តុលាការកោះហៅលោក កឹម សុខា ចូលបំភ្លឺក្នុងនាមជាមេដឹកនាំគណបក្ស
បន្ទាប់ពីចោទប្រកាន់តំណាងរាស្ត្រគណបក្សសង្គ្រោះជាតិ ចំនួន៥រូប និងសកម្មជនមួយរូប តុលាការសាលាដំបូងរាជធានីភ្នំពញ ក៏បានចេញដីកាកោះហៅលោក កឹម សុខា ប្រធានស្តីទីគណបក្សសង្គ្រោះជាតិទៅសាកសួរដែរ។ លោក យឹម សុវណ្ណ អ្នកនាំពាក្យគណបក្សសង្គ្រោះជាតិហៅដីកានេះថា ជាការសម្លាប់លទ្ធិប្រជាធិបតេយ្យ។
ចុះផ្សាយនៅថ្ងៃ៖
ស្តាប់ - ០១:៥៥
សាលាដំបូងរាជធានីភ្នំពេញ កាលពីថ្ងៃពុធ ម្សិលមិញ បានចេញដីកាកោះហៅប្រធានស្តីទីគណបក្សសង្គ្រោះជាតិ លោក កឹម សុខា ឲ្យចូលបំភ្លឺនៅតុលាការក្នុងនាមជាអ្នកដឹកនាំគណបក្សប្រឆាំង។ ដីកាកោះនេះត្រូវបានលោក យឹម សុវណ្ណ អ្នកនាំពាក្យគណបក្សសង្គ្រោះជាតិ បង្ហោះតាមបណ្តាញសង្គមហ្វេសប៊ុករបស់ខ្លួននៅព្រឹកថ្ងៃព្រហស្បតិ៍នេះ។ លោក កឹម សុខាត្រូវបានតុលាការតម្រូវឲ្យចូលខ្លួនបំភ្លឺនៅថ្ងៃទី ២៥ កក្កដាខាងមុខនេះ។
ដោយឡែកនៅថ្ងៃព្រហស្បតិ៍ទី១៧ កក្កដានេះ គណបក្សសង្គ្រោះជាតិដែលដឹកនាំដោយលោក កឹម សុខា បានបើកិច្ចប្រជុំមន្ត្រីជាន់ខ្ពស់របស់ខ្លួននៅទីស្នាក់ការគណបក្សក្នុងសង្កាត់ចាក់អង្រែលើផងដែរ។
សូមបញ្ជាក់ជូនថា កិច្ចប្រជុំនេះ គឺធ្វើឡើងមួយថ្ងៃបន្ទាប់ពីតុលាការសាលាដំបូងរាជធានីភ្នំពេញ ចេញសេចក្តីសម្រេចដាក់ពន្ធនាគារនូវសមាជិកសភាចំនួន៥រូប រួមទាំងសកម្មជនគណបក្សមួយរូប។ លោក យឹម សុវណ្ណ បញ្ជាក់ថា ជាកិច្ចប្រជុំមន្ត្រីគណបក្សសង្គ្រោះជាតិមកពីតាមបណ្តាខេត្តដើម្បីស្វែងរកដំណោះស្រាយចំពោះការចាប់ខ្លួនមន្ត្រីជាន់ខ្ពស់គណបក្ស។
កិច្ចប្រជុំនេះធ្វើឡើងបន្ទាប់ពីក្រសួងមហាផ្ទៃកាលពីថ្ងៃទី១៦ កក្កដាម្សិលមិញ ក៏បានចេញបញ្ជាឲ្យអាជ្ញាធរខេត្តរាជធានី ចាត់វិធានការដើម្បីទប់ស្កាត់សកម្មភាពញុះញង់អុចអាលបង្កឲ្យមានអំពើហិង្សាដែលជ្រកក្រោមរូបភាពនៃការប្រមូលផ្តុំធ្វើបាតុកម្ម កូដកម្ម និងការតវ៉ានានា។
ក្រៅពីនោះ សេចក្តីជូនដំណឹងដែលមានហត្ថលេខាដោយរដ្ឋមន្ត្រីក្រសួងមហាផ្ទៃលោក ស ខេង ក៏បានណែនាំឱ្យអាជ្ញាធរក្រោមសមត្ថកិច្ចរបស់ខ្លួន អប់រំណែនាំប្រជាពលរដ្ឋឲ្យចូលរួមថែរក្សាសន្តិភាព និងសន្តិសុខនៅតាមមូលដ្ឋានខេត្តនីមួយៗផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ