នាយករដ្ឋមន្រ្តីថ្មីរបស់ឥណ្ឌាសន្យាពង្រឹងទំនាក់ទំនងជាមួយចិន
លោក ណារិនដ្រា ម៉ូឌី (Narendra Modi) នាយករដ្ឋមន្រ្តីថ្មីរបស់ឥណ្ឌា បានប្រកាសសន្យាថា រដ្ឋាភិបាលរបស់លោកនឹងខិតខំពង្រឹងទំនាក់ទំនងជាមួយប្រទេសចិន ដើម្បីអភិវឌ្ឍភាពជាដៃគូយុទ្ធសាស្រ្តនឹងគ្នា។ ការសន្យានេះត្រូវបានធ្វើឡើង នៅថ្ងៃចន្ទ មុនពេលដែលលោកម៉ូឌី ត្រូវទទួលជួបរដ្ឋមន្រ្តីក្រសួងការបរទេសចិន នៅទីក្រុងញូវដេលី។
ចុះផ្សាយនៅថ្ងៃ៖ កែប្រែថ្ងៃទី៖
នៅក្នុងសារទៅកាន់សភាឥណ្ឌានៅថ្ងៃចន្ទ លោកណារិនដ្រា ម៉ូឌី បានលើកឡើងថា ឥណ្ឌាចង់មានទំនាក់ទំនងល្អ និងប្រកបដោយសុខសន្តិភាពជាមួយគ្រប់ប្រទេសទាំងអស់ ក៏ប៉ុន្តែ ឥណ្ឌាក៏នឹងមិនគេចវេសពីការប្រឈមមុខដាក់គ្នានោះដែរ ប្រសិនបើមានការចាំបាច់។ លោកម៉ូឌី ដែលទើបនឹងបានជាប់ឆ្នោតជានាយករដ្ឋមន្រ្តីឥណ្ឌា ក៏បានលើកឡើងចំៗ អំពីចិនផងដែរ ដោយសន្យាថានឹងខិតខំប្រឹងប្រែង ដើម្បីអភិវឌ្ឍភាពជាដៃគូយុទ្ធសាស្រ្ត រវាងឥណ្ឌា និងចិន។
គួរបញ្ជាក់ថា ទំនាក់ទំនង រវាងឥណ្ឌា និងចិន បានឆ្លងកាត់នូវភាពតានតឹងច្រើន នៅក្នុងរយៈពេលប៉ុន្មានទសវត្សរ៍កន្លងទៅនេះ។ តានតឹង ដោយសារតែចិនគាំទ្រប៉ាគីស្ថាន ដែលជាគូសត្រូវរបស់ឥណ្ឌាផង និងដោយសារតែមានជម្លោះព្រំដែនគោក រវាងចិន និងឥណ្ឌា នៅតំបន់ជួរភ្នំហិមាល័យនោះផង។
កាលពីខែកុម្ភៈ នៅក្នុងអំឡុងយុទ្ធនាឃោសនាបោះឆ្នោត លោកម៉ូឌីបានរិះគន់នូវអ្វីដែលលោកចាត់ទុកថាជា “ផ្នត់គំនិតបែបវាតទីនិយមរបស់ចិន”។ ក៏ប៉ុន្តែ ក្រោយពីបានជាប់ឆ្នោត លោកម៉ូឌីបានបន្ទន់ជំហរមកវិញយ៉ាងច្រើនចំពោះចិន ដោយបានអញ្ជើញលោកប្រធានាធិបតីចិន ស៊ី ជីនពីង ឲ្យមកបំពេញទស្សនកិច្ច នៅឥណ្ឌា នៅចុងឆ្នាំនេះ។
ជាទូទៅ គេសង្កេតឃើញថា លោកនាយករដ្ឋមន្រ្តី ណារិនដ្រា ម៉ូឌី ថ្វីដ្បិតតែមានជំហរជាតិនិយមខ្លាំង ក៏ប៉ុន្តែ ជារឿយៗ លោកក៏តែងតែលើកសរសើរផងដែរ ចំពោះការអភិវឌ្ឍសេដ្ឋកិច្ចរបស់ចិន នៅក្នុងរយៈពេលមួយទសវត្សរ៍ចុងក្រោយនេះ។
ក្នុងឋានៈជាប្រមុខរដ្ឋាភិបាលឥណ្ឌា លោកម៉ូឌី នឹងត្រូវប្រឈមមុខនឹងកិច្ចការដ៏ស្មុគស្មាញ រវាងម្ខាងត្រូវទប់ទល់នឹងចិន ដែលចេះតែបង្កើនកម្លាំងទ័ពឥតឈប់ ហើយកំពុងតែបង្ហាញនូវភាពតឹងរ៉ឹងចំពោះនយោបាយការបរទេស និងការពារជាតិ ចំណែកម្ខាងទៀត ត្រូវពង្រឹងទំនាក់ទំនងខាងផ្នែកសេដ្ឋកិច្ច រវាងឥណ្ឌា និងចិន។
គួរបញ្ជាក់ផងដែរថា ចិន គឺជាដៃគូពាណិជ្ជកម្មដ៏ធំលំដាប់ទីមួយរបស់ឥណ្ឌា។ ការដោះដូរពាណិជ្ជកម្មរវាងប្រទេសទាំងពីរ មានទំហំជាទឹកប្រាក់រហូតដល់ទៅជិត ៧០ពាន់លានដុល្លារ ក្នុងមួយឆ្នាំៗ។ ក៏ប៉ុន្តែ លំនឹងនៃជញ្ជីងពាណិជ្ជកម្មនេះផ្អៀងខ្លាំងទៅខាងចិន ដោយឥណ្ឌានាំទំនិញពីចិន ច្រើនជាងការនាំចេញទៅចិន រហូតដល់ទៅជាង ៤០ពាន់លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ