ការពិនិត្យបញ្ជីឈ្មោះ និងចុះឈ្មោះរបស់បោះឆ្នោតនឹងត្រូវបន្ត ៣ថ្ងៃទៀត
ដំណើរការធ្វើបច្ចុប្បន្នភាពបញ្ជីឈ្មោះបោះឆ្នោតសម្រាប់ឆ្នាំ២០១៣ បានចាប់ផ្តើម កាលពីថ្ងៃទី១ ខែតុលា។ គិតមកទល់នឹងថ្ងៃទី១៧ តុលា, តួលេខបណ្តោះអាសន្នបានបង្ហាញថា ដំណើរការនេះបានទទួលមនុស្សចុះឈ្មោះថ្មី ប្រមាណ ជាង១៦ម៉ឺននាក់។ ប៉ុន្តែ ដំណើរការធ្វើបច្ចុប្បន្នភាព និងពិនិត្យ និងចុះឈ្មោះបោះឆ្នោត ដែលនឹងត្រូវបញ្ចប់ត្រឹមថ្ងៃទី២០តុលានេះ ត្រូវបាន គ ជ ប ប្រកាសពន្យារពេល បន្ថែមបីថ្ងៃទៀត ដោយសារតែខេត្ត-ក្រុងមួយចំនួនបានជួបគ្រោះទឹកជំនន់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
លោក ទេព នីថា អគ្គលេខាធិការគណៈកម្មាធិការជាតិរៀបចំការបោះឆ្នោតបានថ្លែងថា យ៉ាងហោចណាស់មានឃុំ-សង្កាត់ចំនួន២១១ នៅក្នុងខេត្ត-ក្រុងចំនួន១០ នឹងត្រូវបានពន្យារពេលបន្ថែម៣ថ្ងៃទៀត ដើម្បីឲ្យប្រជាពលរដ្ឋមានលទ្ធភាពទៅពិនិត្យឈ្មោះ និងចុះឈ្មោះក្នុងបញ្ជីបោះឆ្នោត ដែលត្រូវធ្វើជារៀងរាល់ឆ្នាំ។
ដោយឡែកតួលេខជាក់លាក់ក្នុងរយៈពេលដំណើរការពិនិត្យឈ្មោះ និងចុះឈ្មោះបោះឆ្នោតដែលបានចាប់ផ្តើមតាំងពីថ្ងៃទី១តុលា ដល់ថ្ងៃទី២០តុលា នឹងត្រូវបានគ.ជ.បធ្វើការបូកសរុបនៅថ្ងៃចន្ទទី២១ ស្របពេលដែលរយៈពេលបន្ថែមបីថ្ងៃសម្រាប់ខេត្ត-ក្រុងលិចទឹកជំនន់ចំនួន១០ចាប់ផ្តើមដំណើរការបន្ថែមរបស់ខ្លួននោះ។ នេះបើតាមការឲ្យដឹងរបស់លោក ទេព នីថា ដោយលោកបានកត់សម្គាល់ថា បើទោះបីជាមានគ្រោះទឹកជំនន់នៅតាមបណ្តាខេត្តមួយចំនួន ក៏ដំណើរការចុះឈ្មោះ និងពិនិត្យបញ្ជីឈ្មោះនៅតាមបណ្តាខេត្តផ្សេងទៀត បានដំណើរការទៅបានយ៉ាងល្អដែរ តាំងពីថ្ងៃចាប់ផ្តើមមក។
កន្លងមកអង្គការសង្គមស៊ីវិល ក៏ដូចជាគណបក្សប្រឆាំងបានធ្វើការរិះគន់ និងបានលើកឡើងទាក់ទងទៅនឹងពេលវេលាដែល គ.ជ.ប បានកំណត់យកខែតុលានេះ ដើម្បីដំណើរការចុះឈ្មោះថ្មី និងពិនិត្យបញ្ជីឈ្មោះអ្នកបោះឆ្នោត ពីព្រោះខែតុលា ជាពេលវេលាដែលប្រទេសកម្ពុជាជួបប្រទះញឹកញាប់នូវគ្រោះទឹកជំនន់ ដែលរំខានដល់ប្រជាពលរដ្ឋនៅក្នុងដំណើរការចុះឈ្មោះបោះឆ្នោត។ អង្គការសង្គមស៊ីវិល និងបក្សប្រឆាំងក៏បានស្នើឲ្យ គ.ជ.ប លើកពេលចុះឈ្មោះ និងពិនិត្យបញ្ជីឈ្មោះនេះ ទៅធ្វើនៅរដូវគ្មានភ្លៀងផងដែរ ក៏ប៉ុន្តែ លោក ទេព នីថា បានបញ្ជាក់ថា ការកំណត់យកពេលវេលានេះ គឺធ្វើឡើងទៅតាមច្បាប់បោះឆ្នោតតែប៉ុណ្ណោះ។
គួរបញ្ជាក់ថា គ.ជ.ប បានកំណត់រយៈពេលចុះឈ្មោះប្រជាពលរដ្ឋចូលទៅក្នុងបញ្ជីបច្ចុប្បន្នភាព ឆ្នាំ២០១៣ ចាប់ពីថ្ងៃទី១ ដល់ថ្ងៃទី២០ខែតុលាឆ្នាំ២០១។ ប្រជាពលរដ្ឋដែលមានឈ្មោះនៅក្នុងបញ្ជីបោះឆ្នោតជ្រើសតាំងតំណាងរាស្ត្រ នីតិកាលទី៥ ដែលបានប្រព្រឹត្តទៅ កាលពីថ្ងៃទី២៨ ខែកក្កដា ឆ្នាំ២០១៣ មានចំនួនជាង ៩លាន៦សែននាក់។ យ៉ាងណាក៏ដោយ បញ្ជីឈ្មោះអ្នកបោះឆ្នោតនៅតែជាប្រធានរឿងក្តៅនៅឡើយសម្រាប់គណកប្សប្រឆាំងដែលតែងតែរិះគន់ទៅលើប្រព័ន្ធបោះឆ្នោតដែលរៀបចំឡើងដោយ គ.ជ.ប នោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ