ក្រុមអ្នកជំនាញផ្នែកអាវុធគីមី របស់ អ.ស.ប គ្រោងនឹងចុះទៅស៊ីរីឆាប់ៗនេះ
ក្រុមអ្នកជំនាញ ផ្នែកអាវុធគីមី របស់អង្គការសហប្រជាជាតិ បានគ្រោងនឹងចុះទៅប្រទេសស៊ីរី នៅពេលឆាប់ៗ ខាងមុខនេះ ដើម្បីធ្វើការអង្គេតជុំវិញការសង្ស័យថា មានការប្រើប្រាស់ អាវុធគីមី នៅក្នុងកំឡុងសង្គ្រាមស៊ីវិល។ នេះបើតាម ការប្រកាសរបស់អង្គការសហប្រជាជាតិ កាលពីថ្ងៃពុធទី១៤ សីហាម្សិលមិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
អង្គការសហប្រជាជាតិបានត្រៀមខ្លួនជាស្រេច ក្នុងការបញ្ជូន ក្រុមអ្នកជំនាញការផ្នែកអាវុធគីមី បន្ទាប់ពីទទួល បានភ្លើងខៀវពីរដ្ឋាភិបាលស៊ីរី កាលថ្ងៃទី៣១ កក្កដា កន្លងទៅ។ នៅក្នុងក្របខណ្ឌការងារនេះ នឹងមានក្រុមអ្នកអង្កេតការណ៍ជំនាញផ្នែកអាវុធគីមី ដែលមកពី ប្រទេសស៊ុយអែត ចុះទៅពិនិត្យ លើតំបន់សង្យ័យចំនួន បីកន្លែង ដែលមានការវាយប្រហារយ៉ាងក្ដៅគគុក នៅប្រទេសស៊ីរី។
នៅក្នុងសេចក្ដីប្រកាសព័ត៌មានមួយ របស់អគ្គលេខាធិការ អង្គការសហប្រជាជាតិ បាន គីមូន កាលពីថ្ងៃម្សិលមិញ បានបង្ហាញថា នេះជាសញ្ញាណ វិជ្ជមានមួយ ដែលរដ្ឋាភិបាល ទីក្រុងដាម៉ាស បានសហការជាមួយ អង្គការសហប្រជាជាតិ ក្នុងគោលបំណងបញ្ជាក់ ឱ្យមានតម្លាភាព នានាទាក់ទងនឹងការសង្ស័យ របស់បស្ចឹមប្រទេស កន្លងមក ទាក់ទងនឹងអាវុធគីមី។
នៅក្នុងគម្រោង ចុះទៅធ្វើការអង្កេត របស់ក្រុមជំនាញអាវុធគីមី ដែលមិនទាន់បានកំណត់ថ្ងៃ ពិតប្រាកដនោះ នឹងគ្រោងសម្រាប់រយះពេលប្រមាណ២សប្ដាហ៍ ឬអាចលើសពីនេះ ក្នុងករណីចាំបាច់។ ហើយក្រុមការងារ នឹងគ្រោងស្នាក់នៅហ្នឹង កន្លែងដែលសង្ស័យ ដើម្បីធ្វើការងារតែម្ដង។ ក្នុងដំណាក់កាលដំបូង គេអាចដឹងបានថា អ្នកជំនាញនឹងចុះទៅទីក្រុងអាឡេប ជាតំបន់ក្ដៅមួយ ដែលសង្ស័យថា ក្រុមឧទ្ទាមបានប្រើប្រាស់អាវុធគីមី ដែលហាមឃាត់ដោយច្បាប់អន្តរជាតិ កាលពីខែមិនា។ ចំណែក ទីតាំងចំនួន ២ កន្លែងទៀតនោះ គេមិនទាន់បានដឹងជាផ្លូវការនៅឡើយទេ។
សូមបញ្ជាក់ថា មុននឹងត្រៀមបញ្ជូន មន្ត្រីជំនាញរបស់ខ្លួន ដើម្បីចុះទៅអង្កេតខាងលើ អង្គការសហប្រជាជាតិ កន្លងមក បានទទួលរបាយការណ៍ចំនួន១៣ ទាក់ទងនឹងការប្រើប្រាស់អាវុធគីមី នៅក្នុងសង្គ្រាមស៊ីវិល នៅស៊ីរី។ របាយការណ៍ទាំងនោះ បានធ្វើឡើងដោយរដ្ឋាភិបាលស៊ីរីផ្ទាល់ និងសំខាន់ជាងនេះទៀត គឺរបាយការណ៍របស់ប្រទេសបារាំង អង់គ្លេស និងសហរដ្ឋអាមេរិក។
កាលពីខែមិថុនាកន្លងទៅ សហរដ្ឋអាមេរិកធ្លាប់បាន អះអាង ថា រដ្ឋាភិបាលរបស់លោក បាសា អែល អាសាដ បានប្រើប្រាស់អាវុធគីមី ដើម្បីប្រឆាំង នឹងក្រុមឧទ្ទាម។ ក្នុងនោះ លោក បារ៉ាក់ អូបាម៉ា បានព្រមានថា ប្រសិនជា មានការបញ្ជាក់ណាមួយពិតប្រាកដ អំពីការប្រើប្រាស់អាវុធគីមី មែននោះ អាមេរិក ក្នុងនាមអង្គការសហប្រជាជាតិ នឹងមានសិទ្ធិធ្វើអន្តរាគមន៍ យោធាគ្រប់ពេលវេលា នៅក្នុងសង្គ្រាមស៊ីវិលនៅស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ