ហេតុអ្វីស្ត្រីអារ៉ាប៊ីសាអ៊ូឌីត គ្មានសិទ្ធិបើកបរដូចស្ត្រីដទៃលើពិភពលោក ?
ចុះផ្សាយនៅថ្ងៃ៖
ស្តាប់ - ០៤:២៩
អារ៉ាប៊ីសាអ៊ូឌីត គឺជាប្រទេសតែមួយគត់នៅលើលោកយើងនេះ ដែលស្ត្រីគ្មានសិទ្ធិបើករថយន្ត និងចេញក្រៅផ្ទះដោយគ្មានទទូលស្បែ។ ប៉ុន្តែនៅរយៈពេលប៉ុន្មានខែចុងក្រោយនេះ ស្ត្រីកាន់តែច្រើនឡើងៗនាំគ្នាបះបោរ ប្រឆាំងបម្រាមដ៏តឹងតែងខុសគេ ដោយជម្នះបើកឡាន ទោះបីជាបានដឹងជាមុនថាត្រូវប៉ូលិសចាប់ និងត្រូវទទួលការផាកពិន័យ យ៉ាងណាក៏ដោយ។ កាលពីថ្ងៃសៅរ៍ទី ២៦តុលា ស្ត្រីអារ៉ាប៊ីសាអ៊ូឌីត ខ្លះនាំគ្នាចេញបើកឡានបញ្ឈឺប៉ូលិស ខ្លះទៀតបោះផ្សាយរបៀបបើកបររថយន្តតាមប្រព័ន្ធសង្គមផ្សេងៗ។ តើហេតុអ្វីបានជាស្ត្រីអារ៉ាប៊ីសាអ៊ូឌីត គ្មានសិទ្ធិបើកបរ ? តើប្រទេសនេះសំអាងលើហេតុផលអ្វី បានជាហាមឃាត់ស្ត្រីយ៉ាងដូច្នេះ ?!
ជាលើកទីមួយក្នុងប្រវត្តិអារ៉ាប៊ីសាអ៊ូឌីត ដែលស្ត្រីបីនាក់នៅក្នុងជួរអ្នកកាន់អំណាចបានធ្វើអនុសាសន៍សុំលុបចោលការហាមឃាត់ បម្រាបមិនឱ្យស្ត្រីបើកបរ។ ប៉ុន្តែរដ្ឋាភិបាលអារ៉ាប៊ីសាអ៊ូឌីត មិនប្តូរជំហរដាច់ខាត និងបានប្រកាសបញ្ជាក់ជាថ្មីការហាមឃាត់នេះដដែល។ លើសពីនេះទៅទៀត ក្រុមអ្នកកាន់សាសនានិយមជ្រុល បានប្រមូលផ្តុំគ្នានៅមុខព្រះបរមរាជវាំង ដើម្បីប្រឆាំងនឹងសំណើរបស់ស្ត្រី ដែលព្រះមហាក្សត្រ Abdallah កំពុងត្រួតពិនិត្យ។ ព្រះមហាក្សត្រដែលទំនងជាមិនប្រឆាំងនឹងសកម្មភាពបើកបររបស់ស្ត្រីទេ។ ប៉ុន្តែស្ត្រីសកម្មជនដែលមិនចង់ឃើញភាពប្រឈមក្លាយជាហិង្សា បានសុខចិត្តដកសំណើទៅវិញ ដោយប្រែជាការប្រកូកប្រកាសធ្វើយុទ្ធនាការចំហ នាំគ្នាបើករថយន្ត នៅថ្ងៃសៅរ៍ទី ២៦ តុលា ចំពោះស្ត្រីណាដែលមានបណ្ណបើកបរនៅបរទេស។
ការតស៊ូប្រឆាំងនឹងការរើសរើងនេះ មានជាយូរឆ្នាំមកហើយ ពោលគឺតាំងពី សម័យសង្គ្រាមនៅតំបន់ឈូងសមុទ្ទពែក្ស ឆ្នាំ១៩៩០មកម្ល៉េះ។ ២៣ឆ្នាំក្រោយ ការតស៊ូ នៅតែមុះមុតដដែល ព្រោះការទាមទារសិទ្ធិបើកបរដូចបុរស មិនមែនត្រឹមតែដើម្បីសម្រួលការធ្វើដំណើរ ពេលទៅធ្វើការ ឬទៅសាលាទេ តែជាចំណែកមួយនៃសិទ្ធិជាពលរដ្ឋ ជាចំណែកដ៏ពេញលេញរបស់ពិភពលោក។
តើអ្វីជាឧបសគ្គរាំងស្ទះមិនឱ្យស្ត្រីអារ៉ាប៊ីសាអ៊ូឌីត បើកបរបាន ?
នៅអារ៉ាប៊ីសាអ៊ូឌីត ស្ត្រីមានសិទ្ធិពេញលេញ ក្នុងការទទួលបាននូវការសិក្សាអប់រំ បំពាក់បំប៉នស្មើបុរស ដូចដែលបុត្រីសំណព្វរបស់ព្រះមហាក្សត្របានលើកឡើងក្នុងបទសម្ភាសន៍ជាមួយអ្នកសារព័ត៌មានវិទ្យុបារាំងអន្តរជាតិ ថាស្ត្រីអារ៉ាប៊ីសាអ៊ូឌីត មានមុខមានមាត់ក្នុងសង្គមទាំងក្នុង និងក្រៅប្រទេស ជាអ្នករួមចំណែកអភិវឌ្ឍន៍ជាតិ ជាអ្នកស្រាវជ្រាវ ជាអ្នករាជការ។ ប៉ុន្តែស្ត្រីមិនអាចបើកបរបានឡើយ ! គ្មានទេច្បាប់ហាមឃាត់ ប៉ុន្តែស្ត្រីមិនត្រូវបានអនុញ្ញាតឱ្យទៅចុះឈ្មោះប្រលងយកបណ្ណបើកបរ ! បើគ្មានបណ្ណបើកបរ គឺអាចបើកឡានបាន។ នេះបានជាច្បាប់ ! ដូច្នេះប្រសិនបើស្រ្តីណា ដែលមានលទ្ធភាពចេញទៅបរទេស ហើយបានរៀន និងទទួលបានបណ្ណបើកបរនៅប្រទេសក្រៅ ទើប ប៉ូលិសមិនឃាត់ខ្លួនពេលបើកបរ។
បម្រាមហាមបើកបរ មានពាក់ព័ន្ធនឹងបញ្ហាវប្បធម៌ប្រពៃណី ឬ សាសនា ?!
នេះជាសំណួរដែលមានចម្លើយខុសគ្នាពីមនុស្សម្នាក់ទៅមនុស្ស។ នៅក្នុងអត្ថបទសាសនាអ៊ីស្លាម គ្មានចែងសោះឡើយអំពីការហាមឃាត់មិនឱ្យស្ត្រីបើកបរ។ តែអ្នកនយោបាយអារ៉ាប៊ីសាអ៊ូឌីតខ្លះ បានបកស្រាយពន្យល់បែបផ្សេងវិញថា អត្ថបទសាសនានេះក៏មិនបានណែនាំឱ្យស្ត្រីបើកបរដែរ ដូច្នេះការហាមឃាត់គឺមិនខុសទេ។ ជាសរុបអ្វីៗស្ថិតនៅលើកការបកស្រាយ ដោយយកអ៊ីស្លាម មកធ្វើជាលេស ឬជាឧបករណ៍ប៉ុណ្ណោះ។ ភរិយារបស់ព្យាការីមហាម៉េត នៅសម័យនោះចេះជិះសត្វអូដ្ឋ ដែលប្រៀបបាននឹងរថយន្តនាពេលបច្ចុប្បន្ន។ ផ្ទុយទៅវិញ អ៊ីស្លាមហាមឃាត់មិនឱ្យស្ត្រីនៅម្នាក់ឯង ជាមួយជនមិនស្គាល់មុខ។ បើផ្អែកលើចំណុចនេះ សកម្មភាពរបស់បណ្តាជនអារ៉ាប៊ីសាអ៊ូឌីតបច្ចុប្បន្នកំពុងប្រព្រឹត្តខុសនឹងច្បាប់អ៊ីស្លាម ព្រោះស្ត្រីត្រូវជិះឡានជាមួយតៃកុងដែលជាមនុស្សដទៃ។ ដូច្នេះអ៊ីស្លាមមិនមែនជាដើមចមនាំដល់ការហាមឃាត់មិនឱ្យស្ត្រីបើកបរឡើយ។ អ៊ីចឹងមានតែមនុស្ស និងទម្លាប់ប្រពៃណី ?! សង្គមអារ៉ាប៊ីសាអ៊ូឌីត មានការបែងចែងយ៉ាងខ្លាំងជុំវិញសិទ្ធិបើកបររបស់ស្ត្រី ហើយការបែងចែងនេះគឺផ្អែកទាំងស្រុងទៅលើជំនឿអរូបិយរបស់បុគ្គល។ ខ្លះថាត្រូវការពេលវេលា ព្រោះសង្គមមិនអាចទទួលយកបានភ្លាមៗឡើយនៅពេលឃើញស្ត្រីបើកបរ ពោលគឺគ្មានអ្វីជាសំអាងសមស្របសោះឡើយ។
បើយោងតាមការបកស្រាយខាងលើនេះ គ្មានអ្វីរាំងស្ទះស្ត្រីអារ៉ាប៊ីសាអ៊ូឌីតបើកបរសោះ។ ស្ត្រីអារ៉ាប៊ីសាអ៊ូឌីត គួរតែបានទទួលសិទ្ធិបើកបរដូចស្ត្រីដទៃលើលោក។ ប៉ុន្តែមុននឹងអាចសម្រេចក្តីប្រាថ្នានេះបាន ស្ត្រីត្រូវការការគាំទ្រពីរផ្នែក ៖ ទីមួយពីសង្គមគ្រួសារ (ឪពុក បងប្អូនប្រុស ស្វាមី និងទីពីរគឺសេចក្តីក្លាហានផ្ទាល់ខ្លួន។ ការគាំទ្រពីបុរសក្នុងគ្រួសារ ជាគ្រឹះដ៏សំខាន់ ព្រោះបើមានការឃាត់ខ្លួនស្ត្រីណាម្នាក់ប៉ូលិសនឹងទាក់ទងទៅមេគ្រួសារជាបុរស ហើយបុរសនេះឯងដែលត្រូវទៅធានា និងជាអ្នកការពារស្ត្រីរូបនោះ នៅចំពោះមុខអាជ្ញាធរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ