រដ្ឋាភិបាល៖ការទទួលជនភៀសខ្លួនអូស្ត្រាលី ធ្វើឡើងដោយគោលការណ៍ស្ម័គ្រចិត្តស្របតាមច្បាប់អន្តរជាតិ
ក្រោយពីមានប្រតិកម្មជាបន្តបន្ទាប់រួចមក គឺនៅព្រឹកថ្ងៃចន្ទ ទី២៩កញ្ញានេះ ប្រមុខរដ្ឋាភិបាល និងមន្ត្រីជាន់ខ្ពស់រដ្ឋាភិបាលកម្ពុជា ទទួលបន្ទុកកិច្ចការជនភៀសខ្លួន បានចេញមុខ បកស្រាយ និងធ្វើសន្និសីទកាសែត។ នោះគឺរដ្ឋាភិបាលកម្ពុជា ព្រមព្រៀងទទួលយកជនភៀសខ្លួន ពីប្រទេសអូស្ត្រាលី មករស់នៅកម្ពុជា ត្រូវធ្វើឡើងតាមគោលការណ៍ស្ម័គ្រចិត្ត ស្របតាមច្បាប់ និងអនុសញ្ញាអន្តរជាតិ ដែលកម្ពុជា ជាហត្ថលេខី។ ចំពោះចំនួន ពេលវេលា និងទីកន្លែងរស់នៅរបស់ជនភៀសខ្លួនទាំងនោះ មិនត្រូវបានមន្ត្រីជាន់ខ្ពស់កម្ពុជា ប្រកាសនៅឡើយទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:២២
ការសម្រេចរបស់រាជរដ្ឋាភិបាលកម្ពុជា ក្នុងការទទួលយកជនភៀសខ្លួន ពីប្រទេសអូស្ត្រាលី ឲ្យមករស់នៅក្នុងប្រទេសកម្ពុជា គឺធ្វើឡើងតាមកាតព្វកិច្ច ដែលកំណត់ក្នុងអនុសញ្ញាអន្តរជាតិ ព្រមទាំងស្របតាមច្បាប់។ មួយវិញទៀត ការបញ្ជូន និងការទទួលយកជនភៀសខ្លួនទាំងនោះ ក៏ត្រូវធ្វើឡើងតាមគោលការណ៍ស្ម័គ្រចិត្ត គឺស្ម័គ្រចិត្តទាំងជនភៀសខ្លួន និងស្ម័គ្រចិត្តទាំងកម្ពុជា ដែលជាអ្នកទទួល។ ទាំងនេះ គឺជាការអះអាងផ្ទាល់មាត់ នៅព្រឹកថ្ងៃចន្ទនេះ របស់លោកនាយករដ្ឋមន្ត្រី ហ៊ុន សែន និងមន្ត្រីជាន់ខ្ពស់រាជរដ្ឋាភិបាល ទទួលបន្ទុកកិច្ចការជនអន្តោប្រវេសន៍។
លោកនាយករដ្ឋមន្ត្រី បានប្រកាសដូច្នេះ នៅក្នុងពិធីចែកសញ្ញាប័ត្រដល់និស្សិតបញ្ចប់ការសិក្សា នៅកោះពេជ្រ នាព្រឹកថ្ងៃចន្ទ។ រីឯមន្ត្រីជាន់ខ្ពស់រដ្ឋាភិបាលមួយក្រុម បានធ្វើសន្និសីទកាសែត នៅក្រសួងមហាផ្ទៃ។
ក្នុងសន្និសីទកាសែត លោក ឡុង វិសាលោ រដ្ឋលេខាធិការក្រសួងការបរទេស និងជាប្រធានក្រុមការងាររបស់រដ្ឋាភិបាល ទទួលបន្ទុកជនភៀសខ្លួនពីប្រទេសអូស្ត្រាលី មិនបានបញ្ជាក់ពីពេលវេលា ចំនួន និងទីតាំងសម្រាប់ជនភៀសខ្លួន រស់នៅក្នុងប្រទេសកម្ពុជាទេ។ តែលោក បានអះអាងថា នៅពេលមកដល់ដំបូង ជនភៀសខ្លួនទាំងនោះ អាចរស់នៅក្នុងជំរុំបណ្តោះអាសន្ន នៅភ្នំពេញ មុននឹងបញ្ជូនទៅកាន់មណ្ឌលរស់នៅ នៅក្រៅរាជធានីភ្នំពេញ។ ក្នុងជំរុំបណ្តោះអាសន្ន នៅភ្នំពេញ កម្ពុជាត្រូវតាមដានពីសុខភាព និងព័ត៌មានផ្ទាល់ខ្លួន ដើម្បីធានាថា ជនភៀសខ្លួនទាំងនោះ មិនមានជំងឺប្លែកៗ ដូចជា អេបូឡា និងមិនមែនជាភេរវករ ជាដើម។
លោកឡុងវិសាលោ បានបន្ថែមថា ពេលនេះ រដ្ឋាភិបាលកំពុងរៀបចំឯកសារ មុននឹងបញ្ជូនមន្ត្រី ទៅកាន់ប្រទេសអូស្ត្រាលី ទៅជំរុំ ណេរុ ដើម្បីពន្យល់ជនភៀសខ្លួន អំពីស្ថានភាព នៅកម្ពុជា។ កម្ពុជា ដែលតាមលោក ឡុង វិសាលោ មានលទ្ធភាពទទួលយកជនភៀសខ្លួន ក្នុងសកម្មភាពមនុស្សធម៌ផង និងជាកាតព្វកិច្ចអន្តរជាតិផង ព្រមទាំងបង្ហាញពីកិត្យានុភាព មុខមាត់កម្ពុជាលើឆាកអន្តរជាតិ ដូចអ្វីដែលកម្ពុជាបានបញ្ជូនកងទ័ព ទៅចូលរួមបេសកកម្មមួកខៀវ របស់អង្គការសហប្រជាជាតិ។
តាមមន្ត្រីដដែល អនុស្សារណៈយោគយល់គ្នា ដែលរដ្ឋមន្ត្រីមហាផ្ទៃកម្ពុជា និងរដ្ឋមន្ត្រីអន្តោប្រវេសន៍អូស្ត្រាលី បានចុះហត្ថលេខា កាលពីថ្ងៃសុក្រ ទី២៦កញ្ញា មានសុពលភាពរយៈពេល ៤ ឆ្នាំ ហើយភាគីទាំងពីរ អាចកែប្រែ ឬរំលាយកិច្ចព្រមព្រៀងនោះបាន ដោយជូនដំណឹងមុន ៦ ខែ។ ក្នុងនោះ ជនអន្តោប្រវេសន៍មកពីប្រទេសអូស្ត្រាលី អាចមករស់នៅ ១ ឆ្នាំ នៅកម្ពុជា ក្រោមការទំនុកបំរុងពីរដ្ឋាភិបាលកម្ពុជា និងអូស្ត្រាលី មុននឹងសម្រេចចិត្ត ចាកចេញ ឬរស់នៅបន្តនៅកម្ពុជា។
ដោយច្រានចោលប្រតិកម្មរិះគន់ពាក់ព័ន្ធនឹងកិច្ចព្រមព្រៀងទទួលយកជនភៀសខ្លួនពីប្រទេសអូស្ត្រាលី មន្ត្រីជាន់ខ្ពស់កម្ពុជា បានគូសបញ្ជាក់ថា កិច្ចព្រមព្រៀងពេលនេះ មិនមែនជារឿងថ្មីទេ សម្រាប់កម្ពុជា។ ពោលគឺកម្ពុជា គិតមកដល់ពេលនេះ បានទទួលជនភៀសខ្លួន និងជនសុំសិទ្ធិជ្រកកោន ៩១ នាក់ មកពី ៨ ប្រទេស រស់នៅស្របច្បាប់ រួមមាន ភូមា វៀតណាម ថៃ ប៉ាគីស្ថាន សិរីលង្កា អ៊ីរ៉ាក់ ប៉ាឡេស្ទីន និងឥណ្ឌា។
មន្ត្រីរដ្ឋាភិបាលកម្ពុជា ក៏បានបដិសេធថា ការសម្រេចទទួលយកជនភៀសខ្លួនអូស្ត្រាលី មករស់នៅកម្ពុជា ពេលនេះ មិនមែនជាថ្នូរនឹងលុយ ៣៥ លានដុល្លារអាមេរិកទេ។ តែលុយ ៣៥ លានដុល្លារនោះ ត្រូវបានអូស្ត្រាលី បន្ថែមលើគម្រោងជំនួយអភិវឌ្ឍន៍ប្រចាំឆ្នាំ សម្រាប់ជួយកម្ពុជា លើកំណែទម្រង់បោះឆ្នោត ផលិតកម្មស្រូវអង្ករ និងការដោះមីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ