គ.ជ.ប. ទទួលបានបណ្ដឹងជាង១២៤ករណី ក្នុងថ្ងៃបោះឆ្នោត និងក្រោយបោះឆ្នោត
គ.ជ.ប. ទទួលបានពាក្យបណ្ដឹងក្រោយពីការបោះឆ្នោតចំនួន ១២៤ បណ្ដឹង នៅតាមថ្នាក់ឃុំ ។ ហើយបានបញ្ជូនបន្តមកថ្នាក់ខេត្តចំនួន ៤០ពាក្យបណ្ដឹង។ តែក្នុងនោះ មានពាក្យបណ្ដឹងតែ ៩ករណីប៉ុណ្ណោះ ត្រូវបានគេបញ្ជូនបន្តឱ្យមកដោះស្រាយ រហូតដល់ថ្នាក់ជាតិ បើគិតមកដល់ថ្ងៃទី ៤ សីហានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:១៨
គណៈកម្មាធិការជាតិរៀបចំការបោះឆ្នោត ដែលគេ ហៅកាត់ថា គ.ជ.ប. ទទួលបានពាក្យបណ្ដឹង ដែលភាគច្រើនជាពាក្យបណ្ដឹង ដែលប្ដឹងដោយគណបក្សសង្គ្រោះជាតិ។ ពាក្យបណ្ដឹងទាំងនោះមានពាក់ព័ន្ធ ទៅនឹងករណីជាច្រើន ដែលគេអះអាងថា មានភាពមិនប្រក្រតីក្នុងការបោះឆ្នោត។ លោក ទេព នីថា អគ្គលេខាធិការ គ.ជ.ប. បានពន្យល់ថា បណ្ដឹងជាច្រើនទាក់ទងទៅនឹងការឃោសនាក្នុងកំឡុងពេលបោះឆ្នោត និងការគំរាមកំហែងក្នុងថ្ងៃបោះឆ្នោត។
ករណីទាំងអស់ ត្រូវបានគណកម្មាធិការរៀបចំបោះឆ្នោតថ្នាក់ឃុំ-សង្កាត់ ដោះស្រាយបានភាគច្រើនហើយ។ ដែលក្នុងនោះលោកទេព នីថាអះអាងថា ដំណោះស្រាយ ដោយមានការសម្របសម្រួលគ្នា និងបណ្ដឹងមួយចំនួនបានដកទៅវិញ ដោយដើមបណ្ដឹង។ អគ្គលេខាធិការគ.ជ.ប. រូបនេះ បានបន្តថា មានបណ្ដឹងតែ ៤០ប៉ុណ្ណោះ បានបញ្ជូនបន្តមកដោះស្រាយនៅថ្នាក់ខេត្ត ដោយសារតែថ្នាក់ឃុំមិនអាចជួយសម្របសម្រួលបាន។ បើគិតមកដល់ថ្ងៃនេះ មានបណ្ដឹងសល់ចំនួន ១៥ទៀត ដែលថ្នាក់ខេត្តកំពុងតែបន្ដធ្វើការដោះស្រាយ។
ចំពោះ បណ្ដឹងដែលបន្តមកដល់ថ្នាក់ជាតិវិញ គឺមានតែ៩ករណីប៉ុណ្ណោះ ក្នុងនោះមាន១ករណីត្រូវបាន គ.ជ.ប. ដោះស្រាយរួចរាល់ និង៨ករណីទៀតគ.ជ.ប. កំពុងតែបន្តនីតិវិធី។
បើចំពោះ លោក ហង្ស ពុទ្ធា នាយកប្រតិបត្តិអង្គការសង្កេតការណ៍បោះឆ្នោត ដែលហៅថានិកហ្វិក បានឱ្យដឹងថា សង្គមស៊ីវិល ក៏កំពុងតែស្រាវជ្រាវ និងអង្កេតបណ្ដឹង ជុំវិញការបោះឆ្នោត និងជុំវិញពាក្យបណ្ដឹងផងដែរ។ នាយកប្រតិបត្តិអង្គការនិកហ្វិករូបនេះ បង្ហាញថា របៀបដោះស្រាយពាក្យបណ្ដឹងរបស់ គ.ជ.ប. និងសង្គមស៊ីវិល មាននីតិវិធីផ្សេងៗគ្នា។
ក្នុងការដោះស្រាយពាក្យបណ្ដឹងខាងលើ គ.ជ.ប. នឹងគ្រោងប្រកាសលទ្ធផលបណ្ដោះអាសន្ន នៃការបោះឆ្នោត នៅថ្ងៃទី១០ សីហាខាងមុខ។ ហើយការប្រែប្រួលពេលវេលាមួយចំនួន នឹងអាចមាន តាមករណីជាក់ស្តែង។ លទ្ធផលជាផ្លូវការ គ្រោងនឹងប្រកាសនៅ៤ ថ្ងៃបន្ទាប់ពីលទ្ធផលបណ្ដោះអាសន្ន អាស្រ័យទៅលើថា មានពាក្យបណ្ដឹងបន្ត ឬក៏មិនមាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ