រវ៉ាន់ដា៖បារំាងត្រូវហ៊ានទទួលស្គាល់ការពិតចំពោះតួនាទីរបស់ខ្លួននៅក្នុងអំពើប្រល័យពូជសាសន៍
នៅថ្ងៃចន្ទ ទី៧ មេសានេះ ប្រទេសរវ៉ាន់ដារៀបចំពិធីប្រារព្ធខួបគម្រប់ ២០ឆ្នំានៃអំពើប្រល័យពូជសាសន៍កាលពីថ្ងៃទី៧ មេសា ឆ្នំា ១៩៩៤។ ជាថ្មីម្តងទៀត លោកប្រធានាធិបតីរវ៉ាន់ដា ប៉ូល កាហ្គាមេបានចោទបារំាងពីបទបានរៀបចំ និងចូលរួមដោយផ្ទាល់នៅក្នុងអំពើប្រល័យពូជសាសន៍នោះ។ ជាប្រតិកម្មឆ្លើយតបវិញ ទីក្រុងប៉ារីសបានសម្រេចមិនទៅចូលរួមនៅក្នុងពិធីប្រារព្ធខួប ២០ឆ្នំានោះទេ។ រីឯលោកស្រីប្រមុខការទូតរវ៉ាន់ដាបានអំពាវនាវឲ្យបារំាងហ៊ានទទួលស្គាល់ការពិតចំពោះតួនាទីរបស់ខ្លួននៅក្នុងអំពើប្រល័យពូជសាសន៍នៅរវ៉ាន់ដា។
ចុះផ្សាយនៅថ្ងៃ៖
ស្តាប់ - ០២:៣០
២០ឆ្នំាបានកន្លងផុតទៅ តែសង្រ្គាមពាក្យសម្តីបាន និងកំពុងបន្តមានយ៉ាងផុសផុលរវាងប្រទេសបារំាង និងប្រទេសរវ៉ាន់ដា ពិសេសចំថ្ងៃដែលប្រជាជនរវ៉ាន់ដាកំពុងរៀបចំពិធីប្រារព្ធខួបគម្រប់ ២០ឆ្នំានៃអំពើប្រល័យពូជសាសន៍នៅរវ៉ាន់ដាកាលពីថ្ងែទី៧ មេសា ឆ្នំា ១៩៩៤។ អំពើប្រល័យពូជសាសន៍ដែលបានបណ្តាលឲ្យមានមនុស្សស្លាប់ប្រមាណជា ៨០០ ០០០នាក់ដែលភាគច្រើនជាជនជាតិភាគតិចទូតស៊ី។ តាមគម្រោង បារំាងបានត្រៀមបញ្ជូនរដ្ឋមន្រ្តីក្រសួងយុត្តិធម៌របស់ខ្លួនឲ្យទៅចូលរួមនៅក្នុងពិធីនោះ តែត្រូវបានលប់ចោលភ្លាមវិញ បន្ទាប់ពីលោកប្រធានាធិបតីរវ៉ាន់ដាប៉ូល កាហ្គាមេបានចោទបារំាងចំៗថា ជាអ្នកដែលបានរៀបចំ និងចូលរួមដោយផ្ទាល់នៅក្នុងអំពើប្រល័យពូជសាសន៍នៅរវ៉ាន់ដាកាលពី ២០ឆ្នំាមុន
នៅថ្ងៃអាទិត្យ ទី៦ មេសា លោកប៊ែរណា គូឈ្នែរ អតីតរដ្ឋមន្រ្តីការបរទេសបារំាងក្នុងជំនាន់លោកប្រធានាធិបតីនីកូឡា សាកូហ្ស៊ីបានច្រានចោលការចោទប្រកាន់របស់លោកប្រធានាធិបតីរវ៉ាន់ដា និងបញ្ជាក់ថា បារំាងអាចនឹងមានកំហុសឆ្គងខ្លះនៅក្នុងអំពើប្រល័យពូជសាសន៍នោះ តែមិនមែនជាអ្នករៀបចំ និងចូលរួមដោយផ្ទាល់ដូចការចោទរបស់លោកប្រធានាធិបតីរវ៉ាន់ដាទេ។ ចំណែកលោកស្រីប្រមុខការទូតរវ៉ាន់ដាល្វី មូស្ហីគីវ៉ាបូវិញ បានសម្តែងការសោកស្តាយចំពោះការសម្រេចចិត្តរបស់បារំាងដែលមិនទៅចូលរួមនៅក្នុងពិធីប្រារព្ធខួបគម្រប់ ២០ឆ្នំានោះ និងថា ជាការសម្រេចចិត្តមួយដែលគ្មានភស្តុតាងត្រឹមត្រូវ។
ទន្ទឹមគ្នានេះ លោកស្រី មូស្ហីគីវ៉ាបូក៏បានឆ្លៀតអំពាវនាវឲ្យបារំាងហ៊ានចេញមុខទទួលស្គាល់ការពិតចំពោះតួនាទីរបស់ខ្លួននៅក្នុងអំពើប្រល័យពូជសាសន៍នៅរវ៉ាន់ដាកាលពី ២០ឆ្នំាមុន។ លោកស្រីមូស្ហីគីវ៉ាបូបានយល់ឃើញថា បារំាង និងរវ៉ាន់ដាមិនអាចបន្តមានទំនាក់ទំនងល្អទៅមុខបានទេ ល្គឹកណាដែលគ្មានការលាតត្រដានការពិត និងការជម្រះបញ្ជីគ្នាឲ្យបានដាច់ស្រឡះពីរឿងប្រវត្តិសាស្រ្តនោះ។ សម្រាប់លោកស្រីមូស្ហីគីវ៉ាបូ ប្រវត្តិសាស្រ្តនៅតែជាប្រវត្តិសាស្រ្តដែលគ្មាននរណាអាចបំភ្លេចចោលបានឡើយ។
គួររម្លឹកជូនថាកាលពីឆ្នំា ១៩៩៤ បារំាងជាសម្ព័ន្ធមិត្តរបស់រដ្ឋអំណាចជ្រុលនិយមនៅរវ៉ាន់ដាកាន់កាប់ដោយពួកហ៊ូទូ ហើយគឺពួកហ៊ូទូនេះឯងដែលបានធ្វើការសម្លាប់រង្គាលលើពួកជនជាតិភាគតិចទូតស៊ីក្នុងចន្លោះខែមេសា និងកក្កដា ឆ្នំា ១៩៩៤ ក្រោមវត្តមានទាហានបារំាងនាពេលនោះ។ អ៊ីចឹងហើយបានជាមានការសង្ស័យចំពោះតួនាទីរបស់ទាហានបារំាងក្នុងសម័យនោះ ហើយគឺតំាងពីពេលនោះមកឯង ដែលទំនាក់ទំនងរវាងទីក្រុងបារីស និងគីហ្គាលីបាន និងកំពុងបន្តបំពុលដោយរឿងរ៉ាវប្រវត្តិសាស្រ្តមួយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ