សង្គមស៊ីវិលជំរុញឲ្យរដ្ឋាភិបាលកម្ពុជាចូលជាសមាជិកទី៦៤នៃប្រទេស OGP
អង្គការសង្គមស៊ីវិលចំនួន៥ ដែលធ្វើការលើបញ្ហាសង្គមប្រកបដោយសមភាព តម្លាភាព និងគណនេយ្យភាព បានបើកធ្វើសិក្ខាសាលាមួយនៅឯសណ្ឋាគា Sunway នៅថ្ងៃទី១៦តុលានេះ ដើម្បីពិភាក្សាទៅលើប្រធានបទ ភាពជាដៃគូរដ្ឋាភិបាលបើកទូលាយហៅកាត់ថា OGP។ OGP គឺជាឧបករណ៍ថ្មីមួយដែលទើបតែបង្កើតឡើងនៅឆ្នាំ២០១១ ដើម្បីជំរុញឲ្យប្រទេសនៅក្នុងពិភពលោក អនុវត្តន៍ការងាររបស់ខ្លួនប្រកបដោយតម្លាភាព គណនេយ្យភាព ចំពោះប្រជាពលរដ្ឋ និងគ្រប់គូភាគី។
ចុះផ្សាយនៅថ្ងៃ៖
ស្តាប់ - ០២:០៤
ភាពជាដៃគូរដ្ឋាភិបាលបើកទូលាយ ហៅកាត់ថា OGP (Open Government Partnership) គឺជាឧបករណ៍ថ្មីមួយ ដែលត្រូវបានបង្កើតឡើងដំបូងនៅឆ្នាំ២០១១ ដោយប្រទេសចំនួន៨ ក្នុងនោះក៏មានប្រទេសនៅតំបន់អាស៊ីអាគ្នេយ៍ចំនួន២ចូលរួមផងដែរ នោះគឺប្រទេសឥណ្ឌូនេស៊ី និងប្រទេសហ្វីលីពីន។
បច្ចុប្បន្ន OGP មានប្រទេសជាសមាជិកចំនួន៦៣ ហើយប្រទេសបារាំងគឺជាសមាជិកចុងក្រោយ។ ចំណែកឯប្រទេសកម្ពុជាវិញ នៅមិនទាន់បានចូលរួមនៅក្នុងប្រទេស OGP នេះនៅឡើយទេ។ ហេតុដូច្នេះហើយ ទើបក្រុមអង្គការសង្គមស៊ីវិលកម្ពុជាចំនួន៥ ដែលមានបក្សសម្ព័ន្ធអង្គការសង្គមស៊ីវិលរាប់សិបទៀត បានជួបពិភាក្សាគ្នារយៈពេលពីរថ្ងៃ នៅក្នុងទីក្រុងភ្នំពេញ ចាប់ពីថ្ងៃទី១៦តុលានេះ ដើម្បីជំរុញនិងលើកទឹកចិត្តដល់រដ្ឋាភិបាលកម្ពុជា ឲ្យចូលជាសមាជិកនៅក្នុងប្រទេស OGP នេះ។
លោក សឿង សារឿន នាយកប្រតិបត្តិគណៈកម្មាធិការសហប្រតិបត្តិការដើម្បីកម្ពុជា(CCC) ដែលដឹកនាំកិច្ចពិភាក្សានេះ នៅឯសណ្ឋាគា Sunway បានបង្ហាញពីសារៈសំខាន់មួយចំនួន នៅពេលដែលប្រទេសកម្ពុជាក្លាយជាសមាជិកនៃប្រទេសភាពជាដៃគូរដ្ឋាភិបាលបើកទូលាយ OGP នេះ ដូចជាការរក្សាកេរ្តិ៍ឈ្មោះរបស់កម្ពុជានៅលើឆាកអន្តរជាតិ ក៏ដូចជាភាពជឿទុកចិត្តរបស់សមាជិករដ្ឋាភិបាល ប្រជាពលរដ្ឋជាម្ចាស់ឆ្នោត និងអ្នកវិនិយោគទុនបរទេស ជាដើម។
ដើម្បីក្លាយជាសមាជិកនៃប្រទេស ភាពជាដៃគូរដ្ឋាភិបាលបើកទូលាយ OGP រដ្ឋាភិបាលនៃប្រទេសនីមួយៗ ត្រូវមានលក្ខណៈវិនិច្ឆ័យចំនួន៤ ទី១ ត្រូវមានតម្លាភាពខាងថវិកា ទី២ ការបើកចំហរផ្នែកព័ត៌មាន ទី៣ ការប្រកាសព្រទ្យសម្បត្តិជាសាធារណៈ និងទី៤ គឺការបើកទូលាយឲ្យប្រជាជន និងអង្គការសង្គមស៊ីវិលចូលរួមនៅក្នុងការពិភាក្សានិងការសម្រេចចិត្តផ្សេងៗ។
ជាមួយនឹងលក្ខណៈវិនិច្ឆ័យទាំង៤នេះ លោក សឿង សារឿន មានជំនឿចិត្តថា កម្ពុជានឹងអាចក្លាយជាសមាជិកទី៦៤ឫ៦៥នៃប្រទេស OGP ក្នុងពេលឆាប់ៗខាងមុខនេះ ដោយយោងទៅលើអ្វីដែលរដ្ឋាភិបាលកម្ពុជាកំពុងបង្ហាញការកែទម្រង់យ៉ាងស៊ីជម្រៅនៅក្នុងរដ្ឋាភិបាលអាណត្តិទី៥នេះ។
បើតាមលោក សឿង សារឿន នៅថ្ងៃចុងក្រោយនៃសិក្ខាសាលារយៈពេល២ថ្ងៃនេះ នឹងមានការអញ្ជើញចូលរួមបិទដោយលោក សក់ សេដ្ឋា រដ្ឋលេខាធិការក្រសួងមហាផ្ទៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ