ចលនានិស្សិតបដិសេធលែងចរចាជាមួយរដ្ឋាភិបាលហុងកុង ក្រោយអំពើហិង្សាលើបាតុករ
ចលនាបាតុកម្ម នៅហុងកុងបានឈានចូលដល់ដំណាក់កាលថ្មី កាន់តែតានតឹង។ នៅយប់ថ្ងៃសុក្រទៅ ៣ តុលា ជាលើកទីមួយ ក្រោយការបង្ក្រាបរបស់ប៉ូលិសលើបាតុករ ការប៉ះទង្គិចហិង្សាមួយថ្មីទៀតបានផ្ទុះឡើងរវាងហ្វូងនិស្សិត អ្នកគាំទ្រលទ្ធិប្រជាធិបតេយ្យ និងបណ្តាជនហុងកុងដែលមិនសប្បាយចិត្តនឹងចលនាបាតុកម្មនិស្សិត។ ចលនានិស្សិតបានចោទប្រកាន់ក្រុងប៉េកាំងថាជាអ្នករៀបចំប្រើមនុស្សពីចម្ងាយឱ្យមកបញ្ចេះអំពើហិង្សា និងបានបដិសេធលែងធ្វើការចរចាជាមួយរដ្ឋាភិបាលហុងកុង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៥
បាតុករនិស្សិតនៅតែបន្តបោះជំរំ កាន់កាប់ទីតាំងផ្លូវថ្នល់សំខាន់ៗ និងមជ្ឈមណ្ឌលពាណិជ្ជកម្មកណ្តាលក្រុងទៀត និងកំពុងចោទសួរខ្លួនឯងថាតើក្រុមមនុស្សពាក់មុខ បង្កអំពើហិង្សាកាលពី យប់ ជានរណា ?! មានគ្នាប្រមាណជាង១០នាក់ អាយុខ្ទង់ហា ក្រុមមនុស្សបិទមុខបានស្រែកបណ្តេញ គប់ដប រុះជំរំតង់ និងបានប្រើកម្លាំងមកលើក្រុមនិស្សិត ... រហូតដល់តែមានអន្តរាគមន៍ពីប៉ូលិស។ មានមនុស្ស១៩នាក់ត្រូវចាប់ខ្លួន និងអ្នករបួសជាងដប់នាក់។
ហេតុការណ៍ចម្លែកដែលបានជំរុញឱ្យមេដឹកនាំចលនានិស្សិត បង្ខំចិត្តកាត់ផ្តាច់ការចរចាជាមួយនឹងរដ្ឋាភិបាលហុងកុង។ សម្រាប់ក្រុមអ្នកប្រជាធិបតេយ្យ គេមានសាក្សីច្រើនអាចចោទប្រកាន់បានថារដ្ឋាភិបាលហុងកុង និងប៉េកាំង ជាអ្នករៀបចំ ញុះញង់ឱ្យមានឆាកឈុតហិង្សាដោយបានប្រើពួកMafia មកបំបែកហ្វូងបាតុករ។ ក្រុមMafia រកស៊ីជួញដូរអាភៀន ពេស្យចារ លាងលុយ តែមកដល់ហុងកុងបានធ្វើវិនិយោគកាន់តែច្រើនឡើងៗក្នុងវិស័យអចលនទ្រព្យនិងហិរញ្ញវត្ថុ។ អង្គការការពារសិទ្ធិមនុស្ស Amnesty International បានថ្កោលទោសភាពស្ពឹកស្រពន់របស់ក្រុមប៉ូលិសដែលបានចេញបង្ក្រាបយ៉ាងស្លូតបូតបំផុត បណ្តោយទុកឱ្យជនបិទមុខបំផ្លិចបំផ្លាញនិងធ្វើបាបនិស្សិតក្មេងស្រេចចិត្ត។
ប៉ុន្តែអាជ្ញាធរហុងកុងបានច្រានចោលការចោទប្រកាន់ទាំងអស់នោះ និងបានអះអាងថាគ្មានទំនាក់ទំនង ឬខ្ចីដៃពួកMafiaចិន ដើម្បីមកបំបែកបាតុករឡើយ។ ចំណែកខាងប៉េកាំងវិញ ក្រៅពីការបិទខ្ទប់ ហាមឃាត់ប្រព័ន្ធឃោសនាព័ត៌មាន អស់មួយសប្តាហ៍មិនឱ្យបរិយាយអំពីហេតុការណ៍បាតុកម្មនៅហុងកុង របបកុម្មុយនិស្តបានចេញបំពងឃោសនានយោបាយ ទម្លាក់កំហុសលើចលនាបាតុកម្ម លើកឡើងអំពីផលវិបាកដែលបង្កឡើយដោយចលនានិស្សិត ទៅលើសេដ្ឋកិច្ចហុងកុង ៖ សាលារៀនបិទ មធ្យោបាយធ្វើដំណើររអាក់រអួល ចំនួនទេសចរធ្លាក់ចុះ ភាគហ៊ុនបាត់តម្លៃ ប្រជាជនមិនសប្បាយចិត្ត អនាគតហុងកុងកំពុងរងការគំរាមកំហែងយ៉ាងខ្លាំង។
គ្រប់សារព័ត៌មានផ្លូវការចិន ចាប់ផ្តើមបំផុសព័ត៌មានថាចលនានិស្សិតហុងកុង ចម្លងទ្រឹស្តីពីបរទេស ចង់ទាមទារឯករាជ្យឱ្យហុងកុង។ ពាក្យចចាមអារាមមួយទៀតដែលគ្មានចុះផ្សាយក្នុងទំព័រកាសែតចិន នោះគឺសង្គ្រាមបក្សពួក។ ដោយខ្លាចរងផលប៉ះពាល់ពីយុទ្ធនាការប្រយុទ្ធប្រឆាំងនឹងអំពើពុករលួយ មេដឹកនាំចិនពុករលួយខ្លះទំនងជាចង់ឃើញហុងកុងរង្គោះរង្គើ ជះឥទ្ធិពលដល់ចិនដីគោក ពោលគឺកាត់បន្ថយអំណាចរបស់រដ្ឋាភិបាលកណ្តាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ