ឧបសគ្គចម្បងនៅក្នុងសំណុំរឿងនុយក្លេអ៊ែរអ៊ីរ៉ង់ គឺកើតចេញពីការបន្តមិនទុកចិត្តគ្នា
ចុះផ្សាយនៅថ្ងៃ៖
ស្តាប់ - ០៤:៤៦
ពេញមួយថ្ងៃអាទិត្យ ទី១៣ កក្កដា ក្រុមប្រទេស ៥បូក១ ស្តីពីបញ្ហានុយក្លេអ៊ែរអ៊ីរ៉ង់បានរួមប្រជុំគ្នាជាថ្មីនៅក្នុងទីក្រុងវីយែន ប្រទេសអូទ្រីស។ ក្រុមប្រទេស ៥បូក១ នោះមាន ចិន សហរដ្ឋអាមេរិក បារំាង អង់គ្លេស រុស្ស៊ី និងប្រទេសអាល្លឺម៉ង់។ គោលដៅនៃកិច្ចប្រជុំពេលនេះ គឺដើម្បីស្វែងរកកិច្ចព្រមព្រៀងចុងក្រោយមួយស្តីពីសំណុំរឿងនុយក្លេអ៊ែរអ៊ីរ៉ង់ឲ្យបានមុនថ្ងៃទី២០ កក្កដាខាងមុខ។ តែមិនទាន់អីផង ភាគីនីមួយៗបានទទួលស្គាល់ថា នៅមានផ្លូវវែងឆ្ងាយដែលត្រូវដើរ មុននឹងអាចសម្រេចបាននូវកិច្ចព្រមព្រៀងជាស្ថាពរនោះ។ ហេតុអ្វីបានជាសំណុំរឿងមួយនេះនៅតែបន្តប្រទាញប្រទង់គ្នាខ្លំាងម្ល៉េះ និងថា តើអ្វីទៅ ជាឧបសគ្គចម្បងនោះ?
វាជាសំណុំរឿងមួយច្រំដែល តែវាជាបច្ចុប្បន្នភាពមួយដែលយើងត្រូវលើកយកមកនិយាយជាថ្មីដោយចៀសមិនរួច។ ចៀសមិនរួច ព្រោះកិច្ចប្រជុំ ៥ភាគីបូក១ ស្តីពីនុយក្លេអ៊ែរអ៊ីរ៉ង់លើកនេះត្រូវរកឲ្យបាននូវកិច្ចព្រមព្រៀងជាស្ថាពរមួយឲ្យបានមុនថ្ងៃទី២០ កក្កដាខាងមុខ។ ជម្រើសយកថ្ងៃទី២០ កក្កដា ឆ្នំា ២០១៤ ជាថ្ងៃឱសានវាទក៏មិនមែនជារឿងមួយចៃដន្យទេ តែជាការសម្រេចចិត្តរួមគ្នានាកិច្ចប្រជុំនៅក្នុងទីក្រុងហ្សឺណែវ ប្រទេសស្វីសកាលពីខែវិច្ឆិកា ឆ្នំា ២០១៣ កន្លងទៅ។ កាលណោះ ភាគីពាក់ព័ន្ធដោយរាប់បញ្ចូលទំាងអ៊ីរ៉ង់ផង បានចុះហត្ថលេខាលើកិច្ចព្រមព្រៀងបឋមមួយស្តីពីបញ្ហានុយក្លេអ៊ែរអ៊ីរ៉ង់ដ៏ស្មុគស្មាញ និងអូសបន្លាយ។ កិច្ចព្រមព្រៀងបឋមនោះបានចែងយ៉ាងច្បាស់ ពីការរំលាយកម្មវិធីនុយក្លេអ៊ែរអ៊ីរ៉ង់ជាថ្មូរនឹងការលើកទ័ណ្ឌកម្មសេដ្ឋកិច្ចអន្តរជាតិ។ ថ្ងៃនេះ ទី១៥ កក្កដា ពោលគឺនៅសល់តែ ៥ថ្ងៃទៀតប៉ុណ្ណោះដែលគេត្រូវរកឲ្យឃើញនូវកិច្ចព្រមព្រៀងចុងក្រោយមួយ។
តែអ្វីជាការកត់សម្គាល់នោះនៅត្រង់ថា នៅក្រោយកិច្ចប្រជុំពេញមួយថ្ងៃអាទិត្យ ទី១៣ កក្កដាមក ភាគីពាក់ព័ន្ធនីមួយៗហាក់ដូចជាគ្មានសុទិដ្ឋិនិយមបន្តិចណាសោះថា គេនឹងអាចសម្រេចបានកិច្ចព្រមព្រៀងជាស្ថាពរមួយស្តីពីសំណុំរឿងនុយក្លេអ៊ែរអ៊ីរ៉ងឲ្យបានមុនថ្ងៃទី២០ កក្កដានោះ។ ទំាងលោកប្រមុខការទូតបារំាង អាល្លឺម៉ង់ និងអង់គ្លេសសុទ្ធតែបានទទួលស្គាល់ថា នៅមានផ្លូវវែងឆ្ងាយដែលត្រូវដើរ មុននឹងអាចសម្រេចបាននូវកិច្ចព្រមព្រៀងចុងក្រោយ។ តាមរយៈពាក្យសម្តីនេះនំាឲ្យគេអាចយល់បានថា នៅមានបញ្ហាជាច្រើនទៀតដែលក្រុមប្រទេសលោកខាងលិច និងអ៊ីរ៉ង់កំពុងបន្តនិយាយមិនចុះសម្រុងគ្នានៅឡើយ។
អ៊ីចឹងហើយជាមានការលើកឡើងថា បើនៅតែគ្មានកិច្ចព្រមព្រៀងចុងក្រោយមុនថ្ងៃឱសានវាទ ទី២០ កក្កដានោះ តើកិច្ចប្រជុំនឹងត្រូវបិទបញ្ចប់ជាស្ថាពរត្រឹមនេះ ឬមួយក៏អាចបន្តទៅមុខទៀតបាន។ មានចម្លើយពីរចំពោះសំណួរនេះ អ្នកខ្លះយល់ថា វាហាក់ដូចជារហ័សពេកដែលគេត្រូវលើកបញ្ហានេះឡើង រីឯអ្នកខ្លះទៀតបានផ្តល់ជម្រើសពីរ ឬមួយគេត្រូវបន្តកិច្ចចរចាជាបន្តទៀត ឬមួយក៏គេត្រូវបញ្ចប់វាត្រឹមណេះដោយសារតែគ្មានកុងសង់ស៊ុស។ តែយ៉ាងក៏ដោយ មតិទូទៅបានយល់ឃើញថា អ្វីដែលសំខាន់មិនមែនពេលវេលាទេ តែគឺកិច្ចព្រមព្រៀងចុងក្រោយមួយ មានន័យថា គេចំាបាច់ត្រូវតែរកឲ្យបាននូវកិច្ចព្រមព្រៀងមួយដែលអាចទទួលយកបានទំាងអស់គ្នា ព្រោះបើមិនដូច្នោះទេ សំណុំរឿងដែលបានបំពុលពិភពលោកតំាងពី ១០ឆ្នំាមកហើយមួយនេះនឹងបន្តអូសបន្លាយកាន់តែឆ្ងាយថែមទៀត។
ហេតុអ្វីបានជាសំណុំរឿងនុយក្លេអ៊ែរអ៊ីរ៉ង់នៅតែបន្តប្រទាញប្រទង់គ្នាខ្លំាងម្ល៉េះ និងថា តើអ្វីទៅ ជាឧបសគ្គចម្បងនោះ?
មែនទែនទៅ តំាងពីក្រោយការជាប់ឆ្នោតប្រធានាធិបតីអ៊ីរ៉ង់របស់លោកហាសាន រ៉ូហានីមក ទំនាក់ទំនងរវាងអ៊ីរ៉ង់ និងសហគមន៍អន្តរជាតិហាក់ដូចជាការធូរស្រាលច្រើន រីឯការចរចារឿងនុយក្លេអ៊ែរទៀតសោតក៏មានដំណើរការទៅមុខគួរឲ្យកត់សម្គាល់ដែរ។ ទំាងបស្ចិមលោក ក៏ដូចជារដ្ឋាភិបាលថ្មីអ៊ីរ៉ង់សុទ្ធតែបានធ្វើសម្បទានឲ្យគ្នាទៅវិញ ទោមក។ ជាក់ស្តែងកាលពីខែមករាដើមឆ្នំា ២០១៤ នេះ អ៊ីរ៉ង់បានពន្យឺតល្បឿងចម្រើនធាតុអ៊ុយរ៉ាញ៉ូមរបស់ខ្លួន រីឯសហគមន៍អន្តរជាតិក៏បានផ្តើមលើកចេញទ័ណ្ឌកម្មសេដ្ឋកិច្ចមួយចំនួនចេញពីអ៊ីរ៉ង់ដែរ។
ទោះជាយ៉ាងនេះក្តី គេក៏មិនត្រូវភ្លេចនិយាយទេថា ភាគីនីមួយៗក៏នៅតែបន្តរក្សាជំហររឹងប៉ឹងរបស់គេតែរៀងៗខ្លួនដែរ។ នៅម្ខាង ក្រុមប្រទេសបស្ចិមលោកដែលចង់កំណត់សមត្ថភាពចម្រើនធាតុអ៊ុយរ៉ាញ៉ូមដែលទាមទារដោយអ៊ីរ៉ង់។ ក្រុមប្រទេសលោកខាងលិចយល់ឃើញថា បើគេទុកបណ្តោយឲ្យអ៊ីរ៉ង់ធ្វើការចម្រើនធាតុអ៊ុយរ៉ាញ៉ូមស្រេចតែនឹងចិត្ត នោះអ៊ីរ៉ង់អាចយកទៅប្រើក្នុងការផលិតគ្រាប់បែកបរមាណូ។ ចំណែកអ៊ីរ៉ង់វិញធ្លាប់បានអះអាងម្តងជាពីរដងថា សារធាតុអ៊ុយរ៉ាញ៉ូមដែលចម្រើនធាតុរួចហើយមិនមែនទុកប្រើក្នុងវិស័យយោធាទេ តែសម្រាប់ប្រើនៅក្នុងវិស័យស៊ីវិលសុទ្ធសាធ។ ដូច្នេះឃើញថា វិលចុះ វិលឡើង សង្រ្គាមពាក្យសម្តីរវាងភាគីទំាងពីរនៅតែបន្តវិលវល់ជុំវិញតែរឿងដដែល។ សហគមន៍អន្តរជាតិសង្ស័យអ៊ីរ៉ង់សំងំផលិតគ្រាប់បែបបរមាណូ តែអ៊ីរ៉ង់តែងតែបដិសេធជានិច្ច។
ផ្តើមចេញពីចំណុចនេះនំាឲ្យគេយល់បានថា ការដែលភាគីទំាងពីរបាន និងកំពុងបន្តប្រទាញប្រទង់គ្នានាពេលនេះ មិនមែនដោយសារតែគ្មានឆន្ទៈចង់ដោះស្រាយនោះទេ។ បើគ្មានឆន្ទៈ ក៏គ្មានកិច្ចចរចាដែលបានធ្វើជាហូរហែមកដល់ថ្ងៃនេះឡើយ។ តែគឺមកពីភាគីទំាងពីរនៅបន្តមិនទុកចិត្តគ្នា។ សេចក្តីទុកចិត្តដែលត្រូវតែមានទៅ មានមក គឺមិនត្រូវចេញមកតែពីភាគីម្ខាងនោះទេ។ នៅសល់រហូតដល់ ៥ថ្ងៃទៀតឯណោះទើបឱសានវាទផុតកំណត់។ ដូច្នេះ វាគ្មានរឿងអ្វីដែលគេមិនអាចរកឃើញកិច្ចព្រមព្រៀងចុងក្រោយបាននោះទេ តែដំបូង ម្នាក់ៗត្រូវតែហ៊ានបង្ហាញពីឆន្ទៈពិតប្រាកដ និងការទុកចិត្តរវាងគ្នាទៅវិញ ទៅមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ