ប្រធានាធិបតីហ្វីលីពីនធ្វើទស្សនកិច្ចនៅអឺរ៉ុបរកបង្អែក ដើម្បីតតាំងជាមួយចិន
ប្រធានាធិបតីហ្វីលីពីន លោក អាគីណូ បានចាប់ផ្តើមធ្វើទស្សនកិច្ចនៅអឺរ៉ុបចាប់ពីថ្ងៃសៅរ៍ ទី ១៣ កញ្ញា។ ក្រៅអំពីគម្រោង រឹតចំណងសាមគ្គីភាព និងទំនាក់ទំនងពាណិជ្ជកម្មរវាងហ្វីលីពីន និងប្រទេសមួយចំនូនក្នុងសហភាពអឺរ៉ុប ប្រធានាធិបតីហ្វីលីពីន មានគម្រោងស្វែងរកការគាំទ្រពីប្រទេសអឺរ៉ុប ក្នុងការតទល់ជាមួយចិន ព្រោះថាចិន និងហ្វីលីពីន ដណ្តើមគ្នាកាន់កាប់កោះមួយចំនួន ស្ថិតក្នុងតំបន់ដែលសំបូរប្រេងក្នុងបាតសមុទ្រ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤០
លោកប្រធានាធិបតីហ្វីលីពីន អាគីណូ បានចាប់ផ្តើមធ្វើទស្សនកិច្ចនៅអេស្ប៉ាញ កាលពីថ្ងៃ សៅរ៍ ទី១៣ មុននឹងបន្តទស្សនកិច្ចនេះទៅប៊ែលហ្ស៊ីក បារាំង និងអាល្លឺម៉ង់។ គួរបញ្ជាក់ថា ពីមុន ប្រទេសនៅអឺរ៉ុបយល់ថា ហ្វីលីពីនគ្រាន់តែជាកូនអុករបស់អាមេរិក គ្មានប្រយោជន៍ធំដំសម្រាប់គេទេ។ ប៉ុន្តែប៉ុន្មានឆ្នាំចុងក្រោយនេះ គេឃើញមានក្រុមហ៊ុន សហគ្រាសអឺរ៉ុបមួយចំនួន បានចេញទៅបោះទុនរកស៊ីនៅហ្វីលីពីន។
ទន្ទឹមនឹងគោលដៅរឹតចំណងមិត្តភាព និងទំនាក់ទំនងពាណិជ្ជកម្មជាមួយអឺរ៉ុប លោកអាគីណូ មកនេះក្នុងគោលដៅសំខាន់មួយទៀត គឺចង់បានការជួយទំនុកបម្រុងផ្លូវការទូត របស់ប្រទេសអឺរ៉ុប ដូចជាបារាំង អាល្លឺម៉ង់ និងសហភាពអឺរ៉ុប ដើម្បីតទល់ជាមួយចិន។ ហ្វីលីពីន ក៏ដូចជាប្រទេសមួយចំនួនទៀតក្នុងតំបន់ កំពុងមានជម្លោះជាមួយចិន ក្នុងការដណ្តើមគ្នាកាន់កាប់កោះមួយចំនួន ក្នុងសមុទ្រចិនខាងត្បូង។ នៅក្រោមបាតសមុទ្រនៅតំបន់នោះ សម្បូរទៅដោយប្រេង និងឧស្ម័នធម្មជាតិយ៉ាងសន្ធឹកសន្ធាប់។
សូមរំលឹកផងដែរថា ហ្វីលីពីន មានកំណើនសេដ្ឋកិច្ចល្អប្រសើរ ប្រមាណជា ៦ភាគរយ ជារៀងរាល់ឆ្នាំ។ ប៉ុន្តែអ្នកវិភាគសង្កេតឃើញថា ផលវិជ្ជមានសេដ្ឋកិច្ចបានទៅដល់តែមនុស្សមួយចំនួនតូច ដែលជាពួកអ្នកមានតែប៉ុណ្ណោះ។ ប្រជាជនហ្វីលីពីនជាងមួយភាគបី រស់នៅក្នុងភាពតោកយ៉ាកជាទីបំផុត។ អំពើពុករលួយស៊ីរូង គឺជាវិបត្តិយ៉ាងធ្ងន់ធ្ងរ ដែលធ្វើឲ្យការបែងចែកការរីកចំរើនសេដ្ឋកិច្ចគ្មានសមភាព។ មួយវិញទៀត ការអនុវត្តន៍លទ្ធិប្រជាធិបតេយ្យ នៅមានភាពផុយស្រួយនៅឡើយ។ ថ្នាក់ដឹកនាំ ក៏ដូចជាអ្នកមានអំណាច សុទ្ធសឹងតែចេញពីត្រកូលអ្នកមាននៅហ្វីលីពីន ហើយបក្សពួក និងគ្រូសារនិយមជាដំបៅ ដែលមានក្នុងសង្គមហ្វីលីពីនព្យាបាលមិនបាន។ តួយ៉ាង លោក ប្រធានាធិបតី អាគីណូ នេះផ្ទាល់តែម្តង គឺជាមនុស្សដែលមកពីត្រកូលអ្នកមានស្តុកស្តម្ភ។ ដើម្បីអាចបន្ត ឈរឈ្មោះបោះឆ្នោតនៅអាណត្តិក្រោយ ឆ្នាំ២០១៦ លោកអាគីណា ថានឹងធ្វើការកែប្រែរដ្ឋធម្មនុញ្ញ។ ស្តាប់ទៅ គាត់ចង់កាត់កង តម្រឹមរដ្ឋធម្មនុញ្ញដូចជាកាត់ខោអាវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ