សង្គមស៊ីវិលបន្តអំពាវនាវឲ្យគណបក្សនយោបាយធំៗទាំងពីរជួបចរចារគ្នាជាបន្ទាន់
បន្ទប់ស្ថានការណ៍ដែលតំណាងឲ្យសង្គមស៊ីវិលជាង៤០ នៅព្រឹកថ្ងៃចន្ទនេះ បានអំពាវនាវឲ្យគណបក្សនយោយបាយដែលមានអាសនៈក្នុងរដ្ឋសភា ជួបចរចាគ្នាជាបន្ទាន់ និងដោយអត់ធ្មត់ជាអតិបរមាតាមដែលអាចធ្វើទៅបាន ដើម្បីដោះស្រាយបញ្ហាជាប់គាំងនយោបាយនៅកម្ពុជា ក្រោយការបោះឆ្នោត។ ជាការអំពាវនាវដើម្បីកាត់បន្ថយភាពតានតឹង ការបញ្ចៀសការជាប់គាំងនយោបាយ និងទប់ស្កាត់ការប្រទូសរ៉ាយគ្នាក្នុងសង្គម នាពេលអនាគតខាងមុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
ការអំពាវនាវឲ្យមានការជួបប្រជុំរវាងអ្នកនយោបាយកំពូល ដើម្បីដោះស្រាយបញ្ហាជាប់គាំងដោយសន្តិវិធីឲ្យបានឆាប់នេះ បានធ្វើឡើងក្រោយពីអង្គការសង្គមស៊ីវិលទាំងអស់នោះយល់ឃើញថា ស្ថានការណ៏នយោបាយនៅក្រោយការបោះឆ្នោត មានសភាពកាន់តែតានតឹង និងស្មុគស្មាញកាន់តែច្រើនឡើងៗ ខណៈដែលការជួបចរចារវាងតំណាងគណបក្សនយោបាយដែលឈ្នះឆ្នោតទាំងពីរ បានជួបបរាជ័យយ៉ាងតិចចំនួនបីលើករួចមកហើយនោះ។
ថ្លែងនៅក្នុងសន្និសីទសារព័ត៌មាន នៅព្រឹកថ្ងៃទី០២ ខែកញ្ញានះ លោក ធន សារ៉ាយ ប្រធានគណៈកម្មាធិការនាយកខុមហ្វ្រែល ថ្លែងអំពាវនាវថា យើងសូមឲ្យមានការជួបប្រជុំគ្នាជាបន្ទាន់រវាងថ្នាក់ដឹកនាំនយោបាយកំពូល នៃគណបក្សឈ្នះឆ្នោតទាំងពីរឲ្យបានឆាប់ដែលអាចធ្វើទៅបាន ដែលនេះជាជម្រើសប្រសើរបំផុត សម្រាប់ដោះស្រាយបញ្ហានយោបាយដែលកំពុងបន្តឡើងកម្តៅ និងមានភាពតានតឹងនៅពេលនេះ។
លោក ធន់ សារ៉ាយ បានបន្តអំពាវនាវថា នៅពេលនេះ គួរអ្នកនយោបាយមានភាពអត់ធ្មត់ ដោយបន្ថយកម្តៅវោហាស័ព្ទនយោបាយ ដែលងាយបង្កឲ្យមានអំពើហិង្សា ការបន្ថយការចល័តទ័ព និងអាវុធដែលធ្វើឲ្យប្រជាពលរដ្ឋមានការភ័យខ្លាច ការចរចាគ្នាឲ្យបានជាអតិបរមា ដោយយកប្រយោជន៍ជាតិជាធំ ខ្ពស់ជាងប្រយោជន៏របស់គណបក្សខ្លួន។
ជាមួយគ្នានោះ លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជា បានគូសបញ្ជាក់ថា ការជួបចរចាណាមួយនោះ គួរមានការចូលរួមពីមន្ត្រីជាន់ខ្ពស់ ដែលអាចធ្វើការសម្រេចបានភ្លាមៗ ពីគណបក្សប្រជាជនកម្ពុជា និងគណបក្សសង្គ្រោះជាតិ ដើម្បីកុំឲ្យមានការអូសបន្លាយពេលវេលាឥតប្រយោជន៏បន្តទៅទៀត។ លោកបានបន្តថា ការបង្កើតគណៈកម្មការត្រួតពិនិត្យលើការបោះឆ្នោត មិនទាន់ហួសពេលនៅឡើយទេ តែទាមទារឲ្យមានការចរចាជាបន្ទាន់ ដោយកំណត់ពីរបៀបវារៈនៃការចរចាឲ្យបានច្បាស់លាស់ប្រកបដោយសុឆន្ទៈពិតប្រាកដនោះ។
គួររំលឹកថា នារយៈពេលចុងក្រោយនេះ មេដឹកនាំគណបក្សនយោបាយដែលឈ្នះឆ្នោតទាំងពីរបានសរសេរលិខិតឆ្លើយឆ្លងគ្នាជាបន្តបន្ទាប់ រហូតដល់មានព្រះរាជសារអន្តរាគមន៏របស់ព្រះមហាក្សត្រ ដោយអំពាវនាវឲ្យគណបក្សនយោបាយទាំងពីរធ្វើការដោះស្រាយបញ្ហាជាតិ ដោយផ្អែកលើរដ្ឋធម្មនុញ្ញ និងច្បាប់នានារបស់ជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ