អាជ្ញាធរអនុញ្ញាតឲ្យសមាគមគ្រូបង្រៀន ជួបជុំប្រារព្ធទិវាគ្រូបង្រៀន ថ្ងៃ៥តុលា នៅទីលានប្រជាធិបតេយ្យ
តាមរយៈកិច្ចប្រជុំនាព្រឹកថ្ងៃទី៣០កញ្ញានេះ អាជ្ញាធរសាលារាជធានីភ្នំពេញ បានអនុញ្ញាតឲ្យសមាគមគ្រូបង្រៀនរបស់លោករ៉ុងឈុន ជួបជុំ ប្រារព្ធទិវាគ្រូបង្រៀនពិភពលោក ថ្ងៃ៥តុលា នាព្រឹកថ្ងៃអាទិត្យនេះ នៅទីលានប្រជាធិបតេយ្យ។ ប៉ុន្តែអាជ្ញាធរ តម្រូវឲ្យសមាគមគ្រូបង្រៀន ចាត់តំណាងត្រឹមតែ ៣០ ទៅ ៤០ នាក់ ដើម្បីដាក់ញត្តិ នៅក្រសួងអប់រំ និងនៅខុទ្ទកាល័យ នាយករដ្ឋមន្ត្រី ខណៈដែលក្រុមគ្រូបង្រៀន ទាមទារឲ្យអ្នកចូលរួមពិធីជួបជុំប្រមាណ ៥០០ ទៅ ៦០០ នាក់ ដើរហែក្បួន ដាក់ញត្តិ។
ចុះផ្សាយនៅថ្ងៃ៖
ស្តាប់ - ០១:៥៥
ទិវាគ្រូបង្រៀនពិភពលោក ថ្ងៃ៥តុលា ត្រូវនឹងថ្ងៃអាទិត្យខាងមុខ សមាគមគ្រូបង្រៀនកម្ពុជាឯករាជ្យ នឹងរៀបចំប្រារព្ធពិធីជួបជុំ នៅទីលានប្រជាធិបតេយ្យ ក្រោមប្រធានបទ "ការលើកកម្ពស់គុណភាពអប់រំ"។ ក្នុងពិធីជួបជុំនោះ សមាគមគ្រូបង្រៀនរបស់លោករ៉ុងឈុន បានប្រកាសទាមទារឲ្យរដ្ឋាភិបាល តម្លើងប្រាក់ខែគ្រូបង្រៀនអប្បបរមា ១ លានរៀល ក្នុងមួយខែ។
លោក រ៉ុង ឈុន ក៏បានជំរុញឲ្យរាជរដ្ឋាភិបាល យកចិត្តទុកដាក់ ចំពោះតួនាទីដ៏សំខាន់របស់គ្រូបង្រៀន និងការលើកកម្ពស់គុណភាពនៃវិស័យអប់រំ។ ការលើកកម្ពស់វិស័យអប់រំ ដែលតាមលោករ៉ុងឈុន អាទិភាពដំបូង គឺរដ្ឋាភិបាល ត្រូវតម្លើងប្រាក់ខែគ្រូបង្រៀន។
ចំពោះគម្រោងជួបជុំប្រារព្ធទិវាគ្រូបង្រៀនពិភពលោក ថ្ងៃ៥តុលា គឺអាជ្ញាធររាជធានីភ្នំពេញ ដឹកនាំដោយលោកឃួងស្រេង អភិបាលរង បានជួបប្រជុំជាមួយតំណាងសមាគមគ្រូបង្រៀននាព្រឹកថ្ងៃទី៣០កញ្ញានេះ។ អាជ្ញាធរ បានយល់ព្រមឲ្យមានការជួបជុំនៅទីលានប្រជាធិបតេយ្យ។ ប៉ុន្តែអាជ្ញាធរ តម្រូវឲ្យតំណាងគ្រូបង្រៀនតែ ៣០ ទៅ ៤០ នាក់ ទៅដាក់ញត្តិ នៅក្រសួងអប់រំ និងខុទ្ទកាល័យនាយករដ្ឋមន្ត្រី។
ប៉ុន្តែលោករ៉ុងឈុន បានបញ្ជាក់ថា សមាគមគ្រូបង្រៀន ចង់ឲ្យគ្រូបង្រៀន ដែលមកចូលរួមពិធីជួបជុំ នៅទីលានប្រជាធិបតេយ្យ ដើរហែក្បួនទាំង ៥០០ ទៅ ៦០០ នាក់នោះ។
យ៉ាងណាក៏ដោយ លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ ឲ្យដឹងថា អាជ្ញាធររាជធានីភ្នំពេញ នឹងសុំគោលការណ៍ពីក្រសួងមហាផ្ទៃ ចំពោះគម្រោងជួបជុំរបស់គ្រូបង្រៀន នាថ្ងៃអាទិត្យ ទី៥តុលា នៅទីលានប្រជាធិបតេយ្យ។
ជុំវិញប្រាក់ខែគ្រូបង្រៀន ត្រូវបានលោកនាយករដ្ឋមន្ត្រី ហ៊ុន សែន ប្រកាសកាលពីថ្ងៃទី២៥កញ្ញាថា គ្រូបង្រៀន ជាង ១១ ម៉ឺននាក់ ដែលសព្វថ្ងៃ មន្ត្រីការិយាល័យនៅតាមសាលា ទាបបំផុត ៤២៤.០០០ រៀលនោះ នៅក្នុងខែកញ្ញានេះ នឹងឡើងដល់ ៥០៥.០០០ រៀល ហើយចាប់ពីខែមករា ប្រាក់ខែគ្រូបង្រៀន នឹងឡើងជាបន្តបន្ទាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ