លោក ហោ ណាំហុង៖ ពិភពលោកកំពុងស្ថិតនៅលើចំណុចប្រកបដោយគ្រោះថ្នាក់
នៅក្នុងសុន្ទរកថាថ្លែងទៅកាន់អង្គប្រជុំលើកទី៦៩នៃមហាសន្និបាតអង្គការសហប្រជាជាតិនៅទីក្រុងញូវយ៉កកាលពីថ្ងៃទី២៩កញ្ញា លោក ហោ ណាំហុង រដ្ឋមន្ត្រីការបរទេសកម្ពុជាបានកត់សម្គាល់ដោយការព្រួយបារម្ភថា ពិភពលោកបច្ចុប្បន្នកំពុងស្ថិតនៅលើចំណុចប្រកបដោយគ្រោះថ្នាក់។ គ្រោះថ្នាក់ដោយជម្លោះប្រដាប់អាវុធ អំពើឧក្រិដ្ឋកម្ម ជំងឺកាចសាហាវ និងការប្រែប្រួលអាកាសធាតុជាដើម។
ចុះផ្សាយនៅថ្ងៃ៖
ពិភពលោកបច្ចុប្បន្នកំពុងស្ថិតនៅលើចំណុចប្រកបដោយគ្រោះថ្នាក់និងមានបរិយាកាសអាប់អួរកាន់តែខ្លាំង។ នេះគឺជាការកត់សម្គាល់ជាបឋមរបស់លោក ហោ ណាំហុង រដ្ឋមន្ត្រីការបរទេសកម្ពុជាទៅកាន់មហាសន្និបាតអង្គការសហប្រជាជាតិ។ លោកហោ ណាំហុងបន្តថា សហគមន៍អន្តរជាតិមានក្តីព្រួយបារម្ភកាន់តែខ្លាំងចំពោះបញ្ហាសន្តិសុខ និងភូមិសាស្ត្រនយោបាយនៅតំបន់ជាច្រើនក្នុងពិភពលោក។
នៅក្នុងសុន្ទរកថាប្រវែង៥ទំព័រ ប្រមុខការទូតខ្មែរ បានផ្តើមលើកឡើងមុនគេអំពីរដ្ឋអ៊ីស្លាម (ISIS) ដែលបានប្រកាសខ្លួននៅក្នុងប្រទេសអ៊ីរ៉ាក់និងស៊ីរី។ លោកកត់សម្គាល់ថា អំពើឧក្រិដ្ឋគួរឲ្យស្អប់ខ្ពើមរបស់ពួកគេបានកំរាមកំហែងយ៉ាងខ្លាំងដល់សន្តិភាព សន្តិសុខ និងស្ថិរភាពក្នុងបណ្តាប្រទេសទាំងនោះ។ លោក ហោ ណាំហុងក៏បានលើកឡើងអំពីជម្លោះប្រដាប់អាវុធក្នុងប្រទេសស៊ីរី និងបណ្តាប្រទេសនៅអាហ្វ្រិកកណ្តាលដែលបណ្តាលឲ្យជនស្លូតត្រង់ និងកុមារជាច្រើនបាត់បង់ជីវិត និងបាននាំឲ្យមានជនភៀសខ្លួនជាច្រើន។
មកដល់ចំណុចនេះ លោករដ្ឋមន្ត្រីមិនភ្លេចលើកឡើងអំពីការចូលរួមចំណែករបស់កម្ពុជាក្នុងប្រតិបត្តិការរក្សាសន្តិភាពនៅមជ្ឈឹមបូព៌ា និងនៅអាហ្វ្រិក តាមរយៈការបញ្ជូនកងរក្សាសន្តិភាពក្រោមឆ័ត្រអង្គការសហប្រជាជាតិចំនួនជាង ២០០០ នាក់ទៅកាន់ប្រទេសលីបង់ ម៉ាលី និងស៊ូដង់ខាងត្បូង។ កម្ពុជាក៏កំពុងត្រៀមបញ្ជូនកងរក្សាសន្តិភាពមួយក្រុមទៀតទៅកាន់អាហ្វ្រិកកណ្តាលនៅក្នុងខែវិច្ឆិកាខាងមុខនេះ។ ក្រៅពីជម្លោះប្រដាប់អាវុធ ជំងឺអេបូឡា ក៏កំពុងក្លាយជាបញ្ហាប្រឈមដ៏ធំមួយទៀតរបស់ពិភពលោក។
នៅក្នុងសុន្ទរថាទៅកាន់មហាសន្និបាតអង្គការសហប្រជាជាតិដដែល លោក ហោ ណាំងហុងក៏បានលើកឡើងអំពីការប្រែប្រួលអាកាសធាតុផងដែរ។ ការប្រែប្រួលអាកាសធាតុដែលកំពុងគំរាមកំហែងពិភពលោកទាំងមូលក្នុងនោះកម្ពុជាក៏បានរងគ្រោះធ្ងន់ធ្ងរដែរ។ ជាក់ស្តែងទឹកជំនន់ក្នុងឆ្នាំ ២០១៣ បានធ្វើឲ្យពលរដ្ឋខ្មែរស្លាប់ ១៦៨ នាក់ បង្កការខូចខាតមួយពាន់លានដុល្លារ និងធ្វើឲ្យមនុស្សជិតពីរលាននាក់រងផលប៉ះពាល់។
នៅចុងបញ្ចប់នៃសុន្ទរកថារបស់ខ្លួន ប្រមុខការទូតខ្មែរក៏បានអំពាវនាវឲ្យមានកំណែទម្រង់អង្គការសហប្រជាជាតិដោយធ្វើយ៉ាងណាឲ្យអង្គការពិភពលោកនេះមានតំណាងប្រកបដោយសមធម៌នៅក្នុងស្ថាប័នរបស់ខ្លួនដើម្បីដោះស្រាយបញ្ហាប្រឈមរបស់ពិភពលោកឲ្យកាន់តែមានប្រសិទ្ធភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ