អត្រាជំងឺគ្រុនឈាមធ្លាក់ចុះ ប៉ុន្តែស្ថិតក្នុងការប្រុងប្រយ័ត្នបន្ថែម
មជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និង បាណកសាស្ត្របានប្រកាសឲ្យដឹងថា អត្រានៃជំងឺគ្រុនឈាមនៅកម្ពុជា បានធ្លាក់ចុះគួរឲ្យកត់សម្គាល់ក្នុងអំឡុង២៨សប្តាហ៏ ដើមឆ្នាំ២០១៤ នេះបើធៀបនឹងឆ្នាំមុន។ យ៉ាងណាក៏ដោយ អ្នកជំនាញបានអំពាវនាវដល់សហគមន៍និងប្រជាជនទូទៅឲ្យមានការប្រុងប្រយ័ត្នក្នុងការការពារខ្លួនឯង និងសមាជិកនៅក្នុងគ្រួសារឲ្យជៀសផុតពីជំងឺគ្រុនឈាម ។
ចុះផ្សាយនៅថ្ងៃ៖
ស្តាប់ - ០២:១៥
ក្នុងរយៈពេល២៨សប្តាហ៍ដើមឆ្នាំ២០១៤ នេះ មានអ្នកកើតជំងឺគ្រុនឈាមប្រមាណ១០០០ករណី ក្នុងនោះចំនួនអ្នកស្លាប់មាន៩ ករណី។ តួលេខនេះបានបង្ហាញថា ករណីជំងឺគ្រុនឈាមបានថយចុះ ៨៥% បើប្រៀបធៀបរយៈពេលដូចគ្នា នៅដើមឆ្នាំ២០១៣ ដែលមាន រហូតដល់ទៅ ៩០០០ករណី ក្នុងនោះមានអ្នកស្លាប់រហូតដល់ ២៨នាក់។ នេះបើតាមការឲ្យដឹងពីមជ្ឈមណ្ឌលជាតិប្រយុទ្ធប្រឆាំងនឹងជំងឺគ្រុនចាញ់ ប៉ារ៉ាស៊ីតសាស្ត្រ និង បាណកសាស្ត្រ។
និន្នាការដែលគួរឲ្យកត់សម្គាល់ចំពោះករណីគ្រុនឈាមនៅដើមឆ្នាំ២០១៤នេះគឺអ្នកកើតជំងឺជាមនុស្សពេញវ័យគិតចាប់ពីអាយុ ១៥ឆ្នាំឡើងទៅមានចំនួន៥% និងអ្នកដែលមានអាយុចាប់ពី ៥ទៅ១៥ឆ្នាំមាន ៦៧% នៃករណីគ្រុនឈាមសរុប។ បើទោះជាភាគរយនៃមនុស្សពេញវ័យមានតិចជាងកុមារក៏ដោយ ប៉ុន្តែ អត្រាអ្នកស្លាប់របស់មនុស្សពេញវ័យបានកើនឡើងខ្ពស់ ដោយសារអ្នកជំងឺនិងអ្នកព្យាបាលសេវាកម្មឯកជនខ្លះ មិនបានចាប់អារម្មណ៍។ ពួកគេច្រើនតែគិតថានេះជាជំងឺផ្សេងទៀត ហើយក៏ពន្យារទុកឲ្យអ្នកជំងឺឈានដល់សភាពធ្ងន់ធ្ងរសង្គ្រោះលែងបានទើបបញ្ជូនមកមន្ទីរពេទ្យ។
បើតាមឯកសាររបស់អង្គការសុខភាពពិភពលោក មកដល់នឹងពេលនេះ ពិភពលោកមិនទាន់មានវ៉ាក់សាំងការពារ ឬឱសថប្រឆាំងនឹងវីរុសគ្រុនឈាមទេ ប៉ុន្តែ អ្វីដែលសំខាន់គឺស្ថិតលើការព្យាបាលសម្រន់រោគសញ្ញាប៉ុណ្ណោះ។ បើយោងតាមសេចក្តីប្រកាសព័ត៌មានដដែល៖ « កម្ពុជាជាប្រទេសទី១ នៃតំបន់អាស៊ីអាគ្នេយ៍ដែលជារឿយៗតែងផ្ទុះការរាតត្បាតនៃជំងឺគ្រុនឈាម ហើយនៅឆ្នាំមុននេះ មានផ្ទុះនៅសិង្ហបូរី ថៃនិង ឡាវ និងនៅដើមឆ្នាំនេះ កំពុងតែផ្ទុះការរាតត្បាតនៅប្រទេសម៉ាឡេស៊ី»។
ឯកសារដដែលបន្តថា អ្នកផ្ទុកវីរុសគ្រុនឈាមមួយចំនួនដែលមិនទាន់ចេញជារោគសញ្ញា អាចឆ្លងដែនយ៉ាងងាយពីប្រទេសមួយទៅប្រទេសមួយ ហើយក៏ចម្ហលងជំងឺនេះបានយ៉ាងឆាប់រហ័ស។
ក្រុមអ្នកជំនាញបានណែនាំថា កិច្ចការពារដ៏ល្អបំផុត គឺការលុបបំបាត់ជំរកមួសខ្លា និងបញ្ជូនអ្នកជំងឺ ជាពិសេសកុមារក្តៅខ្លួន ទៅមន្ទីរទេព្យឲ្យបានទាន់ពេល។ អ្នកជំនាញក៏បានអំពាវនាវដល់គ្រួសារនីមួយៗ ដល់ស្ថាប័នពាក់ព័ន្ធ និងអាជ្ញាធរមូលដ្ឋានគ្រប់លំដាប់ថ្នាក់ រួមទាំងបណ្តាញសារពត័ត៌មានផងឲ្យចូលរួមជំរុញសកម្មភាពដើម្បីទប់ស្កាត់ កុំឲ្យជំងឺគ្រុនឈាមរាតត្បាតដល់ប្រជាជនកម្ពុជា និងជាពិសេសគឺកុមារតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ