បារាំង ៖ តើកុប្បកម្មហិង្សា ប៉ះពាល់ដល់វិស័យទេសចរណ៍ យ៉ាងណា ?
ចុះផ្សាយនៅថ្ងៃ៖
ស្តាប់ - ០៤:៥៨
បន្ទាប់ពីឆ្លងកាត់ភាពចលាចលហិង្សាអស់៦យប់ នៅតាមទីក្រុងតូចធំស្ទើរពេញផ្ទៃប្រទេស បារាំងបានត្រលប់មករកភាពស្ងប់ស្ងាត់វិញហើយ នៅឡើយតែវិស័យទេសចរណ៍ និងសណ្ឋាគារ ដែលបន្តព្រួយបារម្ភ ខ្លាចបាត់បង់ភ្ញៀវ ព្រោះរូបភាពហិង្សា និងទង្វើបែបបំផ្លិចបំផ្លាញ របស់ក្មេងជំទង់ពេញកំហឹង មានចុះផ្សាយយ៉ាងព្រោងព្រាត ក្នុងទំព័រសង្គម និងបណ្តាញសារព័ត៌មានអន្តរជាតិ។ បារាំងទិសដៅទេសចរណ៍ដ៏ទាក់ទាញ កំពុងប្រលាក់ប្រលូសដោយកុប្បកម្មហិង្សា? តើវិស័យទេសចរណ៍បារាំង ត្រូវចុះស្រអាប់ និងខាតបង់យ៉ាងណា?
ក្នុងរដូវក្តៅ រដូវទេសចរណ៍ តែបែរជាមានរូបភាពអាក្រក់ៗ ៖ ក្មេងជំទង់ៗតតាំងនឹងប៉ូលិស យ៉ាងហិង្សា រូបភាពដុតឡាន ដុតអគារ អគ្គិភ័យ សកម្មភាពវាយបំផ្លាញ វាយបំបែកកញ្ចក់ គាស់ទ្វារហាង គាស់ផ្សារ ដើម្បីលួចយករបស់មានតម្លៃ បង្ហោះបង្ហាញស្ទើរគ្មានដាច់នៅតាមបណ្តាញសង្គម បណ្តាញផ្សព្វផ្សាយព័ត៌មាន ទូទាំងពិភពលោក នារយៈពេលនៃកុប្បកម្ម ៦យប់របស់ក្មេងជំទង់ ក្រោយការស្លាប់របស់យុវជន ណាហ៊ែល ដែលប៉ូលិសបានបាញ់ ហើយស្លាប់ នៅពេលគេចមិនឱ្យប៉ូលិសឆែក ច្បាស់ជាជះឥទ្ធិពលមិនល្អសោះឡើយសម្រាប់វិស័យទេសចរណ៍បារាំង។
បើតាមប្រធានការិយាល័យទេសចរណ៍ក្រុងប៉ារីស ក្នុងរយៈពេលពីរថ្ងៃដំបូងនៃខែកក្កដា មានទេសចរប្រមាណ ២០ទៅ២៥%បានលុបចោលដំណើរមកកាន់រដ្ឋធានីប៉ារីស (កក់សណ្ឋាគារ)។ ចំណែកខាងភោជនីដ្ឋាននិងបាអាហារដ្ឋានរង្គសាលពេលរាត្រី វិញ ការខាតបង់អស់ឡើងដល់ជាង៥០% ក្នុងមួយចុងសប្តាហ៍កន្លងទៅ។ នេះបើតាមការប៉ាន់ស្មានរបស់ប្រធានសហព័ន្ធសហជីពសណ្ឋាគារតំបន់Ile de France (ក្រុងនិងជុំវិញក្រុងប៉ារីស) ដែលទាមទារឱ្យរដ្ឋាភិបាលចាត់វិធានការជួយសងការខាតបង់នេះ និងយល់ថា រូបភាពប្រទេសបារាំង ជាពិសេសប៉ារីស បានធ្លាក់ស្រអាប់ខ្លាំងណាស់។
ទិដ្ឋភាពហិង្សា ការបិទបណ្តាញដឹកជញ្ជូនសាធារណៈតាំងពីព្រលប់ លុបកម្មវិធីសិល្បៈផ្សេងៗ ពិតជាប៉ះពាល់ខ្លាំងដល់វិស័យទេសចរណ៍ និងជំរុញឱ្យទេសចរបរទេសបោះបង់គម្រោងមកទស្សនាប្រទេសបារាំងមែនឬ ? មែន ! សម្រាប់ពេលខ្លីចំពោះមុខភ្លាមៗ។ នេះបើតាមការវិភាគរបស់ស្ថាបនិកនៃការិយាល័យជំនាញទេសចរណ៍លោក Guy Raffour។ រាល់គ្រប់ហេតុការណ៍ហិង្សាដែលផ្ទុះឡើង តែងតែជះផលប៉ះពាល់តិចឬច្រើនជាស្វ័យប្រវត្តិដល់វិស័យទេសចរណ៍ មិនថាជាបាតុកម្មប្រឆាំងនឹងកំណែទម្រង់ច្បាប់សោធនវិត្តន៍ បាតុកម្មត្រាំត្រែងរៀងរាល់ថ្ងៃសៅរ៍របស់ក្រុមអាវកាក់លឿងកាលពីឆ្នាំ២០១៨ ឬភេរវកម្មកណ្តាលរដ្ឋធានីកាលពីថ្ងៃទី ១៣វិច្ឆិកា២០១៥ និងកុប្បកម្មហិង្សារបស់ក្រុមយុវជនកាលពីឆ្នាំ២០០៥ដែលបណ្តាលមកពីការស្លាប់របស់ក្មេងពីរនាក់។ កាលណោះ ទេសចរ៣០%បានលុបឬលើកពេលមកលេងប៉ារីស។ ហើយលើកនេះក៏មិនខុសពីលើកមុនៗដែរ។ ហេតុដូច្នេះហើយបានជាអ្នករកស៊ីផ្នែកសណ្ឋាគារ អត់ព្រួយមិនបាន។
សាលាក្រុងប៉ារីស បានទទួលស្គាល់ថាវិស័យទេសចរណ៍មានហេតុផលដែលត្រូវព្រួយបារម្ភ តែក្រុមប្រឹក្សារដ្ឋធានីប៉ារីស ទើបបានបោះឆ្នោតនៅថ្ងៃអង្គារបើកមូលនិធិពិសេសសម្រាប់ជួយពាណិជ្ជករហើយ។ ហើយម្យ៉ាងទៀត ទោះបីវិបត្តិបានរំខានដំណើរកំសាន្តរបស់ទេសចរខ្លះដែលបានមកដល់ប៉ារីសហើយ និងបានចោទជាកង្វល់ដល់អ្នករៀបនឹងមកប៉ារីសមែន ប៉ុន្តែបារាំងជាប្រទេសទេសចរណ៍ពិតៗ។ តាំងពីចូលឆ្នាំ២០២៣មក បារាំង ប្រឈមនឹងបាតុកម្មហិង្សាប្រឆាំងនឹងកំណែទម្រង់ច្បាប់សោធននិវត្តន៍ផង ឥលូវអំពើកុប្បកម្មហិង្សារបស់ក្មេងជំទង់ទៀត តែតួលេខទេសចរណ៍ឡើងខ្ពស់ត្រដែតណាស់ទាំងសម្រាប់ប៉ារីស និងប្រទេសបារាំងទាំងមូល។ ចំនួនទេសចរសម្រាប់៦ខែដើមឆ្នាំ២០២៣ ដូចគ្នាឆមាសទីមួយនៃឆ្នាំ២០១៩ ពោលគឺ ចំនួនទេសចរណ៍ឡើងស្មើនឹងសម័យមុនកូវីដទៅហើយ។ ដូច្នេះគ្មានអ្វីដែលត្រូវប្រញាប់ស្រែកអាសន្នទេ។
ទាំងអ្នកជំនាញផ្នែកប្រឹក្សាទេសចរណ៍ក៏ដូចជាអាជ្ញាធរក្រុងប៉ារីស សុទ្ធតែប្រឹងសម្រួលស្ថានការណ៍ដោយពន្យល់ថាបើមើលពីចម្ងាយ ឃើញតែព័ត៌មានវិលឥតឈប់នៃអំពើហិង្សា គេត្រូវតែព្រួយបារម្ភហើយ ដូច្នេះភ្នាក់ងារទេសចរណ៍បារាំងត្រូវចេះពន្យល់ភ្ញៀវបរទេសវិញ។ អំពើហិង្សាមិនកើតទូទាំងប្រទេស និងគ្រប់ទីក្រុងឯណា ! ទេសចរអាមេរិកឬជប៉ុនជាភ្ញៀវមកពីឆ្ងាយនិងតែងចំណាយច្រើននៅក្នុងប្រទេសបារាំង តែក៏អ្នកភ័យខ្លាចខ្លាំងជាងគេរឿងអសន្តិសុខ និងងាយទទួលឥទ្ធិពលពីការផ្សព្វផ្សាយព័ត៌មានស្តីពីស្ថានភាពនៅប្រទេសបារាំង។ តែ៨០%នៃទេសចរមកលេងបារាំង ជាអឺរ៉ុប នៅជិតឬជាប់របងបារាំង ហើយយល់ពីចិត្តនិងស្គាល់ប្រវត្តិសាស្ត្របារាំងជាង ដឹងថា ថ្ងៃបុណ្យជាតិបារាំងជាថ្ងៃពលរដ្ឋងើបធ្វើកុប្បកម្មបះបោរធ្វើបដិវត្ត និងមានកូដកម្ម បាតុកម្ម ជាញឹកញយ ស្ទើរក្លាយជាប្រពៃណីមួយរបស់បារាំងទៅហើយ។
តែអ្នកជំនាញ អ្នកវិភាគ និងអ្នកមានអាជីពក្នុងវិស័យទេសចរណ៍ សុទ្ធតែគិតនិងយល់ស្របគ្នាថា ព្រឹត្តិការណ៍កីឡាខ្នាតអន្តរជាតិ នៅចុងឆ្នាំ២០២៣ (ការប្រកួតបាល់Rugbyពិភពលោកខែកញ្ញា) និងការប្រកួតកីឡាអូឡាំពិកឆ្នាំ២០២៤ នឹងស្រូបទាក់ទេសចរបរទេស បានយ៉ាងច្រើនមកវិញជាក់ជាពុំខាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ