លោកនេតាន់យ៉ាហ៊ូស្នើផែនការក្រោយសង្គ្រាម ដែលអ៊ីស្រាអែលគ្រប់គ្រងសន្តិសុខតំបន់ហ្កាហ្សានិងស៊ីហ្សកដានី
លោកនាយករដ្ឋមន្ត្រីអ៊ីស្រាអែល បេនចាមិន នេតាន់យ៉ាហ៊ូ បានបង្ហាញឯកសារមួយ ដែលកំណត់អំពីផែនការ នៅក្រោយពេលចប់សង្គ្រាមនៅហ្កាហ្សា។ ជាផែនការដែលអ៊ីស្រាអែល និងគ្រប់គ្រងផ្នែកសន្តិសុខ ទាំងនៅតំបន់ស៊ីហ្សកដានី និងតំបន់ហ្កាហ្សា។ សំណើនេះ ត្រូវបានអាជ្ញាធរប៉ាឡេស្ទីន ប្រកាសច្រានចោលភ្លាមៗដែរ។
ចុះផ្សាយនៅថ្ងៃ៖
ស្តាប់ - ០៣:០៤
កាលពីថ្ងៃព្រហស្បតិ៍ លោកនេតានយ៉ាហ៊ូ បានដាក់ជូនគម្រោងផែនការក្រោយសង្គ្រាម ទៅកាន់ការិយាល័យសន្តិសុខ នៃរដ្ឋាភិបាលអ៊ីស្រាអែល។ ឯកសារដែលមានច្រើនចំណុចនេះ បានចាប់ផ្តើមដោយរំលឹកថា កម្មវត្ថុរបស់កងទ័ពអ៊ីស្រាអែល គឺឈានទៅបំបែកបោសសំអាតក្រុមភេរវកម្មហាម៉ាស និងក្រុមភេរវកម្មជីហាតអ៊ីស្លាម ឲ្យអស់ពីតំបន់ហ្កាហ្សា ព្រមទាំងឈានទៅរំដោះចំណាប់ខ្មាំងទាំងអស់ មកវិញដោយសុវត្ថិភាព។
យោងតាមទីភ្នាក់ងារព័ត៌មានបារាំង AFP ដែលបានទទួលឯកសារនេះមួយច្បាប់ដែរ គឺ លោកនេតាន់យ៉ាហ៊ូ បានស្នើថា អាជ្ញាធរអ៊ីស្រាអែលនឹងបន្តគ្រប់គ្រងផ្នែកសន្តិសុខទាំងស្រុង នៅតំបន់ហ្កាហ្សា និងតំបន់ស៊ីហ្សកដានី។ អ៊ីស្រាអែលគ្រប់គ្រងផ្នែកសន្តិសុខ គឺក្នុងកម្មវត្ថុ ទប់ស្កាត់ឲ្យបាន នូវការប្រមូលកម្លាំងរបស់ពួកភេរវកម្ម ព្រមទាំងជីកគាស់រំលើងឲ្យបាន នូវការគម្រាមគ្រប់ទម្រង់ មកលើសន្តិសុខរបស់អ៊ីស្រាអែល។
ឯកសារនេះ បន្តថា អ៊ីស្រាអែលនឹងរក្សាលទ្ធភាពបើកបេសកម្ម នៅក្នុងតំបន់ហ្កាហ្សា ដោយគ្មានកំណត់ពេលវេលាឡើយ។ ចំណែកនៅឯព្រំដែនជាប់អាហ្ស៊ីប ខាងត្បូងហ្កាហ្សា ដែលក្រុមហាម៉ាសបានជីករូងក្រោមដីខ្វែងខ្វាត់រាប់សិបឆ្នាំមកហើយនោះ គឺអ៊ីស្រាអែលនឹងបន្តប្រតិបត្តិការបិទខ្ទប់ ដោយសហការជាមួយអេហ្ស៊ីប និងជំនួយពីសហរដ្ឋអាមេរិក ដោយធ្វើយ៉ាងណា បិទផ្លូវកុំឲ្យក្រុមហាម៉ាសអាចប្រមូលកម្លាំងនិងមានអាវុធឡើងវិញបាន។ បន្ថែមពីការរំលាយសមត្ថភាពយោធាទាំងស្រុងនៅហ្កាហ្សា ផែនការរបស់លោកនេតាន់យ៉ាហ៊ូ បានកំណត់ផងដែរ អំពីគាស់រំលើងចោលនូវចរន្តជ្រុលនិយមនៅតាម វិហារសាសនាអ៊ីស្លាម តាមសាលារៀន និងអង្គការសមាគមនៅហ្កាហ្សា។
ដោយឡែក ទាក់ទិននឹងការគ្រប់គ្រងរដ្ឋបាលតំបន់ហ្កាហ្សាវិញ ផែនការរបស់លោកនេតាន់យ៉ាហ៊ូ បានស្នើថា នឹងត្រូវប្រគល់ទៅឲ្យ បុគ្គលិករដ្ឋមូលដ្ឋាននៅតំបន់ហ្កាហ្សា ដែលមានបទពិសោធន៍ការងារ ហើយមិនជាប់ពាក់ព័ន្ធនឹង ប្រទេសឬបណ្តាញដែលគាំទ្រក្រុមភេរវកម្ម។
គួរកត់សំគាល់ថា ផែនការស្នើដោយលោកនេតាន់យ៉ាហ៊ូនេះ គឺពុំមានលើកឡើងទាល់តែសោះ អំពី អាជ្ញាធរប៉ាឡេស្ទីន របស់លោកម៉ាហមូដ អាបាស ដែលបច្ចុប្បន្នគ្រប់គ្រងរដ្ឋបាលតំបន់ស៊ីហ្សកដានី។ អ្វីដែលគួរឲ្យកត់សំគាស់បំផុតទៀតនោះ គឺផែនការនេះ មិនបានលើកឡើងឡើយ អំពីការបង្កើតរដ្ឋប៉ាឡេស្ទីនជាប្រទេសឯករាជ្យផ្លូវការ។
ក្រោយដំណឹងស្តីពីផែនការនេះ លោក Nabil Abou Rudeinah អ្នកនាំពាក្យរបស់លោកម៉ាហមូដ អាបាស បានចេញលិខិតប្រកាសមួយ ដោយបានលើកឡើងថា តាមរយៈផែនកានេះ គឺនេតាន់យ៉ាហ៊ូចង់បន្តគ្រប់គ្រងដែនដីប៉ាឡេស្ទីនជារៀងដរាប និងរារាំងមិនឲ្យរដ្ឋប៉ាឡេស្ទីនអាចចាប់បដិសន្ធិបាន។ ផែនការតែមួយគត់ ដែលភាគីប៉ាឡេស្ទីនអាចទទួលយកបាន គឺត្រូវប្រកាសថា តំបន់ហ្កាហ្សាជាផ្នែកមួយមិនអាចកាត់ផ្តាច់បាន ពីដែនដីប៉ាឡេស្ទីន ដែលជាប្រទេសឯករាជ្យ និងដោយមានទីក្រុងហ្សេរុយសាឡឹមជារដ្ឋធានី។
សូមបញ្ជាក់ដែរថា ការបង្ហាញផែនការ “ក្រោយសង្គ្រាម” របស់លោកនេតាន់យ៉ាហ៊ូនេះ គឺស្របពេលដែល នាយកទីភ្នាក់ងារចារកិច្ចអ៊ីស្រាអែល បានធ្វើដំណើរមកដល់ក្រុងប៉ារីស នៅព្រឹកថ្ងៃសុក្រទី២៣កុម្ភៈ។ តាមការឲ្យដឹង នៅប៉ារីស គឺនឹងមានការចរចាគ្នា រវាងភាគីអ៊ីស្រាអែល បារាំង និងសហរដ្ឋអាមេរិក ទាក់ទិននឹងការរកដំណោះស្រាយ បិទបញ្ចប់សង្គ្រាមនៅហ្កាហ្សា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ