោតនេះ នឹងអាចធ្វើឲ្យប្រែប្រួលអ្វីធំដុំដែរ នៅក្នុងសមាសភាពសភាអ៊ីរ៉ង់ ដែលបច្ចុប្បន្ន គឺពួកអភិរក្សនិយមជ្រុល គ្រប់គ្រងអាសនៈ ដល់ទៅ២៣០ លើ២៩០។ បេក្ខជនខ្លះ នៃក្រុមចលនានយោបាយកណ្តាលនិយម និងកំណែទម្រង់និយម ត្រូវបានគេរារាំងមិនឲ្យឈរឈ្មោះ។ សម្ព័ន្ធបក្សនយោបាយកំណែទម្រង់និយម បានដកខ្លួនមិនចូលរួមការបោះឆ្នោតនេះ និងបានបរិហារថា ជាការបោះឆ្នោតដែលគ្មានន័យ។
បន្ថែមពីនេះ ក្រុមនយោបាយអភិរក្សនិយមជ្រុលអ៊ីរ៉ង់ ត្រូវគេជឿថានឹងឈានទៅពង្រឹងអំណាចបន្ថែមទៀត នៅក្នុងក្រុមប្រឹក្សាជំនាញ តាមរយៈការរារាំងមិនឲ្យអ្នកមានទំនោរកំណែទម្រង់ អាចឈរឈ្មោះបាន។ ក្រុមប្រឹក្សាជំនាញនេះ មានសមាជិកចំនួន៨៨នាក់ សុទ្ធសឹងតែជាមេដឹកនាំសាសនាអ៊ីស្លាម ហើយដែលមានតួនាទីបោះឆ្នោត តែងតាំងអាយ៉ាតូឡា មគុទេសន៍កំពូល។ លោក ហាសាន់ រ៉ូហានី អតីតប្រធានាធិបតីអ៊ីរ៉ង់ ដែលធ្លាប់ធ្វើជាសាមជិកក្រុមប្រឹក្សានេះអស់២៤ឆ្នាំ លើកនេះត្រូវគេបដិសេធមិនឲ្យឈរឈ្មោះ។
គួរកត់សំគាល់ដែរថា បរិបទនយោបាយ សេដ្ឋកិច្ចយ៉ាប់យឺន ព្រមទាំងការកៀបសង្កត់សិទ្ធិសេរីភាព បានធ្វើឲ្យប្រជាជនអ៊ីរ៉ង់នឿយណាយអស់សង្ឃឹមនឹងរបបដឹកនាំ។ ចលនាបាតុកម្ម នៅក្រោយការស្លាប់របស់ Mahsa Amini បានសាបរលាបទៅ ដោយការបង្ក្រាបយ៉ាងហិង្សា មនុស្សស្លាប់ច្រើនរយនាក់ និងរាប់ពាន់នាក់ត្រូវគេចាប់ដាក់ឃុំ។ រាល់ថ្ងៃនេះ អ្វីដែលប្រជាជនអ៊ីរ៉ង់ខ្វាយខ្វល់បំផុត គឺបញ្ហាសេដ្ឋកិច្ច ជីវភាពដែលកាន់តែលំបាក។ អត្រាអតិផរណា បានឡើងដល់ជិត ៥០% ធ្វើឲ្យតម្លៃទំនិញឡើងថ្លៃជាលំដាប់។ ប្រជាជនអ៊ីរ៉ង់ទូទៅ គ្មានសង្ឃឹមថាសមាជិកសភាថ្មី នឹងអាចដោះស្រាយបញ្ហាសេដ្ឋកិច្ចបានទេ ដរាបណារបបអ៊ីរ៉ង់នៅតែស្ថិតនៅឯកោលើឆាកអន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ