លោកនាយករដ្ឋមន្ត្រី ហ៊ុន សែន ប្រាប់រដ្ឋមន្ត្រី ឲ្យចូលរដ្ឋសភា ឆ្លើយសំណួររបស់អ្នកតំណាងរាស្ត្រ
នៅព្រឹកថ្ងៃសុក្រនេះ ក្នុងកិច្ចប្រជុំគណៈរដ្ឋមន្ត្រី លោកនាយករដ្ឋមន្ត្រី ហ៊ុន សែន បានប្រាប់ដល់រដ្ឋមន្ត្រី ឲ្យចូលរដ្ឋសភា ដើម្បីឆ្លើយនូវរាល់សំណួររបស់អ្នកតំណាងរាស្ត្រ។ ជាការលើកឡើង ដែលបានធ្វើឡើងតែប៉ុន្មានថ្ងៃប៉ុណ្ណោះ បន្ទាប់ពីក្រុមអ្នកតំណាងរាស្រ្តគណបក្សប្រឆាំង បានដាក់លិខិត ៣ ច្បាប់ ដើម្បីកោះអញ្ជើញលោក ស ខេង រដ្ឋមន្ត្រីក្រសួងមហាផ្ទៃ លោក ស៊ុយ សែម រដ្ឋមន្ត្រីក្រសួងឧស្សាហកម្ម និងលោក ឌិត មន្ទីរ ប្រធានតុលាការកំពូល និងជាប្រធានក្រុមប្រឹក្សាវិន័យនៃឧត្តមក្រុមប្រឹក្សានៃអង្គចៅក្រមដើម្បីចូលឆ្លើយបំភ្លឺដោយផ្ទាល់មាត់ ជុំវិញបញ្ហាមិនប្រក្រតីមួយចំនួន របស់ប៉ូលិស តុលាការ និងការរុករករ៉ែ ព្រមទាំងការសាងសង់វារីអគ្គិសនីជាដើម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៤
នៅក្នុងកិច្ចប្រជុំពេញអង្គគណៈរដ្ឋមន្ត្រី នាព្រឹកថ្ងៃសុក្រនេះ លោកនាយករដ្ឋមន្ត្រី ហ៊ុន សែន បានមានប្រសាសន៍ថា ការជជែកដេញដោល គួរតែត្រូវបានធ្វើឡើងឲ្យបានច្រើន នៅក្នុងរដ្ឋសភា ហើយសមាជិករដ្ឋាភិបាល ពិសេសរដ្ឋមន្ត្រី ក៏គួរតែទៅកាន់រដ្ឋសភា ដើម្បីឆ្លើយតបចំពោះរាល់សំណួររបស់អ្នកតំណាងរាស្ត្រ។ នេះបើតាមលោក ខៀវ កាញារីទ្ធ អ្នកនាំពាក្យរាជរដ្ឋាភិបាល និងជារដ្ឋមន្ត្រីក្រសួងព័ត៌មាន បានសរសេរជាភាសាអង់គ្លេស ហើយបង្ហោះក្នុង Facebook របស់លោក នៅព្រឹកមិញ។
ការលើកឡើងរបស់លោកនាយករដ្ឋមន្ត្រី ហ៊ុន សែន ដូច្នេះ ត្រូវបានធ្វើឡើង តែមួយសប្តាហ៍ប៉ុណ្ណោះ ក្រោយពីក្រុមអ្នកតំណាងរាស្ត្រគណបក្សសមរង្ស៊ី និងគណបក្សសិទ្ធិមនុស្ស បានចុះហត្ថលេខា លើលិខិតអញ្ជើញចំនួនបីច្បាប់ ផ្ញើជូនលោកនាយករដ្ឋមន្ត្រី ហ៊ុន សែន ដើម្បីស្នើអនុញ្ញាតឲ្យលោក ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងអញ្ជើញលោក ស៊ុយ សែម រដ្ឋមន្ត្រីក្រសួងឧស្សាហកម្ម រ៉ែ និងថាមពល ដើម្បីចូលឆ្លើយបំភ្លឺផ្ទាល់មាត់នៅក្នុងរដ្ឋសភា ជុំវិញបញ្ហាមិនប្រក្រតីមួយចំនួន ក្នុងរឿងផ្តល់អត្តសញ្ញាណប័ណ្ណ ការធ្វើលិខិតឆ្លងដែនជូនពលករខ្មែរ អំពើពុករលួយក្នុងវិស័យចរាចរណ៍ និងការគ្រប់គ្រងជនអន្តោប្រវេសន៍ ព្រមទាំងការផ្តល់អាជ្ញាប័ណ្ណរុករករ៉ែ និងការសាងសង់ទំនប់វារីអគ្គិសនី ជាដើម។
ក្រុមអ្នកតំណាងរាស្ត្រគណបក្សប្រឆាំង ក៏បានដាក់លិខិតដាច់ដោយឡែកមួយទៀត ជូនលោក ឌិត មន្ទីរ ប្រធានតុលាការកំពូល និងជាប្រធានក្រុមប្រឹក្សាវិន័យ នៃឧត្តមក្រុមប្រឹក្សានៃអង្គចៅក្រម ដើម្បីស្នើអញ្ជើញលោក ឲ្យមករដ្ឋសភា ឆ្លើយបំភ្លឺពីតួនាទី ក្នុងការដាក់វិន័យលើចៅក្រមមួយចំនួន ដែលប្រើប្រាស់ស្ថាប័នតុលាការ ដើម្បីកាត់សេចក្តីលម្អៀងបម្រើបក្ស និងពុករលួយ។
លិខិតរបស់អ្នកតំណាងរាស្ត្រទាំងនោះ ត្រូវបានប្រធានរដ្ឋសភា លោក ហេង សំរិន ចុះហត្ថលេខា បញ្ជូនទៅកាន់លោកនាយករដ្ឋមន្ត្រី ហ៊ុន សែន និងលោក ឌិត មុន្ទីរ កាលពីថ្ងៃទី២៨ ខែធ្នូ ឆ្នាំ២០១២។ ក៏ប៉ុន្តែមិនទាន់មានការកំណត់ពេលវេលា ដើម្បីឲ្យរដ្ឋមន្ត្រី និងប្រធានតុលាការកំពូល ចូលឆ្លើយបំភ្លឺ ទៅនឹងរាល់សំណួររបស់ក្រុមអ្នកតំណាងរាស្ត្របក្សប្រឆាំងនៅឡើយទេ។
ក្នុងកិច្ចប្រជុំគណៈរដ្ឋមន្ត្រី នៅព្រឹកមិញ រដ្ឋាភិបាលក៏បានអនុម័តលើសេចក្តីព្រាងច្បាប់ ស្តីពី វិសោធនកម្មមាត្រា៩ និងមាត្រា១០ នៃច្បាប់ស្តីពីសហលក្ខន្តិកៈមន្ត្រីរាជការស៊ីវិល នៃព្រះរាជាណាចក្រកម្ពុជា សេចក្តីព្រាងព្រះរាជក្រឹត្យ ស្តីពី ការផ្តល់ឋានៈសាស្ត្រាចារ្យ សេចក្តីព្រាងអនុក្រឹត្យ ស្តីពីក្រមសីលធម៌ឆ្មប។
នៅព្រឹកមិញ លោកនាយករដ្ឋមន្ត្រី ហ៊ុន សែន ក៏បានណែនាំឲ្យក្រុមប្រឹក្សាកំណែទម្រង់រដ្ឋបាល និងក្រសួងសេដ្ឋកិច្ចនិងហិរញ្ញវត្ថុ ពិភាក្សាកែសម្រួលតម្លើងបៀវត្សជូនមន្ត្រីរាជការ ដែលស្ថិតក្នុងក្របខ័ណ្ឌ “ឃ” ឲ្យបានខ្ពស់ជាងសព្វថ្ងៃ ដើម្បីកាត់បន្ថយគម្លាតជាមួយបៀវត្សមន្ត្រីរាជការក្នុងក្របខ័ណ្ឌ “ក” ឲ្យបានតិច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ