លោកអាសេនី៖អ៊ុយក្រែននឹងមិនយល់ព្រមប្រគល់ដីឲ្យរុស្ស៊ីជាដាច់ខាត សូម្បី១សង់ទីម៉ែត្រក្តី
នៅថ្ងៃអាទិត្យ ទី៩ មីនា លោកនាយករដ្ឋមន្រ្តីអ៊ុយក្រែន អាសេនី (Arseni) បានថ្លែងថា អ៊ុយក្រែននឹងមិនយល់ព្រមប្រគល់ដីឲ្យរុស្ស៊ីជាដាច់ខាត សូម្បីតែ ១សង់ទីម៉ែត្រក៏គ្មានដែរ។ ការថ្លែងរបស់ប្រមុខរដ្ឋាភិបាលអ៊ុយក្រែនពេលនេះបានធ្វើឡើង ចំពេលដែលតំបន់ស្វ័យតគ្រីមេរបស់អ៊ុយក្រែនត្រូវបានកងទ័ពរុស្ស៊ីចូលកាន់កាប់តំាងពីដំណាច់ខែកុម្ភៈកន្លងទៅ។ លោកអាសេនីដែលគ្រោងចេញទៅបំពេញទស្សនកិច្ចនៅអាមេរិកដើម្បីនិយាយពីវិបត្តិអ៊ុយក្រែន ពិសេសដែនដីគ្រីមេដែលរុស្ស៊ីកំពុងទន្ទ្រានយក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
« គឺជាទឹកដីរបស់យើងដែលយើងនឹងមិនប្រគល់ឲ្យជាដាច់ខាត សូម្បីតែ១សង់ទីម៉ែត្រក៏ដោយក្តី។ ចូរប្រទេសរុស្ស៊ី និងប្រធានាធិបតីពូទីនយល់ឲ្យបានច្បាស់ » នេះជាការថ្លែងរបស់លោកប្រមុខរដ្ឋាភិបាលអ៊ុយក្រែនអាសេនី (Arseni) ក្នុងឱកាសពិធីប្រារព្ធខួបកំណើតទី ២០០ឆ្នំារបស់កវីអ៊ុយក្រែនដ៏ល្បីឈ្មោះម្នាក់ គឺលោក តារាស ឆឺវឆេនកូ (Taras Chevtchenko) ដែលជានិមិត្តរូបនៃឯករាជ្យភាពប្រទេសអ៊ុយក្រែន។ លោកអាសេនីបានគូសបញ្ជាក់បន្ថែមថា រដ្ឋាភិបាលទីក្រុងគៀវនឹងព្យាយាមដោះស្រាយវិបត្តិតាមផ្លូវនយោបាយ និងការទូត
សម្រាប់លោកអាសេនី អ៊ុយក្រែនបាន និងកំពុងប្រឈមមុខនឹងវិបត្តិដ៏ធ្ងន់ធ្ងរជាប្រវត្តិសាស្រ្តមួយតំាងពីខ្លួនបានទទួលឯករាជ្យមក។ ទន្ទឹមគ្នានេះ លោកប្រមុខរដ្ឋាភិបាលអ៊ុយក្រែនក៏បានអំពាវនាវសុំឲ្យសហរដ្ឋអាមេរិក និងប្រទេសអង់គ្លេសធ្វើអ្វីៗគ្រប់បែបយ៉ាងទំាងអស់ដែលអាចធ្វើបាន ដើម្បីជួយរក្សាការពារឯករាជ្យភាពរបស់អ៊ុយក្រែន។ យោងតាមលោកអាសេនី គឺអាមេរិក និងអង់គ្លេសនេះហើយដែលបានចេញមុខធានារ៉ាប់រងនូវបូរណភាពដែនដីអ៊ុយក្រែន នៅពេលដែលអតីតរដ្ឋសហភាពសូវៀតមួយនេះបានសម្រេចចិត្តបោះបង់ចោលអាវុធនុយក្លេអ៊ែរក្នុងឆ្នំា ១៩៩៤។
ចំណែកលោកប្រធានាធិបតីស្តីទីអ៊ុយក្រែនអូឡិចសង់ ទួរឈីនូវ (Olexandre Tourtchinov) បានគូសបញ្ជាក់ថា ពាក្យមួយឃ្លាដ៏ល្បីល្បាញរបស់កវី តារាស ឆឺវឆេនកូ (Taras Chevtchenko) ដែលថា « ចូរអ្នកក្រោកឡើងតស៊ូ អ្នកប្រាកដជាបានទទួលជោគជ័យ » បានក្លាយជាពាក្យស្លោករបស់រដ្ឋអំណាចថ្មីនៃសម័យអ៊ុយក្រែនបច្ចុប្បន្ន។ គឺកវីតារាស ឆឺវឆេនកូ (Taras Chevtchenko) រូបនេះឯងដែលកាលពីសតវត្សទី១៩ បានបរិហារពីទង្វើជិះជាន់សង្កត់សង្កិនរបស់រស្ស៊ីទៅលើប្រជាជនអ៊ុយក្រែន។
នៅក្នុងឱកាសពិធីប្រារព្ធខួបកំណើតទី ២០០ឆ្នំារបស់កវីអ៊ុយក្រែនតារាស ឆឺវឆេនកូ (Taras Chevtchenko) នាថ្ងៃអាទិត្យម្សិលមិញ មានប្រជាជនអ៊ុយក្រែនរាប់ពាន់នាក់បានជួបជុំគ្នានៅពីមុខរូបសំណាកលោកតារាស ឆឺវឆេនកូ ដោយបាននំាគ្នាច្រៀងភ្លេងជាតិ ព្រមទំាងធ្វើការស្មឹងស្មាធរយៈពេល ១នាទីដើម្បីគោរពវិញ្ញាណក្ខន្ទចំពោះជនរងគ្រោះនៅក្នុងព្រឹត្តិការណ៍បាតុកម្មប្រឆំាងលោកប្រធានាធិបតីអ៊ុយក្រែនលំអៀងខាងរុស្ស៊ី វិកទ័រ អ៊ីយ៉ានូកូវិចក្នុងខែកុម្ភៈកន្លងទៅ។ ទន្ទឹមគ្នានេះ ក៏មានក្បួនបាតុកម្មរបស់ក្រុមអ្នកគំាទ្រ និងអ្នកស្រឡាញ់រុស្ស៊ីនៅក្នុងទីក្រុង Donetsk៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ