ស្រូវខ្មែរអាចឡើងថ្លៃដោយសារនយោបាយថ្មីរបស់ប្រទេសថៃ
នៅក្នុងប្រទេសថៃ គណបក្សជាប់ឆ្នោតថ្មីគ្រោងនឹងបង្កើនតម្លៃស្រូវជូនកសិករថៃ។ ប៉ុន្តែសមាគមនាំអង្ករចេញរបស់ថៃបាននិយាយថា ការបង្កើនថ្លៃស្រូវនៅក្នុងប្រទេសថៃនឹងជំរុញអោយពួកគេទិញស្រូវពីប្រទេសកម្ពុជា វៀតណាម និងភូមាទៅវិញ។ តើនយោបាយថ្មីរបស់ថៃមានផលប៉ះពាល់យ៉ាងដូចម្តេចខ្លះមកដល់តម្លៃស្រូវនៅក្នុងប្រទេសកម្ពុជា?
ចុះផ្សាយនៅថ្ងៃ៖
ស្តាប់ - ០២:២៦
ឈ្មួញរកស៊ីនាំអង្ករចេញនៅក្នុងប្រទេសកម្ពុជាបានផ្តល់ទស្សនៈផ្សេងៗគ្នា ជុំវិញនយោបាយថ្មីរបស់គណបក្សលោក ស្រី យីង ឡាក់ អនាគតនាយករដ្ឋមន្ត្រីស្រីទីមួយ នៃព្រះរាជាណាចក្រថៃ។ គណបក្សជាប់ឆ្នោតថ្មី ដែលដឹកនាំដោយលោកស្រី យីង ឡាក់ តែមានស្រមោលលោក ថាក់ស៊ីន នៅពីក្រោយនោះ មានគម្រោងដំឡើងតម្លៃស្រូវជូនកសិករថៃនៅពេលអនាគតដ៏ខ្លីខាងមុខនេះ។ ប៉ុន្តែគម្រោងនេះហាក់បីដូចជាធ្វើអោយសមាគមនាំអង្ករចេញរបស់ថៃមិនសូវសប្បាយចិត្តប៉ុន្មានទេ ដោយសារការដំឡើងថ្លៃនេះនឹងធ្វើអោយតម្លៃដើម សម្រាប់នាំអង្ករចេញឡើងថ្លៃ ហើយវាប៉ះពាល់ដល់តម្លៃទីផ្សារនាំអង្ករចេញ។
សមាគមនាំអង្ករចេញនៃប្រទេសថៃបាននិយាយនៅក្នុងកាសែតជាភាសាអង់គ្លេសរបស់ថៃថា ពួកគេនឹងបង្វែរទៅទិញស្រូវនៅក្នុងប្រទេសកម្ពុជា ប្រទេសវៀតណាម និងប្រទេសភូមាវិញ ព្រោះ នៅទីនោះ តម្លៃអាចថោកជាងនៅក្នុងប្រទេសថៃ។
លោក អ៊ុត រ៉េន អ្នកគ្រប់គ្រងក្រុមហ៊ុននាំចេញអង្ករកម្ពុជា Mega Green Cambodia បាននិយាយនៅថ្ងៃអាទិត្យនេះថា នយោបាយថ្មីរបស់ប្រទេសថៃនឹងនាំមកនូវផលប្រយោជន៍ច្រើនជូនដល់កសិករខ្មែរ ពីព្រោះថា នៅពេលដែលឈ្មួញថៃមកទិញស្រូវពីកម្ពុជា កសិករខ្មែរអាចលក់ស្រូវបានក្នុងតម្លៃកាន់តែថ្លៃ។
គម្រោងទិញស្រូវរបស់ថៃនៅពេលនេះមិនមែនជារឿងថ្មីស្រឡាងនោះទេ។ តាមពិត បើទោះបីជាមិនមាននយោបាយថ្មីរបស់ថៃក៏ដោយ ក៏ឈ្មួញថៃ និងឈ្មួញវៀតណាម នាពេលកន្លងមក នាំគ្នាចូលមកទិញស្រូវពីប្រទេសកម្ពុជា ដើម្បីកិនចេញជាអង្ករលក់ទៅអោយទីផ្សារអន្តរជាតិរបស់គេដែរ។ ប៉ុន្តែគ្រាន់តែថា នយោបាយថ្មីរបស់ថៃនេះអាចជំរុញអោយឈ្មួញថៃទិញស្រូវពីកម្ពុជាកាន់តែច្រើនបន្ថែមទៀត។
ការបង្កើនការទិញស្រូវពីប្រទេសកម្ពុជា គឺជាដំណឹងល្អសម្រាប់កសិករខ្មែរ ពីព្រោះថា កសិករខ្មែរអាចទារតម្លៃឡើងបាន រវាងឈ្មួញជនជាតិវៀតណាម ជនជាតិថៃ និងជនជាតិខ្មែរ។ ប៉ុន្តែឈ្មួញជនជាតិខ្មែរមួយចំនួន ដែលទិញស្រូវដើម្បីកិនចេញជាអង្ករលក់ទៅទីផ្សារបរទេសដែរនោះ នឹងអាចប្រឈមនឹងបញ្ហាប្រកួតប្រជែងកាន់តែខ្លាំង។ ឈ្មួញនាំអង្ករចេញខ្មែរមួយចំនួននឹងត្រូវបង្ខំចិត្តបង្កើនតម្លៃអង្ករនាពេលអនាគត ដែលអាចប៉ះពាល់ដល់ការនាំអង្ករចេញរបស់ខ្មែរដែរ។
នយោបាយរបស់រាជរដ្ឋាភិបាលនៃប្រទេសកម្ពុជាបានកំណត់ថានឹងត្រូវនាំអង្ករចេញអោយបាន១លានតោន នៅឆ្នាំ២០១៥ខាងមុខនេះ។ ប៉ុន្តែសម្រាប់ឆមាសទី១នៃឆ្នាំ២០១១នេះ ប្រទេសកម្ពុជាទើបនាំអង្ករចេញបាន៦ម៉ឺនតោនប៉ុណ្ណោះ។ បើយោងតាមល្បឿននេះ គម្រោង១លានតោន នៅឆ្នាំ២០១៥ របស់រដ្ឋាភិបាលកម្ពុជាអាចនឹងទទួលបរាជ័យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ