អគ្គិភ័យនៅសាលាអ៊ីស្លាម ៖ គ្រោះចៃដន្យ ឬ ចេតនាហិង្សាសហគមន៍ ?
មានស្លាប់យ៉ាងហោចណាស់១៣ នាក់ ភាគច្រើនជាកុមារ នៅថ្ងៃអង្គារនេះ ក្នុងគ្រោះអគ្គិភ័យឆេះសាលាអ៊ីស្លាមមួយ នៅក្រុងរ៉ង់ហ្គូន ! ក្តីព្រួយបារម្ភកាន់តែរីកធំធាត់សម្រាប់សហគមន៍អ្នកកាន់សាសនាអ៊ីស្លាម ទោះបីអាជ្ញាធរបានធានាអះអាងថាឧប្បត្តិហេតុចៃដន្យក៏ដោយ ព្រោះហេតុការណ៍នេះប្រព្រឹត្តនៅក្នុងបរិបទដែលភូមាកំពុងពើបប្រទះនឹងអំពើហិង្សាសាសនារវាងក្រុមអ្នកកាន់ពុទ្ធសាសនា និងអ៊ីស្លាម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
រដ្ឋាភិបាលភូមា បានប្រកាសអំពាវនាវភ្លាមៗមិនឱ្យបណ្តាជនជឿពាក្យ “ចចាមអារាម” ផ្សព្វផ្សាយក្នុងប្រព័ន្ធសង្គម Facebook ហើយប៉ូលិសជាតិបានបកស្រាយពន្យល់តាមបណ្តាញអ៊ីនធឺណែតថា គ្រោះអគ្គិភ័យឆេះសាលាអ៊ីស្លាម ព្រលឹមអុលព្រឹកមិញ បណ្តាលមកពីបញ្ហាអគ្គីសនី។ នេះបើយោងតាមលទ្ធផលអង្កេតរបស់ប៉ូលិសសង្កាត់។
តំណាងសហគមន៍អ៊ីស្លាម បានចូលជួបអាជ្ញាធរក្រុង នៅព្រឹកមិញ ដើម្បីទាមទារឱ្យមានការអង្កេតស៊ីជម្រៅ ថាពិតជាឧប្បត្តិហេតុ ឬជាបទឧក្រិដ្ឋកម្មចេតនា ព្រោះបើតាមអ្នកទទួលខុសត្រូវមើលក្មេង នៅពេលរត់គេចភ្លើង កូនសិស្សនិងគ្រូខ្លះរអិលលើវត្ថុរាវដែលមានក្លិននិងសណ្ឋាន ដូចប្រេងសាំង ឬម៉ាហ្សូត។
អំពើហិង្សាជាតិសាសន៍រវាងក្រុមអ្នកកាន់ពុទ្ធសាសនា និងអ៊ីស្លាម បានផ្ទុះឡើងជាបន្តបន្ទាប់ ដំបូងនៅថ្ងៃទី ២០មីនា នៅក្រុង ម៉ីទិឡា ភាគកណ្តាលប្រទេស រួចរាលដាលទៅ តំបន់ផ្សេងៗទៀត រហូតទាល់តែប្រើកម្លាំងទាហានគ្រប់គ្រង។ អំពើហិង្សានោះបានសម្លាប់ជីវិតមនុស្ស អស់សរុប៤៣នាក់ និងផ្ទះសម្បែងរាប់សិបខ្នងបានក្លាយគំនរផេះ។ ក្នុងស្ថានភាពបែបនេះ សហគមន៍អ្នកកាន់សាសនាអ៊ីស្លាមនៅរ៉ង់ហ្គូន មិនអាចអត់ គិត ថាអគ្គិភ័យនៅវេលាម៉ោងបីទាបភ្លឺព្រឹកមិញ ជាអំពើចេតនារបស់អ្នកជ្រុលនិយមមួយក្រុមណាបានឡើយ។
អតីតរដ្ឋធានីរ៉ងហ្គូន កំពុងព្រួយបារម្ភខ្លាចជំងឺហិង្សាសាសនារាលដាលមកដល់។ ចំណែករដ្ឋាភិបាលភូមាផ្ទាល់ក៏ទំនងជាមិនស្រួលខ្លួនប៉ុន្មានដែរ លោកប្រធានាធិបតី ថេន សេន បានថ្លែងកាលពីថ្ងៃព្រហស្បតិ៍ម្តង និងថ្ងៃអាទិត្យម្តងទៀត ថានឹងដាក់ទោសលើក្រុមជ្រុលនិយម ប៉ុន្តែមិនបានដៅចំទៅលើក្រុមណាមួយឡើយ។ សូមបញ្ជាក់ថា អ៊ីស្លាមនិយមជ្រុលមាននៅគ្រប់ទិសទីលើពិភពលោក ឯក្រុមពុទ្ធសាសនានិយមជ្រុល ត្រូវបានគេស្គាល់ថាមានប្រវត្តិដើមកំណើតនៅភូមា ជាងប្រទេសកាន់ពុទ្ធសាសនាផ្សេងទៀតក្នុងតំបន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ