កម្មកររាប់ពាន់នាក់ផ្ទុះកូដកម្មទាមទារប្រាក់អតីតភាពការងារ!
កម្មកររោងចក្រ Grand Twin រាប់ពាន់នាក់បាននាំគ្នាផ្ទុះធ្វើបាតុកម្មដោយបិទកំណាត់ផ្លូវជាតិលេខ៤ ត្រង់ផ្តុំវត្តជម្ពូវ័ន ក្នុងសង្កាត់ចោមចៅ ប្រមាណជា ២ម៉ោង នៅព្រឹកថ្ងៃទី ២៤ តុលានេះ ដោយទាមទារឲ្យចៅកែរោងចក្រផ្តល់ប្រាក់អតីតភាពការងារ បន្ទាប់ពីក្រុមហ៊ុន Grand Twin បានប្តូរឈ្មោះមកពីក្រុមហ៊ុន QMI។ ជាមួយគ្នានេះដែរ កម្មកររោងចក្រចៀន ឡឹ ជាង ៤០០ នាក់ ក៏បានមកប្រមូលផ្តុំគ្នានៅខាងមុខក្រសួងការងារ ដើម្បីឲ្យក្រសួងដោយស្រាយបញ្ហាប្រាក់អតីតភាពការងារដែរ។
ចុះផ្សាយនៅថ្ងៃ៖
ស្តាប់ - ០២:២៦
កម្មកររោងចក្រ Grand Twin រាប់ពាន់នាក់ បាននាំគ្នាចាប់ផ្តើមធ្វើបាតុកម្ម ចាប់តាំងពីថ្ងៃទី ២០ តុលាមក ប៉ុន្តែនៅព្រឹកថ្ងៃទី ២៤ តុលា នេះពួកគេបាននាំគ្នាបិទផ្លូវ បន្ទាប់ពីថៅកែក្រុមហ៊ុនមិនព្រមដោះស្រាយបញ្ហា។
លោក នួន នី ប្រធានសហព័ន្ធសហជីពគាំទ្រកម្មករកម្ពុជា ដែលដឹកនាំក្រុមកម្មករធ្វើបាតុកម្មនេះ បានបញ្ជាក់ប្រាប់វិទ្យុបារាំងថា បន្ទាប់ពីកម្មករបាននាំគ្នាបិទផ្លូវអស់រយៈពេលជិត២ម៉ោង មក អាជ្ញាធរបានមកសម្របសម្រួលឲ្យមានការបើកផ្លូវវិញ ហើយបានសម្រួលឲ្យភាគីក្រុមហ៊ុន និងសហជីពពិភាក្សាគ្នា ដើម្បីរកដំណោះស្រាយ។ ប៉ុន្តែលោកបានបន្តថា នៅព្រឹកមិញនេះ ភាគីទាំងអស់មិនអាចឈានដល់ការពិភាក្សាគ្នាឡើយ ដោយតែភាគីក្រុមហ៊ុនមិនមែនឆន្ទៈក្នុងការដោះស្រាយ។
ដោយឡែកនៅមុខក្រសួងការងារវិញ កម្មករមកពីរោងចក្រ ចៀន ឡឹ ដែលជាអតីតរោងចក្រហ៊ុយ ចៀន ក្នុងសង្កាត់ក្បាលកោះ ខណ្ឌមានជ័យ បាននាំគ្នាទាមទារឲ្យលោករដ្ឋមន្ត្រីក្រសួងការងារ អ៊ិត សំហេងគោរពតាមការសន្យារបស់គាត់កាលពីថ្ងៃ ១៤ តុលាកន្លងទៅនេះ ថានឹងពន្លឿននិតិវិធី ក្នុងការដោះស្រាយប្រាក់អតីតភាពនេះ។
លោកហ្វា សាលី ប្រធានសម្ព័ន្ធសហជីពជាតិ ជាសហជីពដែលដឹកនាំកម្មករនៅក្នុងរោងចក្រ ចៀន ឡឹ បានបញ្ជាក់ថា នេះ គឺជាការតវ៉ា លើកទី ៥ហើយ របស់ក្រុមកម្មករ ដើម្បីទាមទារឲ្យមានការដោះស្រាយចំពោះប្រាក់អតីតភាពការងារ។ លោកបន្តថា នៅព្រឹកមិញនេះ មានកម្មករខ្លះបានយកចាន យកឆ្នាំង មកដាក់នៅខាងមុខក្រសួង ដើម្បីបង្ហាញថា ពួកគេអត់មានថវិកាទិញអង្គរ និងថវិកាគ្រប់គ្រាន់សម្រាប់ផ្គត់ផ្គង់ជីវភាពរស់នៅប្រចាំថ្ងៃឡើយ។
ទាំងលោក នួន នី និងលោក ហ្វាសាលី សុទ្ធតែបានទទួលស្គាល់ថា កម្មករបម្រើការងារផ្នែកឧស្សាហកម្មកកាត់ដេរនៅកម្ពុជា ភាគច្រើនមិនបានទទួលប្រាក់អតីតភាពការងារ ដូចមានចែងនៅក្នុងច្បាប់ការងារកម្ពុជានោះទេ ដោយសារតែមានថៅកែក្រុមហ៊ុនខិលខូចមួយចំនួន បានរំលោភទៅលើច្បាប់ការងារ ដោយយកការផ្លាស់ប្តូរឈ្មោះក្រុមហ៊ុនជាមធ្យោបាយគេចវេសពីការបើកប្រាក់អតីតការងារដល់បុគ្គលិកដែលធ្វើការយូរឆ្នាំឲ្យខ្លួន។
ប្រធានសហជីពទាំងពីរបានសំណូមពរដល់រដ្ឋាភិបាលកម្ពុជា ធ្វើការពិនិត្យឲ្យបានច្បាស់លាស់មុននឹងសម្រេចផ្តល់សិទ្ធឲ្យក្រុមហ៊ុននីមួយៗ ដំណើរការនៅកម្ពុជា ហើយថាត្រូវតែឲ្យក្រុមហ៊ុនទាំងអស់នោះ មានប្រាក់តម្កល់នៅក្នុងធនាគារជាតិឲ្យបានត្រឹមត្រូវ ព្រោះកន្លងមកមានរោងចក្រកាត់ដេរមួយចំនួនបានក្ស័យធន់ ថៅកែរត់ចោល ហើយគ្មានប្រាក់បើកឲ្យកម្មកររបស់ខ្លួន។ ក្រសួងការងារមិនអាចទាក់ទងសុំការពន្យល់អំពីបញ្ហានេះបានទេនៅថ្ងៃនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ