អង្គការជនពិការកម្ពុជាជំរុញឲ្យធ្វើកំណែទម្រង់ច្បាប់ស្តីពីការបោះឆ្នោតជ្រើសតាំងតំណាងរាស្ត្រ
ដោយមើលឃើញពីបញ្ហាប្រឈមរបស់ជនពិការកម្ពុជាក្នុងអំឡុងពេលនៃការបោះឆ្នោតជ្រើសតាំងតំណាងរាស្ត្រម្តងៗ អង្គការតំណាងជនពិការកម្ពុជានៅព្រឹកថ្ងៃទី០១ សីហានេះ បានបើកសិក្ខាសាលានៅសណ្ឋាគារហ៊ីម៉ាវ៉ារី ដើម្បីប្រមូលនូវអនុសាសន៍សម្រាប់កំណែទម្រង់ ច្បាប់ស្តីពីការបោះឆ្នោតជ្រើសតាំងតំណាងរាស្ត្រ ដើម្បីដាក់បញ្ចូលការចូលរួមរបស់ជនពិការ។
ចុះផ្សាយនៅថ្ងៃ៖
ស្តាប់ - ០២:១៥
ថ្លែងនៅក្នុងសិក្ខាសាលានៅព្រឹកមិញនេះ លោក ងិន សៅរ័ត្ន នាយកប្រត្តិបត្តិ អង្គការជនពិការកម្ពុជាបានលើកឡើងថា កន្លងមកជនពិការជួបប្រទះនូវបញ្ហាប្រឈមមួយចំនួន រាល់ពេលនៃការបោះឆ្នោតជ្រើសតាំងតំណាងរាស្ត្រម្តង។ បញ្ហាទាំងនោះរួមមាន នីតិវិធីនៃការបោះឆ្នោតនៅមានបញ្ហា ហេដ្ឋារចនាសម្ព័ន្ធរូបវ័ន្ត ដូចជាផ្លូវចេញចូលរបស់ជនពិការនៅមានកម្រិត ខ្វះការលើកទឹកចិត្តពីគ្រួសារ ការចុះឈ្មោះបោះឆ្នោតពីសំណាក់ជនពិការនៅមានការរើសអើងជាដើម។
លោក ម៉ាំង គឹមលាប ដែលជាជនពិការភ្នែក ចូលរួមកាលពីព្រឹកមិញនេះ បានលើកឡើងពីថា លោកទទួលរងនូវការរើសអើយពីសំណាក់ជនដទៃពេលឃើញលោកទៅបោះឆ្នោត កង្វះការយកចិត្តដាក់ពីមន្ត្រីនៅការិយាល័យបោះឆ្នោត និងការប្រតិបត្តិមិនបានត្រឹមត្រូវរបស់មន្ត្រីមួយចំនួននៅមណ្ឌលបោះឆ្នោតជាអាទិ៍។
ជាមួយគ្នានេះ លោក សុកុលៈ ទីប៉ោ តំណាងមកពីគណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប បានឲ្យដឹងថា កន្លងមក គ.ជ.ប តែយកចិត្តទុកដាក់ចំពោះបញ្ហាជនពិការ ដោយបានសហការជាមួយភាគីពាក់ព័ន្ធ ធានាសម្រួលដល់ជនពិការ។
ទោះជាយ៉ាងណា លោកក៏បានសម្តែងការសោកស្តាយចំពោះបញ្ហានានាដែលជនពិការបានលើកឡើង។ លោកទទួលស្គាល់ថា ការអនុវត្តជាក់ស្តែងនៅមានការខ្វះចន្លោះ បើទោះបីជាមានខិតខំប្រឹងប្រែងយ៉ាងណាក៏ដោយ ហើយលោកសង្ឈឹមថា គជប ថ្មីនឹងយកចិត្តទុកដាក់លើនីតិវិធី បទបញ្ជាថ្មីៗជាដើម។
ក្នុងសេចក្តីថ្លែងការណ៍រួមរបស់អង្គការជនពិការកម្ពុជា ចេញផ្សាយនៅព្រឹកថ្ងៃទី០១ សីហានេះ បានផ្តល់ជាអនុសាសន៍រួមចំនួន៨ចំណុចផងដែរ ក្រោយពីបានធ្វើសក្ខាសាលាថ្នាក់ជាតិទូទាំង២៥រាជធានីខេត្ត។ អនុសាសន៍ទាំងនោះរួមមាន ជំរុញឲ្យមានការធ្វើវិសោធនកម្មច្បាប់ស្តីពីការបោះឆ្នោតជ្រើសតាំងតំណាងរាស្ត្រដូចជាមាត្រាទី១៣ថ្មី មាត្រាទី១៦ថ្មី មាត្រាទី៤៩ថ្មី និងមាត្រាមួយចំនួនទៀត។
ជាងនេះទៅទៀត ត្រូវបង្កើនការផ្សព្វផ្សាយពីសឺមីដាក់សន្លឹកឆ្នោត ដែលមានគុណភាពសម្រាប់ជនពិការភ្នែកទាំងសងខាងឲ្យបានទូលាយ រាល់ការរិយាល័យបោះឆ្នោតត្រូវមានជម្រាលសម្រាប់ជនពិការជិះរទះ មិនត្រូវអនុញ្ញាត្តិឲ្យអ្នកណាផ្សេងគូលសន្លឹកឆ្នោតជំនួសជនពិការ លុះត្រាតែមានការស្នើសុំនិងព្រមព្រៀងគ្នា បន្ថែមតារាងបញ្ជាក់ពីប្រភេទពិការភាពទៅក្នុងបញ្ជីឈ្មោះអ្នកបោះឆ្នោតជាដើម។
សូមរម្លឹកដែរថា ជនពិការទូទាំងប្រទេសកម្ពុជា មានចំនួនជាង១០% ពោលគឺជាង១លាន៤សែននាក់។ នេះបើយោងតាមលោក ងិន សៅរ័ត្ន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ