ជនរងគ្រោះ ក្នុងរបបខ្មែរក្រហម អះអាងថាមានសម្ពាធច្បាប់នៅតុលាការ
ជនរងគ្រោះ ក្នុងរបបខ្មែរក្រហម ជាដើមបណ្តឹងរដ្ឋប្បវេណី បានប្រកាសថា ខ្លួន និងមេធាវី ទទួលសម្ពាធច្បាប់ បាត់បង់ឱកាស មិនអាចនិយាយស្តី លើកបង្ហាញពីការឈឺចាប់បានឡើយ។ តាមជនរងគ្រោះ សម្ពាធច្បាប់នៅតុលាការខ្មែរក្រហម ធ្វើឡើងដោយមេធាវីនាំមុខ បរទេស ដែលបានប្រើវិធី វាស់ដីឲ្យដើរ តាមរយៈការហាមឃាត់ មិនឲ្យមេធាវីរបស់ជនរងគ្រោះ លើកយកបញ្ហាឧក្រិដ្ឋកម្មប្រល័យពូជសាសន៍ មកនិយាយក្នុងសាលាក្តីឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
តំណាងឲ្យជនរងគ្រោះ ក្នុងរបបខ្មែរក្រហម ជាដើមបណ្តឹងរដ្ឋប្បវេណី ២០ រូប ហើយមាន ៨ រូប ជាខ្មែរ រស់នៅប្រទេសបារាំង លោក ឆាយ ហុកផេង ជាចៅក្រមនៅប្រទេសបារាំង បានថ្លែងសារទុក្ខចំពោះមុខអ្នកកាសែត កាលពីព្រឹកថ្ងៃសុក្រ ទី១វិច្ឆិកានេះ។ លោក ឆាយ ហុកផេង បានអះអាងថា មេធាវីនាំមុខបរទេស បានហាមឃាត់ មិនឲ្យមេធាវីរបស់ជនរងគ្រោះ ជាដើមបណ្តឹងរដ្ឋប្បវេណី លើកយកបញ្ហាឧក្រិដ្ឋកម្មប្រល័យពូជសាសន៍ មកនិយាយក្នុងសាលាក្តី កាលពីថ្ងៃទី១៦តុលា។
មេធាវីនាំមុខ មានពីររូប ជាតិ និងបរទេស ដើម្បីគ្រប់គ្រងលើក្រុមមេធាវីជាតិ និងបរទេស ដែលការពារជនរងគ្រោះ។ ការហាមឃាត់របស់មេធាវីនាំមុខបរទេសដូច្នេះ ត្រូវបានលោក ឆាយ ហុកផេង ដែលជាចៅក្រម នៅប្រទេសបារាំង ចាត់ទុកថា ជាអំពើផ្តាច់ការ និងហ៊ុំព័ទ្ធសិទ្ធិរបស់លោក ជាជនរងគ្រោះ។
ឧក្រិដ្ឋកម្មប្រល័យពូជសាសន៍ ក្នុងរបបខ្មែរក្រហម ត្រូវបានលោក ឆាយ ហុកផេង លើកឡើងថា បានកើតឡើងលើប្រជាជនថ្មី ឬប្រជាជន ១៧មេសា ដែលរងការជម្លៀសដោយបង្ខំ មិនត្រឹមតែកើតឡើងលើប្រជាជនចាម វៀតណាម និងខ្មែរកម្ពុជាក្រោម ដូចតុលាការបានកំណត់នោះទេ។
ចំណែកលោកមេធាវី ហុង គឹមសួន ដែលការពារក្តីជនរងគ្រោះ រួមទាំងការពារក្រុមលោក ឆាយ ហុកផេង បានត្អូញត្អែរពីការរឹតត្បិត តាមរយៈការគ្រប់គ្រងពីមេធាវីនាំមុខ នៅសាលាក្តី។ តាមលោកមេធាវី រាល់ឯកសារភស្តុតាង និងការឡើងថ្លែងការណ៍ ជាដើម ត្រូវតែមានការអនុញ្ញាត យល់ព្រមពីមេធាវីនាំមុខ។
មេធាវីនាំមុខនៅសាលាក្តីខ្មែរក្រហម មិនអាចទាក់ទងបានទេ នៅថ្ងៃនេះ។ ប៉ុន្តែការកំរិតដែនកំណត់នៃការនិយាយស្តីរបស់ក្រុមមេធាវីការពារជនរងគ្រោះ និងការយល់ព្រមលើសំណើឯកសារ ដាក់ទៅកាន់សាលាក្តី ជាដើមនោះ គឺមេធាវីនាំមុខ អនុវត្តតាមច្បាប់ និងសេចក្តីណែនាំរបស់ចៅក្រម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ