គណៈកម្មការសភាម៉ាឡេស៊ីបើកភ្លើងខៀវឲ្យកម្ពុជាប្តឹងករណីរំលោភសិទ្ធិពលករខ្មែរ
ការរំលោភសិទ្ធិមនុស្ស និងការប្រើទារុណកម្មលើពលករខ្មែររហូតដល់ស្លាប់ ជាមូលហេតុដែលធ្វើឲ្យរដ្ឋាភិបាលកម្ពុជាសម្រេចផ្អាកមិនឲ្យបញ្ជូនពលករខ្មែរ ទៅធ្វើការនៅម៉ាឡេស៊ីជាបណ្តោះអាសន្ន។ វាជាបទបញ្ជាដែលធ្វើឲ្យរដ្ឋាភិបាលម៉ាឡេស៊ីភ័យចំពោះភាពល្អក់កកររវាងប្រទេសទាំង២ និងចាត់វិធានការបន្ទាន់ធ្វើយ៉ាងណា ស៊ើបអង្កេតករណីនេះ ឲ្យបានលឿនបំផុត ។
ចុះផ្សាយនៅថ្ងៃ៖
ស្តាប់ - ០២:០៨
គណៈកម្មការសភាម៉ាឡេស៊ី ទទួលបន្ទុកសិទ្ធិមនុស្ស បានសម្រេចបើកភ្លើងខៀវដល់ តំណាងរាស្រ្តកម្ពុជា ឲ្យដាក់លិខិតប្តឹងជុំវិញព័ត៌មាន ស្តីពីការរំលោភសិទ្ធិមនុស្ស ឬករណីពលករខ្មែរស្លាប់នៅម៉ាឡេស៊ី ដើម្បីធ្វើការស៊ើបអង្កេត។ វាជាសញ្ញាវិជ្ជមាននៃការយកចិត្តទុកដាក់ថ្មីបន្ថែមទៀតរបស់ម៉ាឡេស៊ី ចំពោះរឿងអាស្រូវ លេចធ្លាយពីការរំលោភសិទ្ធិនិងប្រើទារុណកម្ម រហូតធ្វើឲ្យមានពលករខ្មែរស្លាប់។ នេះបើតាមប្រសាសន៍របស់អ្នកស្រី មួរ សុខហួរ តំណាងរាស្រ្តគណបក្សសមរង្ស៊ី ដែលទើបតែបញ្ចប់ទស្សនកិច្ច៤ថ្ងៃ នៅទីក្រុង គួឡាឡំាពួរ (Kuala Lumpur) ជាមួយមន្រ្តីអង្គការសិទ្ធិមនុស្ស៣នាក់ផ្សេងទៀត។
ក្នុងសន្និសីទកាសែតនៅឯព្រលានយន្តអន្តរជាតិភ្នំពេញ នៅព្រឹកមិញនេះ អ្នកស្រី មួរ សុខហួរ បានឲ្យដឹងថារដ្ឋាភិបាល អ្នកតំណាងរាស្រ្ត និងអង្គការសង្គមស៊ីវិល នៅម៉ាឡេស៊ី នឹងចាត់វិធានការស៊ើបអង្កេតលើករណីដែលមានពលករខ្មែរស្លាប់នៅម៉ាឡេស៊ី ដើម្បីកុំឲ្យប៉ះពាល់ដល់កិត្តិយសប្រទេសនេះ និងទំនាក់ទំនងជាមួយកម្ពុជា។ ប្រធានគណៈកម្មការសភាទទួលបន្ទុកសិទ្ធិមនុស្សនៅម៉ាឡេស៊ីក៏បានអនុញ្ញាតឲ្យតំណាងរាស្រ្តខ្មែរទាំងអស់ មានសិទ្ធិប្តឹងទៅសភាម៉ាឡេស៊ីដោយផ្ទាល់ ជុំវិញដំណឹងផ្សេងៗ ដែលពាក់ព័ន្ធនឹងការរំលោភសិទ្ធិ ឬករណីពលករស្លាប់។ តំណាងរាស្រ្តរូបនេះក៏បានជួបពិភាក្សាជាមួយប្រធានសមាគមក្រុមហ៊ុននាំពលករនៅម៉ាឡេស៊ី ដោយសមាគមបានសន្យាបង្កើតប្រព័ន្ធតាមដានឲ្យច្បាស់លាស់ ពីកាលបរិច្ឆេទនៃការស្នាក់នៅរបស់ពលករ និងទីតាំងដែលពួកគេត្រូវទៅបម្រើការងារ។
ស្ថានទូតកម្ពុជា ក្នុងប្រទេសម៉ាឡេស៊ី បានរាយការណ៍ថា ពលករខ្មែរនៅម៉ាឡេស៊ីចំនួន១១នាក់បានស្លាប់នៅទីនោះក្នុងឆ្នាំនេះ ក្នុងនោះ ៩នាក់ជាស្រ្តីបម្រើការងារតាមផ្ទះ។ ករណីនេះវាធ្ងន់ធ្ងរដោយសារតែពលករចំណាកស្រុកទាំងនោះមកធ្វើការនៅម៉ាឡេស៊ី តែត្រឡប់ទៅវិញជាសាកសព។
កាលពីខែមុន រដ្ឋាភិបាលកម្ពុជាបានប្រកាសផ្អាកបណ្តោះអាសន្ន ការបញ្ជូនពលករបម្រើតាមផ្ទះ ទៅប្រទេសម៉ាឡេស៊ី នៅចំពេលដែលមានរឿងអាស្រូវជាច្រើន អំពីការរំលោភបំពាន ដែលបានកើតឡើងនៅក្រុមហ៊ុនជ្រើសរើសពលករនៅបរទេស និងនៅមណ្ឌលបណ្តុះបណ្តាលពលករនៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ