លោក កឹម សុខា ចូលបំភ្លឺនៅក្នុងតុលាការបង្គ្រប់កិច្ចនៅថ្ងៃទី២៥កក្កដានេះ
លោក កឹម សុខា អនុប្រធានគណបក្សសង្គ្រោះជាតិ បានចូលខ្លួនទៅឆ្លើយបំភ្លឺនៅក្នុងតុលាការក្រុងភ្នំពេញ នៅព្រឹកថ្ងៃទី២៥កក្កដានេះ តាមដីកាកោះហៅរបស់ចៅក្រមស៊ើបសួរលោក កែវ មុនី។ ខុសពីករណីមុនៗ បរិយាកាសនៅមុខតុលាការក្រុងភ្នំពេញព្រឹកមិញ ពេលលោក កឹម សុខា ចូលបំភ្លឺ មិនឃើញមានការបិទផ្លូវ បិទរនាំងដូចសព្វមួយដងនោះទេ។
ចុះផ្សាយនៅថ្ងៃ៖
ស្តាប់ - ០១:៤៣
លោក កឹម សុខា អនុប្រធានគណបក្សសង្គ្រោះជាតិ បានធ្វើដំណើរទៅដល់មុខតុលាការក្រុងភ្នំពេញ តាំងពីវេលាម៉ោង៧និង៤៧នាទីព្រឹក ដើម្បីចូលខ្លួនទៅឆ្លើយបំភ្លឺ ទៅតាមការកោះហៅរបស់ចៅក្រមស៊ើបសួរសាលាដំបូងរាជធានីភ្នំពេញលោក កែវ មុនី ក្នុងនាមលោកជាមេដឹនាំគណបក្ស ទាក់ទងទៅនឹងព្រឹត្តិការណ៍ប៉ះទង្គិចគ្នារវាងបាតុករបក្សសង្គ្រោះជាតិ និងសន្តិសុខខណ្ឌកាលពីថ្ងៃទី១៥កក្កដា។ ប៉ុន្តែលោក កឹម សុខា ត្រូវបានចោទសួរតែមួយសំណួរប៉ុណ្ណោះ ហើយក៏ត្រូវបានអនុញ្ញាតអោយវិលត្រឡប់មកវិញ។ បើតាមលោក កឹម សុខា សំណុំរឿងរបស់លោក គឺចប់ហើយ។
បរិយាសនយោបាយនៅកម្ពុជាហាក់បានធូស្រាលយ៉ាងខ្លាំង ក្រោយពីមានកិច្ចព្រមព្រៀងនយោបាយរវាងគណបក្សប្រជាជនកម្ពុជា និងគណបក្សសង្គ្រោះជាតិ កាលពីថ្ងៃទី២២កក្កដាឆ្នាំ២០១៤។ តាមរយៈកិច្ចព្រមព្រៀងនោះហើយ ដែលអនុញ្ញាតឲ្យបេក្ខជនតំណាងរាស្ត្រជាប់ឆ្នោត ៧នាក់រួមទាំងមន្ត្រី របស់គណបក្សសង្គ្រោះជាតិម្នាក់ទៀត ត្រូវបានដោះលែង។
លោក កឹម សុខា ត្រូវបានចៅក្រមស៊ើបអង្កេតលោក កែវ មុនី ចេញដីកាកោះហៅកាលពីថ្ងៃទី១៦កក្កដា អោយចូលខ្លួនឆ្លើយបំភ្លឺ ក្នុងនាមជាមេដឹកនាំគណបក្សសង្គ្រោះជាតិ។ ជាដីកាកោះហៅ មួយថ្ងៃក្រោយពីហេតុការណ៍នៃការប៉ះទង្គិចគ្នារវាងក្រុមអ្នកគាំទ្រគណបក្សសង្គ្រោះជាតិ និងកងសន្តិសុខខណ្ឌ នៅក្បែស្ពាននាគ ជិតទីលានប្រជាធិបតេយ្យ ដែលបណ្តាលអោយមានរបួសទាំងសងខាង។
គួរកត់សម្គាល់ដែរថា នៅមុខតុលាការក្រុងភ្នំពេញព្រឹកម៉ិញ គេមិនឃើញមានការបិទរបាំងការពារអ្វីនោះទេ ហើយចំនួនអ្នកទៅគាំទ្រលោក កឹម សុខា ក៍មានចំនួនតិចតួចដែរ ពោលគឺមិនដូចករណីមុនៗនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ