លោក សម រង្ស៊ី ដឹកនាំអ្នកគាំទ្រ ហែក្បួន និងអំពាវនាវឲ្យមានការចរចា នៅថ្ងៃចន្ទ
នៅពេលមកដល់ព្រលានយន្តភ្នំពេញ កាលពីម៉ោង ៩ ព្រឹក ថ្ងៃសៅរ៍ ទី១៩ ខែកក្កដា លោក សម រង្ស៊ី ប្រធានគណបក្សសង្គ្រោះជាតិ បានដឹកនាំអ្នកគាំទ្ររាប់ពាន់នាក់ ហែក្បួន ទៅកាន់ទីស្នាក់ការគណបក្សនៅចាក់អង្រែ។ លោកសមរង្ស៊ី បានអំពាវនាវឲ្យមានការចរចាឡើងវិញ រវាងគណបក្សប្រជាជនកម្ពុជា និងគណបក្សសង្គ្រោះជាតិ នៅថ្ងៃចន្ទខានស្អែក ដើម្បីរកដំណោះស្រាយនយោបាយរួម។ នោះគឺបញ្ចប់អំពើហិង្សា ដោះលែងអ្នកជាប់ឃុំ និងកែទម្រង់ ហើយរៀបចំការបោះឆ្នោតឲ្យបានឆាប់។ មន្ត្រីជាន់ខ្ពស់គណបក្សប្រជាជនកម្ពុជា បានស្វាគមឆន្ទះចង់ចរចាឡើងវិញរបស់លោកសមរង្ស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
បន្ទាប់ពីប្រកាសទាមទារឲ្យដោះលែងបេក្ខជនជាប់ឆ្នោតតំណាងរាស្ត្រ និងសមាជិកគណបក្សសង្គ្រោះជាតិ ដែលត្រូវបានចាប់ឃុំឃាំងដោយអយុត្តិធម៌ ដោះលែងទីលានប្រជាធិបតេយ្យ និងត្រូវធានាឲ្យមានសន្តិភាពប្រកបដោយយុត្តិធម៌ លោកសមរង្ស៊ី ដែលឈរលើក្បាលឡានអត់ដំបូល នៅមុខវិមានសន្តិភាព កន្លែងលោកនាយករដ្ឋមន្ត្រី ហ៊ុន សែន ធ្វើការ គឺប្រមុខបក្សប្រឆាំង បានប្រកាសអំពាវនាវឲ្យគណបក្សប្រជាជនកម្ពុជា ចូលរួមចរចាឡើងវិញ ជាមួយគណបក្សសង្គ្រោះជាតិ នៅថ្ងៃចន្ទដើមសប្តាហ៍ក្រោយ។
ជាការភ្ជាប់ការចរចា ដែលលោកសមរង្ស៊ី ប្រកាសថា ដើម្បីរកដំណោះស្រាយនយោបាយរួម នោះគឺចរចាលើរបៀបវារៈសំខាន់ៗ រួមមាន៖ ការបញ្ឈប់អំពើហិង្សា ដោះលែងបេក្ខជនជាប់ឆ្នោតតំណាងរាស្ត្រ និងសមាជិកគណបក្សសង្គ្រោះជាតិ ការកែទម្រង់គជប និងការរៀបចំការបោះឆ្នោតឲ្យបានឆាប់។
ជាមួយគ្នានោះ លោកសមរង្ស៊ី ក៏បានប្រកាសអំពាវនាវដល់រដ្ឋាភិបាលគណបក្សប្រជាជនកម្ពុជា ត្រូវបញ្ចប់នីតិវិធីប្តឹងផ្តល់នៅតុលាការ និងដោះលែងអ្នកជាប់ឃុំដោយគ្មានលក្ខខណ្ឌផងដែរ។
មន្ត្រីជាន់ខ្ពស់គណបក្សប្រជាជនកម្ពុជា លោក ឈាង វុន ដែលជាសមាជិកក្រុមចរចា បានប្រកាសស្វាគមន៍នូវឆន្ទៈចង់ចរចារបស់មេដឹកនាំបក្សប្រឆាំង។ លោកថា គណបក្សប្រជាជនកម្ពុជា ស្វាគមន៍នូវការចង់រកដំណោះស្រាយនយោបាយ តាមរយៈការចរចា។ ប៉ុន្តែតាមលោកឈាងវុន គណបក្សសង្គ្រោះជាតិ ត្រូវចរចាដោយស្មោះត្រង់ ហើយឈប់គំរាមធ្វើបាតុកម្ម។
មួយវិញទៀត លោកសមរង្ស៊ី ក៏ត្រូវនិយាយឲ្យត្រូវគ្នាជាមួយលោកកឹមសុខា មុននឹងមកចរចាជាមួយគណបក្សប្រជាជនកម្ពុជា។
ជាការកត់សម្គាល់ ក្បួនដង្ហែរបស់លោកសមរង្ស៊ី នៅព្រឹកថ្ងៃទី១៩កក្កដានេះ មិនមានចំនួនអ្នកចូលរួមច្រើន ដូចកាលពីពេលលោក វិលចូលស្រុក កាលពីថ្ងៃទី១៩កក្កដា ឆ្នាំមុននោះទេ។ ក្បួនដង្ហែនោះ មិនមានការរារាំងទេ តែលោកសមរង្ស៊ី បានប្តូរទិសដៅ ដោយមិនទៅវត្តភ្នំ ជិតទីលានប្រជាធិបតេយ្យទេ គឺឆ្ពោះទៅកាន់ទីស្នាក់ការគណបក្ស នៅចាក់អង្រែ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ