អ៊ីរ៉ង់បញ្ជូននាវាចម្បាំងទៅក្នុងសមុទ្រក្រហម នៅបន្ទាប់ពីអាមេរិកបាញ់ពន្លិចទូករបស់ក្រុមហ៊ូទីយេម៉ែន
កងទ័ពអាមេរិកបាញ់ពន្លិចទូក៣គ្រឿងរបស់ក្រុមប្រដាប់អាវុធ ហ៊ូទីយេម៉ែន ដែលប៉ុនប៉ងចង់ឡើងប្លន់កប៉ាល់ដឹកទំនិញ នៅសមុទ្រក្រហម។ អង់គ្លេសដែលចូលរួមក្នុងសម្ព័ន្ធកម្លាំងអន្តរជាតិដឹកនាំដោយអាមេរិក បានប្រកាសនៅថ្ងៃចន្ទថា ត្រៀមខ្លួន ដើម្បីចាត់វិធានការផ្ទាល់ដៃ ជាមួយពួកហ៊ូទីយេម៉ែន ដើម្បីធានាការពារសេរីភាព ចរាចរណ៍ នៅសមុទ្រក្រហម។ អ៊ីរ៉ង់ ចោទប្រកាន់អាមេរិក និងអង់គ្លេសថា កំពុងប្រឹងបង្កអស្ថិរភាពនៅសមុទ្រក្រហម បន្ទាប់ពីអាមេរិកវាយប្រហារទៅលើក្រុមហ៊ូទីយេម៉ែន កាលពីថ្ងៃអាទិត្យ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៣៤
នៅថ្ងៃចន្ទ ទីភ្នាក់ងារព័ត៌មានអ៊ីរ៉ង់ Tasnim បានចុះផ្សាយថា កប៉ាល់ចម្បាំងអ៊ីរ៉ង់ឈ្មោះAlborzបានបើកឆ្លងកាត់ច្រកសមុទ្រ Bab al-Mandab ដែលនៅកៀកជាប់នឹងទឹកដីយេម៉ែន សំដៅទៅក្នុងសមុទ្រក្រហម។ ទីភ្នាក់ងារព័ត៌មានអ៊ីរ៉ង់មិនបានលម្អិតពីហេតុផលដែលធ្វើឲ្យអ៊ីរ៉ង់ពង្រាយនាវាចម្បាំង នៅសមុទ្រក្រហម ប៉ុន្តែ គ្រាន់តែបញ្ជាក់ថា កប៉ាល់ចម្បាំងAlborzធ្លាប់បើកប្រតិបត្តិការនៅក្នុងតំបន់ តាំងពីឆ្នាំ ២០០៩ ដើម្បីការពារកប៉ាល់ដឹកទំនិញ ពីការវាយប្រហាររបស់ចោរសមុទ្រ។
ចង់ ឬមិនចង់ អ៊ីរ៉ង់បញ្ជូននាវាចម្បាំងទៅក្នុងសមុទ្រក្រហម គឺបន្ទាប់ពី ឧទ្ធម្ភាគចក្រអាមេរិកបាញ់ពន្លិចទូកបីគ្រឿងរបស់ ក្រុមហ៊ូទីយេម៉ែន កាលពីថ្ងៃអាទិត្យ។ ទីបញ្ជាការកងទ័ពអាមេរិក ប្រចាំតំបន់ដើមបូព៌ា បាននិយាយនៅថ្ងៃអាទិត្យថា ទៅតាមការស្រែកសុំជំនួយពីកប៉ាល់ដឹកទំនិញ ដាណឺម៉ាក Maersk ដែលអះអាងថា រងការវាយប្រហារមីស៊ីលពីទឹកដីយេម៉ែន ឧទ្ធម្ភាគចក្ររបស់កងទ័ពជើងអាមេរិកបានចេញទៅបើកប្រតិបត្តិការការពារ កប៉ាល់ដឹកទំនិញ នៅសមុទ្រក្រហម។ នៅក្រោមហេតុផលការពារខ្លួន និងការពារកុំឲ្យក្រុមហ៊ូទីយេម៉ែនឡើងទៅចូលកាន់កាប់កប៉ាល់ដឹកទំនិញអន្តរជាតិ កងទ័ពអាមេរិកសម្រេចបាញ់ពន្លិចទូកបីគ្រឿងរបស់ក្រុមហ៊ូទី។ នៅក្នុងសេចក្តីប្រកាសព័ត៌មាន ទីបញ្ជាការកងទ័ពអាមេរិក ប្រចាំតំបន់ដើមបូព៌ា អះអាងថា ទាហានហ៊ូទី៧នាក់ស្លាប់នៅក្នុងការប៉ះទង្គិចអាវុធ នៅថ្ងៃអាទិត្យ។ ប៉ុន្តែ អ្នកនាំពាក្យរបស់ក្រុមហ៊ូទី អះអាងថា យុទ្ធជនរបស់ខ្លួន១០នាក់ ស្លាប់ និងបាត់ខ្លួន នៅក្នុងការវាយប្រហាររបស់កងទ័ពអាមេរិកកាលពីថ្ងៃអាទិត្យ។
គិតចាប់តាំងប្រកាសបង្កើតសម្ព័ន្ធភាពអន្តរជាតិដែលមានឈ្មោះ Prosperity Guardian ដើម្បីការពារសន្តិសុខនៅតំបន់សមុទ្រក្រហម នេះជាលើកទី១ដែលអាមេរិកបើកការវាយប្រហារ និងសម្លាប់ក្រុមប្រដាប់អាវុធហ៊ូទី យេម៉ែន ដែលអាមេរិក និងសម្ព័ន្ធមិត្តចោទប្រកាន់ថា បានទទួលជំនួយពីអ៊ីរ៉ង់ ដើម្បីវាយប្រហារ គំរាមកំហែងសេរីភាពចរាចរណ៍ពាណិជ្ជកម្មនៅសមុទ្រក្រហម។
នៅថ្ងៃចន្ទ រដ្ឋមន្រ្តីក្រសួងការពារជាតិ អង់គ្លេសលោកGrant Shapps អះអាងថា អង់គ្លេសត្រៀមខ្លួនដើម្បីចាត់វិធានការផ្ទាល់ដៃជាមួយក្រុមហ៊ូទី ដែលទើបឈ្នះសង្រ្គាម ចូលគ្រប់គ្រងទឹកដី៦០%របស់យេម៉ែន។ តាមការចុះផ្សាយរបស់កាសែត The Guardian ប្រមុខការពារជាតិអង់គ្លេសនិយាយថា រដ្ឋាភិបាលក្រុងឡុងដ៍មិនរារែកនឹងធ្វើសកម្មភាពផ្ទាល់ដើម្បីទប់ស្កាត់កុំឲ្យក្រុមហ៊ូទីវាយប្រហារទៅលើកប៉ាល់ដឹកទំនិញអន្តរជាតិ នៅថ្ងៃខាងមុខ។ ការលើកឡើងរបស់រដ្ឋមន្រ្តីការពារជាតិអង់គ្លេស ធ្វើឡើងនៅក្នុងខណៈពេលដែលកំពុងមានព័ត៌មានថា អង់គ្លេស និងអាមេរិកកំពុងរៀបចំសេចក្តីប្រកាសព្រមានចុងក្រោយសម្រាប់ក្រុមហ៊ូទី យេម៉ែន។
នៅក្នុងសន្និសីទកាសែត កាលពីថ្ងៃចន្ទ អ្នកនាំពាក្យរបស់ក្រសួងការបរទេសអ៊ីរ៉ង់វាយតម្លៃថា សកម្មភាពរបស់អង់គ្លេស និងអាមេរិកនៅសមុទ្រក្រហម កំពុងញុះញង់ បង្កឲ្យមានអស្ថិរភាព និងអសន្តិសុខនៅក្នុងតំបន់ ជាពិសេសសមុទ្រក្រហម។ គួរបញ្ជាក់ថា តំបន់សមុទ្រក្រហម ជាផ្លូវឆ្លងកាត់របស់នាវាដឹកទំនិញអន្តរជាតិ តំណាងឲ្យ៤០%នៃពាណិជ្ជកម្មពិភពលោក។ ប៉ុន្តែ ក្រុមហ៊ូទីនៅយេម៉ែន ដែលប្រកាសសាមគ្គីភាពជាមួយប្រជាជនប៉ាឡេស្ទីននៅហ្កាហ្សា បានប្រើដ្រូន មីស៊ីលវាយប្រហារ ឬចូលដណ្តើមគ្រប់គ្រងកប៉ាល់ដឹកទំនិញអន្តរជាតិ នៅសមុទ្រក្រហម ដែលពួកគេចោទប្រកាន់ថា មានជាប់ទាក់ទងនឹងផលប្រយោជន៍របស់អ៊ីស្រាអែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ