លោកអូបាម៉ាអំពាវនាវឲ្យបញ្ឈប់អំពើហិង្សាប្រឆំាងនឹងអ្នកកាន់សាសនាអ៊ីស្លាមក្នុងប្រទេសភូមា
នៅក្នុងជំនួបជាមួយលោកប្រធានាធិបតីភូមាថេន សេនក្នុងទីក្រុងវ៉ាស៊ីនតោននាថ្ងៃទី២១ ឧសភាម្សិលមិញ លោកប្រធានាធិបតីអាមេរិកអូបាម៉ាបានកោតសរសើរដល់កំណែទម្រង់ដែលលោកថេន សេនបានអនុវត្តតំាងពី ២ឆ្នំាកន្លងមក ទំាងនៅក្នុងវិស័យនយោបាយ និងសេដ្ឋកិច្ច។ ទន្ទឹមគ្នានេះ លោកប្រធានាធិបតីអាមេរិកក៏បានសម្តែងក្តីព្រួយបារម្ភចំពោះអំពើហិង្សារវាងសហគមន៍អ្នកកាន់សាសនា ដោយលោកអូបាម៉ាបានស្នើលោកថេន សេនឲ្យចាត់វិធានការបិទបញ្ចប់អំពើហិង្សាប្រឆំាងនឹងអ្នកកាន់សាសនាអ៊ីស្លាម។
ចុះផ្សាយនៅថ្ងៃ៖
ស្តាប់ - ០២:១៩
ជាសរុប កិច្ចសន្ទនារវាងលោកប្រធានាធិបតីភូមា ថេន សេន និងលោកប្រធានាធិបតីអាមេរិក បារ៉ាក់ អូបាម៉ាមានរយៈពេលជាង ១ម៉ោងនៅក្នុងការិយាល័យរាងទ្រវែងស្ថិតក្នុងសេតវិមាន។ នៅក្នុងកិច្ចសន្ទនានោះ លោកអូបាម៉ាបានកោតសរសើរមិនដាច់មាត់ចំពោះកិច្ចខិតខំប្រឹងប្រែងរបស់លោកថេន សេនក្នុងរយៈពេល ២ឆ្នំាចុងក្រោយនេះ។ ការកោតសរសើរក៏មានដែរ ចំពោះវិធានការរបស់លោកថេន សេនក្នុងការប្រឆំាងទប់នឹងអំពើហិង្សារវាងសហគមន៍អ្នកកាន់សាសនាព្រះពុទ្ធ និងអ្នកកាន់សាសនាអ៊ីស្លាម។ តែជាមួយគ្នានេះ លោកអូបាម៉ាក៏បានស្នើលោកថេន សេនឲ្យចាត់វិធានការជាបន្ទាន់ក្នុងការបិទបញ្ចប់អំពើហិង្សាប្រឆំាងនឹងអ្នកកាន់សាសនាអ៊ីស្លាម។
ការស្នើរបស់លោកអូបាម៉ាពេលនេះបានធ្វើឡើង ចំពេលដែលអ្នកកាន់សាសនាអ៊ីស្លាមនៅភូមាបាននិងកំពុងទទួលការធ្វើទុក្ខបុកម្នេញជារៀងរាល់ថ្ងៃពីសំណាក់អ្នកកាន់សាសនាព្រះពុទ្ធដែលមានចំនួនច្រើននៅក្នុងប្រទេសភូមា។ ជាក់ស្តែងក្នុងឆ្នំា ២០១២ អំពើហិង្សារវាងសហគមន៍អ្នកកាន់សាសនាទំាងពីរបានបណ្តាលឲ្យស្លាប់អ្នកកាន់សាសនាអ៊ីស្លាមរ៉ូហ៊ីនយ៉ាជាង ២០០នាក់ និង៤០នាក់បន្ថែមទៀតកាលពីដើមឆ្នំា ២០១៣។ ទន្ទឹមគ្នានេះ ក៏មានជនជាតិរ៉ូហ៊ីនយ៉ាប្រមាណជា ១៤ម៉ឺននាក់បានបាត់បង់ផ្ទះសម្បែងរបស់ខ្លួន។
យ៉ាងណាក៏ដោយ ក្រៅពីក្តីព្រួយបារម្ភចំពោះអំពើហិង្សារវាងសហគមន៍អ្នកកាន់សាសនា លោកប្រធានាធិបតីអាមេរិកក៏បានកោតសរសើរចំពោះដំណើរឆ្ពោះទៅរកផ្លូវលទ្ធិប្រជាធិបតេយ្យរបស់ប្រទេសភូមា ពិសេសចំពោះនយោបាយកំណែទម្រង់ដែលលោកថេន សេនបានអនុវត្តតំាងពី ២ឆ្នំាកន្លងទៅនេះ។ « ទំនាក់ទំនងរវាងប្រទេសយើងទំាងពីរដែលកាន់តែប្រសើរឡើងនាពេលបច្ចុប្បន្ន ក៏ដោយសារតែមានឆន្ទៈ និងការអនុវត្តន៍ជាក់ស្តែងរបស់លោកថេន សេនដែរ » នេះជាការថ្លែងរបស់លោកអូបាម៉ា។ ជាការឆ្លើយតបវិញ លោកថេន សេនបានធានាបន្តកំណែទម្រង់ជាបន្តទៀត។
នៅថ្ងៃនេះ និងដើម្បីបង្ហាញពីការគំាទ្ររបស់អាមេរិកចំពោះនយោបាយកំណែទម្រង់របស់លោកថេន សេន អាមេរិក និងភូមានឹងចុះហត្ថលេខាលើកិច្ចព្រមព្រៀងមួយក្នុងក្របខ័ណ្ឌពាណិជ្ជកម្ម និងវិនិយោគ។ ចំណែកប្រធានក្រុមហ៊ុន និងរោងចក្រសហគ្រាសអាមេរិកំាងវិញបានអំពាវនាវឲ្យលើកចេញវិញជាបន្ទាន់នូវគ្រប់ទ័ណ្ឌកម្មប្រឆំាងភូមា ដើម្បីអនុញ្ញាតឲ្យពួកគេអាចចូលទៅបោះទុនរកស៊ីនៅក្នុងទីផ្សារនៃប្រទេសក្រីក្រមួយនេះដែលមានប្រជាជនប្រមាណជា ៦០លាននាក់ តែសម្បូរទៅដោយធនធានរ៉ែយ៉ាងក្រាស់ក្រែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ