តុលាការលើកថ្ងៃបើកសវនាការក្រុមលោក វន ពៅ ទៅថ្ងៃទី២៥ មេសា
សាលាដំបូងរាជធានីភ្នំពេញបានសម្រេចលើកថ្ងៃបើកសវនាការជំនុំជម្រះករណីក្រុមលោក វន ពៅ ដែលកំពុងឃុំនៅពន្ធនាគារត្រពាំងផ្លុង ខេត្តកំពង់ចាម ទៅបើកជំនុំជម្រះនៅថ្ងៃទី ២៥មេសាវិញ។ ការលើកថ្ងៃបើកសវនាការនេះ តុលាការបានលើកហេតុផលថាដោយសារតែថ្ងៃទី១៨មេសា កៀកថ្ងៃចូលឆ្នាំខ្មែរពេក។ នេះបើតាមការឲ្យដឹងរបស់ លោក អំ សំអាត ប្រធានបច្ចេកទេសស៊ើបអង្កេតរបស់អង្គការ លីកាដូ ដែលបានតាមដានសំណុំរឿងនេះយ៉ាងដិតដល់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
សវនាការសំណុំរឿងលោក វន ពៅ និងអ្នកជាប់ចោទទាំង២០នាក់ផ្សេងទៀត ដែលគ្រោងបើកធ្វើនៅថ្ងៃទី១៨មេសានោះត្រូវបានលើកពេលទៅថ្ងៃទី ២៥ មេសាវិញ។ នេះបើយោងតាមលោក អំ សំអាត ប្រធានបច្ចេកទេសស៊ើបអង្កេតរបស់អង្គការ លីកាដូ ដែលបានថ្លែងប្រាប់វិទ្យុបារាំងអន្តរជាតិ RFI នៅព្រឹក ថ្ងៃសុក្រ ទី១១មេសា នេះ។ លោក វន ពៅ ប្រធានសមាគមប្រជាធិបតេយ្យឯករាជ្យសេដ្ឋកិច្ចក្រៅប្រព័ន្ធ សកម្មជនដីធ្លី និងកម្មករផ្សេងទៀតសរុប២១នាក់កំពុងជាប់ឃុំនៅពន្ធនាគារត្រពាំងផ្លុង ក្នុងខេត្តកំពង់ចាម និងកំពុងរង់ចាំការបើកសវនាការពីសាលាដំបូងរាជធានីភ្នំពេញ។
បើយោងតាមលោក អំ សំអាត មូលហេតុដែលតុលាការលើកពេលបើកសវនាការនេះ គឺ ដោយសារថ្ងៃទី ១៨ មេសាកៀកថ្ងៃបុណ្យចូលឆ្នាំពេក ដូច្នេះ តុលាការក៏សម្រេចរំកិលសវនាការ ទៅថ្ងៃទី ២៥ មេសាវិញ។
សង្គមស៊ីវិលមានជំនឿយ៉ាងមុតមាំថា សាលាដំបូងរាជធានីនឹងដោះលែងលោក វន ពៅ និង អ្នកជាប់ឃុំផ្សេងទៀត បន្ទាប់ពីបើកសវនាការនៅពេលខាងមុខនេះ ពីព្រោះពួកគេមិនមានទោសដូចដែលអាជ្ញាធរបានចោទប្រកាន់នោះឡើយ។
ថ្ងៃសុក្រទី ១១មេសានេះដែរ អង្គការលីកាដូបាននាំយកម្ហូបអាហារ និងនំចំនីផ្សេងៗទៅចែកជូនក្រុមលោក វន ពៅ និង អ្នកកំពុងជាប់ឃុំផ្សេងទៀតសរុបប្រមាណ ១៦០០ នាក់ នៅពន្ធនាគារត្រពាំងផ្លុង ក្នុងខេត្តកំពង់ចាម។ ជាអំណោយដែលអង្គការ លីកាដូ អះអាងថា ធ្វើឡើងសម្រាប់អបអរសាទរក្នុងឱកាសបុណ្យចូលឆ្នាំថ្មីប្រពៃណីខ្មែរ សម្រាប់អ្នកដែលកំពុងជាប់ឃុំ។ នេះបើតាម លោក អំ សំអាត ដដែល។
សូមបញ្ជាក់ថា លោក វន ពៅ ត្រូវបានអាជ្ញាធរចាប់ខ្លួនកាលពីដើមខែមករាកន្លងទៅ នៅក្នុងការប៉ះទង្គិចគ្នាមួយ រវាងក្រុមកម្មករ និងកងកម្លាំងទ័ពឆ័ត្រយោង៩១១ នៅរោងចក្រយ៉ាកជីង។ លោកត្រូវបានបញ្ជូនទៅកាន់ពន្ធនាគារត្រពាំងផ្លុង ក្នុងខេត្តកំពង់ចាម ជាមួយនឹងមនុស្ស២២នាក់ផ្សេងទៀត ក៏ប៉ុន្តែក្រោយមក មនុស្សពីរនាក់ត្រូវបានដោះលែងឲ្យនៅក្រៅឃុំវិញ។ លោក វន ពៅ ក៏ធ្លាប់ត្រូវបានតុលាការទាំងសាលាដំបូងរាជធានី និងសាលាឧទ្ធរណ៍បានបដិសេធសំណើសុំនៅក្រៅឃុំជាបន្តបន្ទាប់ ក្រោមហេតុផលផ្សេងៗគ្នា នាពេលកន្លងមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ