អ៊ីស្រាអែល នឹងទិញយន្តហោះចម្បាំងអាមេរិក F-៣៥ បន្ថែម២៥គ្រឿង
អ៊ីស្រាអែលបានអនុម័ត ទិញយន្តហោះចម្បាំងអាមេរិក ប្រភេទ F-៣៥ សម្រាប់មកបំពាក់ឱ្យកងទ័ពអាកាសជាតិ។ នេះបើតាមសេចក្តីថ្លែងការណ៍ របស់ក្រសួងការពារជាតិ ចេញផ្សាយនាថ្ងៃអាទិត្យទី ២ កក្កដា។ អ៊ីស្រាអែលគឺជាប្រទេសតែមួយគត់ប្រចាំតំបន់ដើមបូព៌ា ដែលមានយន្តហោះប្រដេញដ៏ទំនើបជាងគេបំផុតនេះ។
ចុះផ្សាយនៅថ្ងៃ៖
ស្តាប់ - ០១:៥៧
ជាមួយនឹងការសម្រេចរបស់ក្រសួងការពារជាតិ បញ្ជាទិញយន្តហោះចម្បាំងប្រភេទ F-៣៥ ដែលផលិតដោយក្រុមហ៊ុនLockheed Martin ពីរដ្ឋាភិបាលអាមេរិក ចំនួន២៥គ្រឿង កងទ័ពអាកាសអ៊ីស្រាអែល នឹងមានយន្តហោះចម្បាំង សរុប ៧៥គ្រឿង។ នេះបើតាមការលម្អិតក្នុងសេចក្តីថ្លែងការណ៍របស់ក្រសួងការពារជាតិអ៊ីស្រាអែល។
បើតាមប្រភពដដែល កញ្ចប់នៃកិច្ចព្រមព្រៀងទិញយន្តហោះមានតម្លៃប្រមាណ ៣ពាន់លានដុល្លារ នឹងត្រូវបានមូលនិធិជំនួយអាមេរិកជាអ្នកផ្តល់ហិរញ្ញប្បទាន និងជាការធានាបន្តកិច្ចសហប្រតិបត្តិការ រវាងក្រុមហ៊ុនអាមេរិកនិងឧស្សាហកម្មយោធាអ៊ីស្រាអែល ក្នុងការផលិតគ្រឿងបន្លាស់យន្តហោះផង។
អ៊ីស្រាអែលគឺជាប្រទេសក្នុងតំបន់ដើមបូព៌ាតែមួយគត់ ដែលមាន យន្តហោះប្រដេញF-៣៥ ប្រើ។ F-៣៥ ត្រូវបានគេចាត់ទុកជាយន្តហោះចម្បាំងដ៏មានប្រសិទ្ធភាពជាងគេបំផុតនៅលើទីផ្សារសព្វាវុធនាពេលបច្ចុប្បន្ន។
កាលពីខែធ្នូឆ្នាំ២០១៦ ក្រុមហ៊ុនសព្វាវុធអាមេរិកបានប្រគល់យន្តហោះF-៣៥ពីរគ្រឿងដំបូងទៅឱ្យអ៊ីស្រាអែល ក្នុងក្របខ័ណ្ឌនៃការបញ្ជាទិញចំនួន ៥០គ្រឿង។ ទទួលបានភ្លាម នៅឆ្នាំ២០១៨ យោធាអ៊ីស្រាអែល បានស្រែកកោតសរសើរថា F-៣៥បានចេញធ្វើប្រតិបត្តិ ជាលើកដំបូងនៅលើពិភពលោក តែមិនបានបង្ហើបឱ្យដឹងអំពីចំណុចដៅនៃការវាយប្រហារទេ។
សេចក្តីប្រកាសដំណឹងទិញយន្តហោះចម្បាំងបន្ថែម ប្រព្រឹត្តទៅតែប៉ុន្មានម៉ោងក្រោយពីអ៊ីស្រាអែល បានបើកការវាយប្រហារផ្លូវអាកាសលើប្រទេសស៊ីរី ដើម្បីតបទៅនឹងការបាញ់មីស៊ីលចេញពីទឹកដីស៊ីរីសំដៅដែនដីអ៊ីស្រាអែល នាពេលយប់។ យោធាអ៊ីស្រាអែលបានឱ្យដឹងថា យន្តហោះចម្បាំងបានដៅបាញ់លើចំណុចស៊ីបជាច្រើននៅក្នុងតំបន់។ តាំងពីសង្គ្រាមនៅស៊ីរី បានផ្ទុះឡើងនៅឆ្នាំ២០១១ អ៊ីស្រាអែលបានបើកប្រតិបត្តិការវាយប្រហារផ្លូវអាកាសជាងមួយរយ លើស៊ីរី ដោយភាគច្រើនដៅលើទីតាំងរបស់អ៊ីរ៉ង់ ឬទីតាំងរបស់ចលនាហេស្បូឡា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ