គ.ជ.បប្រកាសលទ្ធផលបោះឆ្នោតផ្លូវការ គណបក្សប្រជាជននៅតែឈ្នះ
ដូចការគ្រោងទុក គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប បានប្រកាសលទ្ធផលផ្លូវការនៃការបោះឆ្នោតតំណាងរាស្ត្រ នីតិកាលទី៥ ឆ្នាំ២០១៣។ ជាលទ្ធផលដែលបង្ហាញថា គណបក្សប្រជាជនកម្ពុជាទទួលបាន៦៨អាសនៈ ខណៈដែលគណបក្សសង្គ្រោះជាតិ ទទួលបាន ៥៥អាសនៈ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០៩
នៅក្នុងការប្រកាសលទ្ធផលផ្លូវការរបស់គ.ជ.ប នៅព្រឹកថ្ងៃអាទិត្យទី៨ កញ្ញានេះ មានគណបក្សយោបាយតែពីរគត់ ដែលបានទទួលអាសនៈនៅក្នុងរដ្ឋសភា នីតិកាលទី៥ថ្មីនេះ គឺគណបក្សប្រជាជនកម្ពុជា និងគណបក្សសង្គ្រោះជាតិ។
ការប្រកាសលទ្ធផលផ្លូវការរបស់ គ.ជ.ប បង្ហាញថា គណបក្សប្រជាជនកម្ពុជាទទួលអាសនៈចំនួន៦៨ ខណៈដែលគណសង្គ្រោះជាតិទទួលបានអាសនៈសរុបចំនួន៥៥។
តារាងលទ្ធផលផ្លូវការនេះបានបង្ហាញថា គណបក្សប្រជាជនទទួលបានសំឡេងឆ្នោតសរុបទូទាំងប្រទេស៣លាន២សែន៣ម៉ឺន៥ពាន់៩៦៩សំឡេង។ ចំណែកគណបក្ស សង្គ្រោះជាតិ ទទួលបានសំឡេងឆ្នោតសរុបទូទាំងប្រទេសចំនួន ២លាន៩សែន៤ ម៉ឺន៦ពាន់ ១៧៦សំឡេង។
គួរបញ្ជាក់ថា លទ្ធផលផ្លូវការនេះមិនខុសគ្នាពីលទ្ធផលបណ្ដោះអាសន្នដែល គ.ជ.ប ធ្លាប់បានប្រកាសកាលពីថ្ងៃទី១២សីហា កន្លងមកនោះទេ។ ជាលទ្ធផលដែលទទួលរងការរិះគន់ពីគណបក្សប្រឆាំង និងអង្គការសង្គមស៊ីវិលមួយចំនួន ដោយសារបានរកឃើញមានភាពមិនប្រក្រតីជាច្រើននៅមុន និងនៅក្រោយការបោះឆ្នោត រហូតឈានដល់មានមហាបាតុកម្មរបស់គណបក្សសង្គ្រោះជាតិប្រឆាំងនឹងលទ្ធផលនេះ ដោយទាមទារឲ្យបង្កើតគណៈកម្មការចម្រុះឯករាជ្យស៊ើបអង្កើតរកភាពមិនប្រក្រតីនេះ។
បើយោងតាមតារាងលទ្ធផលផ្លូវការនៃការបោះឆ្នោតជ្រើសតាំងតំណាងរាស្ត្រ នីតិកាលទី៥ ដែលចេញផ្សាយដោយ គ.ជ.ប នៅថ្ងៃអាទិត្យទី៨កញ្ញានេះ គណបក្សសង្គ្រោះជាតិទទួលបានសំឡេងឆ្នោតគាំទ្រយ៉ាងច្រើនលើសលប់ នៅតាមបណ្ដាខេត្ត-រាជធានី ធំៗ ដូចជាខេត្តកំពង់ចាម កំពង់ស្ពឺ កណ្ដាល ភ្នំពេញ និងព្រៃវែងជាដើម។
ដោយឡែក គណបក្សប្រជាជនកម្ពុជាដែលជាគណបក្សកាន់អំណាច ទទួលបានសំឡេងឆ្នោតគាំទ្រនៅតាមបណ្ដាខេត្តដាច់ស្រយាលឆ្ងាយៗ ដូចជាខេត្តបន្ទាយមានជ័យ ឧត្តរមានជ័យ កោះកុង ក្រចេះ មណ្ឌលគីរី ព្រះវិហារ ពោធិ៍សាត់ រតនគីរី ព្រះសីហនុ ស្ទឹងត្រែង ស្វាយរៀង បាត់ដំបង កំពត កែប និងតាកែវ ជាដើម។ ក្នុងចំណោមខេត្តទាំងអស់នោះ ភាគច្រើនមានតែមួយអាសនៈតែប៉ុណ្ណោះ។
យ៉ាងណាក៏ដោយ ចំនួនអាសនៈដែលគណបក្សប្រជាជនទទួលបាននៅក្នុងអាណត្តិទី៥ថ្មីនេះ មានការថយចុះអាសនៈអស់ចំនួន២២ បើប្រៀបនឹងអាណត្តិមុន គណបក្សកាន់អំណាចមួយនេះបានទទួល៩០អាសនៈ នៅក្នុងរដ្ឋសភា។
បើតាមលោក ឈាង វ៉ុន តំណាងរាស្ត្រគណបក្សប្រជាជនកម្ពុជា ដែលបានប្រាប់វិទ្យុបារាំងអន្តរជាតិនៅថ្ងៃអាទិត្យនេះ លទ្ធផលផ្លូវការបោះឆ្នោតដែលប្រកាសដោយ គ. ជ.ប នៅក្នុងអាណត្តិថ្មីនេះ ពិតជាបង្ហាញពីភាពខុសគ្នាក្នុងការទទួលបានអាសនៈ រវាងគណបក្សប្រជាជនកម្ពុជា និងគណគបក្សប្រឆាំង។ លោកបន្តថា ភាពខុសគ្នានេះ នឹងខំប្រឹងជំរុញឲ្យសមាជិកគណបក្សប្រជាជនកម្ពុជាទាំងអស់ត្រូវការពារលទ្ធផល និងសម្លេងឆ្នោតដែលទទួលបានការគាំទ្រពីប្រជាពលរដ្ឋឲ្យបានជាដាច់ខាត។
ជាការការពារ និងប្រឹងប្រែង ដែលលោក ឈាង វ៉ុន តំណាងរាស្ត្រមណ្ឌលខេត្តបាត់ដំបងរូបនេះអះអាងថា គណបក្សប្រជាជនត្រូវធ្វើការកែទម្រង់រចនាសម្ព័ន្ធដឹកនាំក្នុងបក្ស ដើម្បីបន្តបំរើប្រជាពលរដ្ឋដោយយកចិត្តទុកដាក់ឲ្យបានល្អជាងអាណត្តិមុន។
នៅមិនទាន់មានប្រតិកម្មណាមួយនៅឡើយទេរបស់មន្ត្រីនានារបស់គណបក្សគណបក្សសង្គ្រោះជាតិ នៅព្រឹកថ្ងៃអាទិត្យនេះ ជុំវិញការប្រកាសលទ្ធផលផ្លូវការរបស់ គ.ជ.ប ដោយពួកគេបានថ្លែងថា កំពុងជាប់ប្រជុំផ្ទៃក្នុងបក្ស។
ប៉ុន្តែ បើតាមលោកសម រង្ស៊ី ប្រធានគណបក្សសង្គ្រោះជាតិ ដែលបានថ្លែងនៅចំពោះមុខបាតុករជាច្រើនកុះករយ៉ាងម៉ឺងម៉ាត់ ក្នុងមហាបាតុកម្មអហិង្សាកាលពីថ្ងៃសៅរ៍ លោកមិនទទួលស្គាល់លទ្ធផលបោះឆ្នោតនេះទេ ដរាបណាមិនមានការបង្កើតគណៈកម្មការចម្រុះឯករាជ្យស៊ើបអង្កេតភាពមិនប្រក្រតី។ លោកប្រកាសថា នឹងបន្តដឹកនាំមហាបាតុកម្មនៅទូទាំងប្រទេសជាបន្តទៀត ដើម្បីប្រឆាំងនឹងលទ្ធផលនេះ។
សម្រាប់លោក កែម ឡី អ្នកវិភាគនយោបាយឯករាជ្យ លទ្ធផលដែលប្រកាសនេះ វាមិនមែនជាលទ្ធផលពិតចេញពីឆន្ទៈពិតប្រាកដរបស់ប្រជាពលរដ្ឋនោះទេ។ វាគ្រាន់តែជាលទ្ធផលដែលគេរៀបចំទុក សម្រាប់អង្គុយកៅអីដដែល និងសម្រាប់រក្សាស្ថិរភាពនយោបាយកុំឲ្យមានសង្គ្រាម ឫក៏បញ្ចៀសវិបត្តិផ្ទៃក្នុងណាមួយនោះតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ