ពិភពលោកបែរខ្នងដាក់សង្គ្រាមស៊ីវីលនៅស៊ីរីដែលសម្លាប់មនុស្សជិត ២០ម៉ឺននាក់
យោងតាមតួលេខចុងក្រោយរបស់អគ្គស្នងការជាន់ខ្ពស់ការពារសិទ្ធមនុស្ស នៃអង្គការសហប្រជាជាតិ សង្គ្រាមស៊ីវីលនៅស៊ីរីចាប់តាំងពីដើមឆ្នាំ២០១១ បានសម្លាប់មនុស្សជាង១៩ម៉ឺននាក់។ ចំនួនមនុស្សស្លាប់ដ៏សន្ធឹកសន្ធាប់បែបនេះក៏ពិតមែន ប៉ុន្តែសហគមន៍អន្តរជាតិហាក់ព្រងើយកន្តើយ មិនអើពើជួយស្វែងរកដំណោះស្រាយណាមួយ ដើម្បីបញ្ចប់អំពើហិង្សា និងការកាប់សម្លាប់យ៉ាងសេរី ទៅលើប្រជាជនស្លូតត្រង់ ទាល់តែសោះ។
ចុះផ្សាយនៅថ្ងៃ៖
ស្តាប់ - ០១:៥៣
"មួយសែន ប្រាំបួនម៉ឺន មួយពាន់នាក់" នេះជាតួលេខចុងក្រោយនៃចំនួនអ្នកស្លាប់ នៅក្នុងប្រទេសស៊ីរី ដោយសាតែសង្គ្រាមស៊ីវីលអស់រយៈពេលជាងបីឆ្នាំមកនេះ។ មានន័យថា មួយថ្ងៃៗ មានអ្នកស្លាប់ចំនួន១៨០នាក់។ តួលេខនេះ បានកើនឡើងមួយទ្វេជាពីរ ក្នុងរយៈពេលមួយឆ្នាំចុងក្រោយនេះ។ អ្នកនាំពាក្យឲ្យអង្គការសហប្រជាជាតិ បាននិយាយថា មនុស្សស្លាប់ច្រើនដល់ថ្នាក់នេះមែនពិត តែសហគមន៍អន្តរជាតិហាក់មិនយកភ្នែកមើល និងត្រចៀកស្តាប់ទាល់តែសោះ។ លោកបន្ត ថានេះសបញ្ជាក់ឲ្យឃើញថាសហគមន៍អន្តរជាតិគ្មានសមត្ថភាពក្នុងការដោះស្រាយវិបត្តិនៅស៊ីរីទេ ទុកប្រជាពលរដ្ឋស៊ីរីឲ្យរងទុក្ខវេទនា។
ដូចគ្នាដែរ លោកស្រី នាវី ភីល័យ អគ្គស្នងការនៃឧត្តមស្នងការការពារសិទ្ធិមនុស្សរបស់ អង្គការសហប្រជាជាតិ បានថ្លែងរិះគន់ថា គ្មាននរណាអើពើនឹងចំនួនមនុស្សស្លាប់នៅស៊ីរីទាល់តែសោះ។ លោកស្រីបន្ថែមថា បច្ចុប្បន្ននេះ ប្រជាជនស៊ីរីរាប់លាននាក់ រស់ក្នុងភាពក្រីក្រ តោកយ៉ាកជាទីបំផុត ដោយសាតែសង្គ្រាម ហើយក្នុងនោះ យ៉ាងហោចណាស់ ៩លាននាក់ ដែលត្រូវភៀសខ្លួនចោលផ្ទះសម្បែង ដោយសាតែការវាយប្រហាររបស់ពួកឧទ្ទាមជីហាត។
សូមរំលឹកថា នៅស៊ីរីមានផ្ទុះការបះបោរប្រឆាំងនឹងរបបលោក បាឆា អាល់អាសាដ កាលពីខែមិនា ឆ្នាំ២០១១។ អ្នកប្រឆាំងមានពីរក្រុម ទីមួយជាពួកឧទ្ទាមបះបោរ និងក្រុមមួយទៀតជាពួកជីហាតអ៊ីស្លាមនិយមជ្រុល។ ពួកនេះត្រូវគេដឹងថា ជាក្រុមផ្តាច់ការ ប្រព្រឹត្តអំពើព្រៃផ្សៃទៅលើប្រជាជនស្លូតត្រង់។ បច្ចុប្បន្នក្រុមជីហាតនេះ បានគ្រប់គ្រងដែនដីស៊ីរីមួយភាគធំ ហើយបច្ចុប្បន្នកំពុងធ្វើការវាយលុក កាន់កាប់ដែនដីមួយចំណែកធំទៀតនៅអ៊ីរ៉ាក់។ គោលបំណងរបស់ពួកនេះ គឺប្រមែលប្រមូលកាន់កាប់ទឹកដីក្នុងតំបន់នោះ បង្កើតជារដ្ឋអ៊ីស្លាមផ្តាច់ការមួយ។
កន្លងមកស្ថាប័នអន្តរជាតិបានបរាជ័យម្តងហើយម្តងទៀត ក្នុងការរកដំណោះស្រាយនៅស៊ីរី ដោយសា រុស្ស៊ី និងសហរដ្ឋអេមេរិក ខ្វែងគំនិតគ្នា។ រុស្ស៊ីគាំទ្ររដ្ឋាភិបាលលោក បាឆា អាល់អាសាដ ឯចំណែកអាមេរិកវិញ គាំទ្រពួកឧទ្ទាម។ ក្នុងពេលដែលប្រទេសធំៗ រវល់តែប្រកែកគ្នា ប្រជាជនស៊ីរីជិត២០ម៉ឺននាក់ បានស្លាប់បាត់បង់ជីវិត ដោយគ្មាននរណាចេញមុខមកទទួលខុសត្រូវឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ