៧ខែទៀត ការប្រកួតកីឡាអូឡាំពិករដូវក្តៅឆ្នាំ២០២៤នឹងចាប់ផ្តើមបើកទ្វារជាផ្លូវការ ពីថ្ងៃទី២៦កក្កដាដល់ថ្ងៃទី១១សីហា។ ជាម្ចាស់ផ្ទះរៀបចំជាលើកទី២ ការប្រកួតកីឡាអូឡាំពិក បន្ទាប់ពីធ្វើជាម្ចាស់ផ្ទះជាលើកទី១កាលពី១០០ឆ្នាំមុន បារាំងបានចំណាយថាមពល ថវិកា និងទេពកោសល្យផ្នែកស្ថាបត្យកម្មរបស់ខ្លួនដើម្បីធ្វើយ៉ាងណាឲ្យព្រឹត្តិការណ៍អន្តរជាតិនៅក្នុងទឹកដីបារាំងទទួលបានជោគជ័យ។ ចាប់តាំងពីឆ្នាំ ២០១៨ សំណង់សម្រាប់ព្រឹត្តិការណ៍ប្រកួតកីឡាអូឡាំពិក មិនថា ស្តាត កន្លែងប្រកួត និងការដ្ឋានសំណង់អគារសម្រាប់ការស្នាក់របស់កីឡាករបានចាប់រីកដុះដូចផ្សិត។
