សហរដ្ឋអាមេរិកនឹងបើកស្ថានទូតរបស់ខ្លួន នាថ្ងៃអាទិត្យនេះ នៅមជ្ឈិមបូព៌ាឡើងវិញ លើកលែងតែនៅយេមែន
សហរដ្ឋអាមេរិកបានប្រកាសឲ្យដឹងកាលពីថ្ងៃសុក្រ ទី៩ខែសីហាថា ខ្លួននឹងបើកស្ថានទូតនិងកុងស៊ុលអាមេរិកទាំងឡាយឡើងវិញ លើកលែងតែនៅយេមែន។ សេចក្ដីសម្រេចចិត្តនេះ ធ្វើឡើងក្រោយពេលអាមេរិកប៉ាន់ប្រមាណឡើងវិញ ពីការគម្រាមកំហែងធ្វើភេរវកម្មរបស់ក្រុមអាល់កៃដា។
ចុះផ្សាយនៅថ្ងៃ៖
ស្តាប់ - ០១:១៩
ក្រោយពីពិនិត្យពិច័យយ៉ាងម៉ត់ចត់ លើការគម្រាមកំហែងធ្វើភេរវកម្មរបស់ក្រុមអាល់កៃដា សហរដ្ឋអាមេរិក កាលពីថ្ងៃសុក្រ ទី៩ខែសីហា បានប្រកាសឲ្យដឹងថា ក្នុងចំណោមស្ថានទូតចំនួន១៩ដែលខ្លួនបានបិទតាំងពីសប្ដាហ៍មុន មានស្ថានទូតចំនួន១៨នឹងបើកធ្វើការឡើងវិញ នៅថ្ងៃអាទិត្យ ទី១១ខែសីហា លើកលែងតែស្ថានទូតនៅប្រទេសយេម៉ែន។
តាមរយៈទីភ្នាក់ងារព័ត៌មានបារាំង AFP អ្នកនាំពាក្យនាយកដ្ឋានស្ថិតិសង្គមអាមេរិក លោកស្រី Jen Psaki ឲ្យដឹងថា ក្រៅពីស្ថានទូតនៅប្រទេសយេម៉ែន ស្ថានកុងស៊ុលអាមេរិក នៅក្រុងឡាហ័រ ភាគខាងកើតប៉ាគីស្ថាន នឹងនៅតែបិទទ្វារជាបន្តទៀត។ អ្នកនាំពាក្យរូបនេះ បញ្ជាក់ថា សហរដ្ឋអាមេរិកនឹងបន្តការឃ្លាំមើលពីការគម្រាមកំហែងធ្វើភេរវកម្មរបស់ក្រុមអាល់កៃដា មុននឹងសម្រេចចិត្តបើកស្ថានទូតនៅប្រទេសយេម៉ែន និងស្ថានកុងស៊ុលនៅក្រុងឡាហ័រ ប្រទេសប៉ាគីស្ថានឡើងវិញ។
បន្ទាប់ពីទទួលបានការគម្រាមកំហែងភេរវកម្មជាច្រើនដែលអាចយកជាការបាន ពីសំណាក់ក្រុមឧទ្ទាមអាល់កៃដាមក អាមេរិកបានសម្រេចចិត្តបិទស្ថានទូតនិងកុងស៊ុល ជាង២0កន្លែង ចាប់តាំងពីថ្ងៃទី៤ខែសីហាមក។
សេចក្ដីសម្រេចរបស់អាមេរិក បិទទ្វារស្ថានទូតនិងស្ថានកុងស៊ុលនេះ បានជះឥទ្ធិពលពាសពេញពិភពអារ៉ាប់ និងបានលាតសន្ធឹងទៅដល់ផ្នែកខ្លះនៃឧបទ្វីបអាហ្វ្រិកថែមទៀតផង។ បណ្ដាបស្ចិមប្រទេសដូចជា បារាំង អង់គ្លេស និងអាល្លឺម៉ង់ ក៏បានប្រកាសបិទទ្វារស្ថានទូតរបស់ខ្លួន នៅទីក្រុងសាណា ប្រទេសយេម៉ែនផងដែរ។ ដោយឡែក កាលពីថ្ងៃអាទិត្យសប្ដាហ៍មុន កាណាដា ក៏បានសម្រេចចិត្តបិទស្ថានទូតរបស់ខ្លួន នៅបង់ក្លាដែស ដូចគ្នាដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ