ប្រទេសស៊ូដង់ខាងត្បូងកកើតហើយ ប៉ុន្តែក្តីបារម្ភពីសង្គ្រាមក៏ចាប់មានដែរ
ថ្ងៃនេះជាថ្ងៃប្រវត្តិសាស្ត្រសម្រាប់ទ្វីបអាហ្វ្រិក ដោយហេតុថាប្រជាជាតិមួយថ្មីបានចាប់បដិសន្ធិ ពោលគឺស៊ូដង់ខាងត្បូងបានក្លាយទៅជាប្រទេសទី១៩៣នៅលើពិភពលោក។ ថ្ងៃសៅរ៍ទី៩កក្កដាឆ្នាំ២០១១នេះ ជាថ្ងៃដែលប្រទេសស៊ូដង់ខាងត្បូងប្រកាសឯករាជ្យផ្តាច់ខ្លួនចេញពីទីក្រុងខាទុំ ក្រោយពីបានបោះឆ្នោតធ្វើប្រជាមតិ ទទួលបានសំឡេងឆ្នោតគាំទ្រជិត៩៩%។ ក៏ប៉ុន្តែ ឯករាជ្យនៃប្រទេសស៊ូដង់ខាងត្បូងនេះអាចជួបនឹងបញ្ហាយ៉ាងច្រើន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៤:៣០
ប្រទេសស៊ូដង់ខាងត្បូងមានទង់ជាតិ មានភ្លេងជាតិ មានប្រធានាធិបតី ហើយនិងប្រជាជនជាង៨លាននាក់ដែលមានក្តីសង្ឃឹមយ៉ាងមុតមាំនៅពេលដែលខ្លួនបានសម្រេចផ្តាច់ខ្លួនចេញពីទីក្រុងខាទុំ។ ក៏ប៉ុន្តែ ទីក្រុងជូបា Juba រដ្ឋធានីនៃប្រទេសស៊ូដង់ខាងត្បូងត្រូវប្រឈមមុខធ្វើការដោះស្រាយបញ្ហាសំខាន់ៗជាច្រើន មានជាអាទិ៍បញ្ហារក្សាឲ្យមានសន្តិភាពជាមួយទីក្រុងខាទុំ។ ដោយហេតុថា ទីក្រុងខាទុំពុំសប្បាយចិត្តសោះឡើយ នៅពេលដែលឃើញប្រទេសស៊ូដង់ខាងត្បូងធ្វើការផ្តាច់ខ្លួនចេញបែបនេះ ដែលជាមូលហេតុធ្វើឲ្យគេបាត់បង់ប្រាក់រាប់ពាន់លានដុល្លារដែលជាប្រាក់ចំណូលបានមកពីការលក់ប្រេងកាតដែលមានយ៉ាងច្រើនសន្ធឹកសន្ធាប់នៅប្រទេសស៊ូដង់ខាងត្បូង។
បន្ថែមពីលើការគំរាមទៅលើបញ្ហាសន្តិសុខដោយទីក្រុងខាទុំ ស៊ូដង់ខាងត្បូងដែលជាប្រជាជាតិថ្មោងថ្មីនេះ ក៏នឹងត្រូវផងទៀតធ្វើការប្រឈមមុខទល់នឹងភាពតានតឹងផ្ទៃក្នុងរវាងសហគមន៍ភាគតិចNuer ដែលបានបន្ទោសសហគមន៍ភាគច្រើនDinka ថាបានក្តោបក្តាប់កាន់កាប់មុខតំណែងសំខាន់ៗក្នុងប្រទេស។
បញ្ហាដ៏សំខាន់មួយទៀតដែលរង់ចាំការដោះស្រាយពីសំណាក់អ្នកដឹកនាំនៃប្រទេសស៊ូដង់ខាងត្បូងគឺបញ្ហាអភិវឌ្ឍន៍ប្រទេសជាតិ។ តើគេត្រូវធ្វើការដោះស្រាយការអភិវឌ្ឍន៍ប្រទេសជាតិយ៉ាងដូចម្តេចទៅ? បើប្រជាជនស៊ូដង់ខាងត្បូងមានដល់ទៅ៨០%ពុំចេះសរសេរនិងពុំចេះអាន ហើយមានប្រជាជនដល់ទៅ៩០%ដែលរស់នៅក្រោមខ្សែបន្ទាត់ភាពក្រីក្រ។ ចំណែកឯហេដ្ឋារចនាសម្ព័ន្ធក៏គ្មាន ហើយធនធានមនុស្សដែលជាកត្តាដ៏ចាំបាច់សម្រាប់អភិវឌ្ឍប្រទេសជាតិក៏មានតិចតួចស្តួចស្តើងណាស់។ រីឯអ្នកដែលមានសមត្ថភាពនៅសេសសល់បន្តិចបន្តួចវិញ កំពុងតែជាប់វីវក់ឈ្លក់សប្បាយនឹងអំពើពុករលួយ។ ដូច្នេះឃើញថា ប្រទេសស៊ូដង់ខាងត្បូងដែលទើបនឹងកើតមានជីវិតថ្មីថ្មោងនេះ ពិតជាត្រូវជួបនឹងឧបស័គ្គដ៏ច្រើន។
បញ្ហាព្រំដែនដែលមានប្រវែង២ ០០០គីឡូម៉ែត្រជាមួយប្រទេសខាងជើងក៏ឋិតនៅក្នុងសភាពុំជាក់ច្បាស់។ ដូចគ្នាអ៊ីចឹងដែរ សម្រាប់តំបន់ Abyei ដែលទាមទារដោយប្រទេសស៊ូដង់ខាងត្បូងហើយដែលឋិតនៅក្នុងដែនដីប្រទេសខាងជើង ក៏បានត្រូវគេលើកទៅដាក់មួយអន្លើសិននាឱកាសចុះហត្ថលេខាលើកិច្ចព្រមព្រៀងសរុបដើម្បីសន្តិភាព។
ក្រៅពីការប្រយុទ្ធដណ្តើមគ្នាចង់បានទឹកស្អាតសម្រាប់ទទួលទានប្រើប្រាស់ និង ការប្រយុទ្ធដណ្តើមចង់បានប្រេងកាតដែលមានដល់ទៅ៨០%ដែលឋិតនៅក្នុងប្រទេសស៊ូដង់ខាងត្បូង នៅមានបញ្ហាបំពង់បង្ហូរប្រេងកាតដែលមានចំនួនពីរឆ្លងកាត់ប្រទេសស៊ូដង់ខាងជើងសម្រាប់ធ្វើការនាំចេញទៅលក់ក្រៅប្រទេស។ ពាក់ព័ន្ធនឹងបញ្ហាប្រេងកាតនេះ ទីក្រុងខាទុំបានទាមទារ៥០%នៃប្រាក់ចំណូលដែលបានមកពីការលក់ប្រេងកាត ក៏ប៉ុន្តែទីក្រុងជូបាបានឆ្លើយបដិសេធ។ ក្រោយពីមានការចរចាគ្នារវាងភាគីខាងជើងនិងភាគីស៊ូដង់ខាងត្បូងអស់រយៈពេល៦ឆ្នាំមក អ្វីៗហាក់ដូចជាគ្មានបានចម្រើនទៅមុខអ្វីសោះឡើយ ហើយនាប៉ុន្មានសប្តាហ៍ចុងក្រោយនេះ នៅពេលដែលថ្ងៃប្រកាសឯករាជ្យរបស់ប្រទេសស៊ូដង់ខាងត្បូងខិតកាន់តែជិតមកដល់ ស្រាប់តែស្នូរកាំភ្លើងក៏ចាប់បញ្ចេញសំឡេងរបស់ខ្លួនឲ្យគេលាន់ឮដែរ។
ដូច្នេះឃើញថា ប្រទេសស៊ូដង់ខាងត្បូងបានចាប់បដិសន្ធិហើយ ប៉ុន្តែការបារម្ភពីសង្គ្រាមក៏ចាប់មានផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ