តំណាងអយ្យការចោទប្រកាន់ជនពិការម្នាក់ពីបទញុះញង់ ក្រោយរិះគន់រដ្ឋាភិបាល
តំណាងអយ្យការអមសាលាដំបូងខេត្តតាកែវ សម្រេចចោទប្រកាន់ លោក ភុន យុទ្ធ អ្នកគាំទ្របក្សឆាំងពីបទញុះញង់ឱ្យមានការរើសអើង។ ការចោទប្រកាន់នេះធ្វើឡើង បន្ទាប់ពីសមត្ថកិច្ចខេត្តតាកែវ កាលពីថ្ងៃទី១៩ ខែមីនា បានចាប់ខ្លួនជនពិការរូបនេះ ក្រោយពីបង្ហោះសារនៅលើបណ្តាញសង្គម ក្នុងន័យ រិះគន់រដ្ឋាភិបាលកម្ពុជា។ បច្ចុប្បន្នជនមានពិការភាពរូបនេះ កំពុងស្ថិតក្នុងដំណាក់កាលឃុំខ្លួនបណ្តោះអាសន្ន រងចាំការបើកសវនាការ។
ចុះផ្សាយនៅថ្ងៃ៖
ស្តាប់ - ០២:៤៧
លោក ទៀវ ពណ្ណរាយ ព្រះរាជអាជ្ញារងនៃអយ្យការអមសាលាដំបូងខេត្តតាកែវ បានអះអាងប្រាប់វិទ្យុបារាំងអន្តរជាតិRFIថា ការដែលសមត្ថកិច្ចចាប់ខ្លួនឈ្មោះ ភុន យុទ្ធ ដោយគ្មានដីកា គឺដោយសារតែព្រះរាជអាជ្ញាពិនិត្យឃើញថាជា បទល្មើសជាក់ស្តែង។ បទល្មើសជាក់ស្តែងដែលព្រះរាជអាជ្ញាយោងទៅលើការសរសេររិះគន់ដោយប្រើប្រាស់ពាក្យមិនគប្បីមកលើរដ្ឋាភិបាលកម្ពុជាជាច្រើនលើកច្រើនសារនៅតាមបណ្តាញសង្គមហ្វេសប៊ុក ខណៈសមត្ថកិច្ចធ្លាប់ហៅបុគ្គលរូបនេះមកធ្វើកិច្ចសន្យាចំនួន២លើករួចមកហើយ។
តាមលោក ពណ្ណ រាយ សមត្ថកិច្ចកំពុងឃុំខ្លួនលោក ភុន យុទ្ធបណ្តោះអាសន្ន និងកំពុងកសាងសំណុំរឿងបញ្ចូលទៅតុលាការដើម្បីចាត់ការបន្តតាមនីតិវិធីច្បាប់ ក្រោមការចោទប្រកាន់ពីបទញុះញង់ឱ្យមានការរើសអើង។
ជុំវិញរឿងនេះ លោក អំ សំអាត នាយកគ្រប់គ្រងកម្មវិធីនៃអង្គការលីកាដូយល់ថា នេះជាការរឹតត្បិតសិទ្ធិសេរីភាពក្នុងការបញ្ចេញមតិរបស់ពលរដ្ឋ។ សម្រាប់លោក អំ សំអាត លោកមិនគិតថា លោក ភុន យុទ្ធមានគំនិតទៅបង្កឱ្យការរើសអើងដល់បុគ្គល និងជាតិសាសន៍ណាមួយឡើយ ពោលគឺរាល់ការរិះគន់របស់លោកកន្លងមក គឺដើម្បីកែលម្អស្ថាបនាសម្រាប់ផលប្រយោជន៍ជាតិ។
ដោយយល់ថា ការចាប់ខ្លួនលោក ភុន យុទ្ធមិនសមហេតុផល មន្ត្រីសិទ្ធិមនុស្សរូបនេះទទូចឱ្យតុលាការកាត់សេចក្តីប្រកបដោយយុត្តិធម៌ និងឈរលើតម្លាភាព ខណៈលោកក៏ស្នើឱ្យតុលាការដោះលែងលោក ភុន យុទ្ធឱ្យមានសេរីភាពឡើងវិញផង។
សូមជម្រាបថា នេះជាលើកទី២ហើយ ដែលលោក ភុន យុទ្ធត្រូវបានសមត្ថកិច្ចចាប់ឃាត់ខ្លួន និងដាក់ពន្ធនាគារ។ ជាក់ស្តែង កាលពីចុងខែតុលា ឆ្នាំ២០១៩ តុលាការខេត្តសៀមរាបបានផ្តន្ទាទោសលោក ភុន យុទ្ធ ឱ្យជាប់ពន្ធនាគារ១៨ខែ ពីបទញុះញង់ឱ្យមានការរើសអើង និងជេរប្រមាថជាសាធារណៈ។ កាលណោះ លោក ភុន យុទ្ធ បានប្រើគណនេយ្យហ្វេសប៊ុកឈ្មោះ "ខ្ញុំចង់បាននាយករដ្ឋមន្ត្រីថ្មី "និយាយរិះគន់អំពីចំណុចអវិជ្ជមាន របបដឹកនាំសព្វថ្ងៃ និងទាមទារឲ្យលោកហ៊ុន សែន ចុះចេញពីតំណែង។
ដោយឡែកលើកទី២នេះ សមត្ថកិច្ចខេត្តតាកែវកាលពីល្ងាចថ្ងៃទី១៩ ខែមីនា បានចូលទៅចាប់ខ្លួនលោកនៅក្នុងផ្ទះស្ថិតនៅភូមិត្រពាំងឈូក ឃុំត្រឡាច ស្រុកទ្រាំង ខេត្តតាកែវ ក្រោមបទចោទដូចគ្នា។ ប៉ុន្តែសំណុំរឿងរបស់លោក តុលាការនៅមិនទាន់សម្រេចកាត់ទោសបែបណានៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ