ប្រតិកម្មរបស់អង្គការសង្គមស៊ីវិល ពាក់ព័ន្ធនឹងគណៈកម្មការចម្រុះដោះស្រាយភាពមិនប្រក្រតីនៃការបោះឆ្នោត
ចុងក្រោយនេះ គណៈកម្មការចម្រុះដើម្បីដោះស្រាយភាពមិនប្រក្រតីនៃការបោះឆ្នោត មិនអាចបង្កើតឡើងបានទេ ព្រោះគណបក្សសង្គ្រោះជាតិមិនព្រមចូលរួម។ គណបក្សប្រឆាំងនេះ យល់ឃើញថា សមាសភាពគណកម្មការចំពោះកិច្ច ដែល គ.ជ.ប. ស្នើឡើង គឺនៅមានលក្ខណៈចង្អៀតនៅឡើយ ដែលផ្ទុយពីគោលបំណងរបស់គណបក្សសង្គ្រោះជាតិចង់បាន។ គោលបំណងនោះគឺ គណៈកម្មការត្រូវបានការចូលរួមពីតំណាងគណបក្សសង្គ្រោះជាតិ និងគណបក្សប្រជាជនកម្ពុជា ព្រមទាំងអង្គការសង្គមស៊ីវិល អ្នកសង្កេតការណ៍ជាតិ-អន្តរជាតិ ដោយមាន គ.ជ.ប. ជាអ្នកសម្របសម្រួល និងអង្គការសហប្រជាជាតិ ជាអាជ្ញាកណ្តាល។ គោលជំហររបស់គណបក្សសង្គ្រោះជាតិខាងលើនេះ ត្រូវបានអង្គការសង្គមស៊ីវិលសង្កេតការណ៍បោះឆ្នោត យល់ឃើញផ្សេងៗពីគ្នា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៥៤
គម្រោងបង្កើតគណៈកម្មការចម្រុះ សម្រាប់ដោះស្រាយភាពមិនប្រក្រតី ស្ដីពីការបោះឆ្នោតនៅកម្ពុជា ត្រូវបរាជ័យនៅចុងបញ្ចប់។ បរាជ័យព្រោះគណបក្សសង្គ្រោះជាតិ មិនពេញចិត្តនឹងសមាសភាពគណៈកម្មការដែលមិនមានសង្គមស៊ីវិល និងអង្គការសហប្រជាជាតិចូលរួមជាអាជ្ញាកណ្ដាល។
ទាក់ទិនទៅនឹងវត្តមានរបស់អង្គការសង្គមស៊ីវិល នៅក្នុងគណៈកម្មការចម្រុះខាងលើ ត្រូវបានលោក ហង្ស ពុទ្ធា នាយកប្រតិបត្តិអង្គការសង្កេតការណ៍បោះឆ្នោត Necfec អះអាងថា មិនមានប្រយោជន៍អ្វីទេ ប្រសិនបើភាគីទាំង៣ គឺ គ.ជ.ប. គណបក្សប្រជាជន និងគណបក្សសង្គ្រោះជាតិ មិនស្រុះស្រួលគ្នាទេនោះ។
ប៉ុន្តែការធ្វើការតែ៣ភាគី ដូចលោកហង្ស ពុទ្ធា លើកឡើងខាងលើ ត្រូវបានលោក គល់ បញ្ញា នាយកប្រតិបត្តិអង្គការសង្កេតការណ៍បោះឆ្នោតខុមហ្វ្រែល យល់ផ្សេងថា វាអាចមានបញ្ហា។ មានបញ្ហាព្រោះ គ.ជ.ប. មានតែម្នាក់ឯង ឈរនៅកណ្ដាលគណបក្សដល់ទៅ២។ លោក គល់ បញ្ញា យល់ថាគួរតែមានវត្តមានអង្គការសង្គមស៊ីវិលនៅក្នុងគណៈកម្មការចម្រុះនោះ។ លោកគល់ បញ្ញា អះអាងថា វត្តមានអង្គការសង្គមស៊ីវិល ដែលមានឯកទេសនិងវិជ្ជាជីវៈ នឹងជួយឲ្យការស៊ើបអង្កេតរបស់គណៈកម្មការនោះ កាន់តែមានប្រសិទ្ធភាពថែមទៀត។
ចំណែកសំណើរបស់គណបក្សសង្គ្រោះជាតិ ដែលទាមទារឲ្យមានវត្តមានអង្គការសហប្រជាជាតិ នៅក្នុងគណៈកម្មការនោះ ត្រូវបានលោកគល់ បញ្ញា ឲ្យដឹងថា វាហាក់ដូចជាគ្មានទំនាស់អ្វីទេ ព្រោះអង្គការសហប្រជាជាតិ ក៏ធ្លាប់ជួយនៅក្នុងការបោះឆ្នោតឆ្នាំ១៩៩៣ដែរ។ លោកគល់ បញ្ញា ឲ្យដឹងថា ភាគីទាំងអស់ ទាំងគ.ជ.ប. និងគណបក្សនយោបាយ អាចជជែកគ្នា ថាតើនឹងប្រគល់តួនាទីអ្វីឲ្យអង្គការអន្ដរជាតិនោះ?
ផ្ទុយពីលោក គល់ បញ្ញា លោកហង្ស ពុទ្ធា យល់ថា ឥឡូវនេះ វត្តមានរបស់អង្គការសហប្រជាជាតិ នៅក្នុងគណៈកម្មការចម្រុះ តាមការទាមទាររបស់គណបក្សសង្គ្រោះជាតិ មិនទាន់ចាំបាច់ទេ។ សំខាន់គឺ ខ្មែរគ្នាឯងដែលមាននិន្នាការនយោបាយខុសគ្នានេះ សាកល្បងជជែកគ្នាម្ដងទៀតសិន មុននឹងសុំជំនួយពីក្រៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ