ភូមា៖ អ.ស.ប.ទាមទារឲ្យបើកការស៊ើបអង្កេតជុំវិញអំពើហិង្សានៅរ៉ាក់ឃីន
កាលពីថ្ងៃសុក្រម្សិលមិញ លោកស្រី ណាវី ភីឡៃ (Navi Phillay) ឧត្តមស្នងការអ.ស.ប.ទទួលបន្ទុកសិទ្ធិមនុស្ស បានទាមទារឲ្យមានការស៊ើបអង្កេតឯករាជ្យមួយ ទៅលើរបាយការណ៍ដែលថា កងកម្លាំងរដ្ឋាភិបាលភូមា ដែលត្រូវបានបញ្ជូនទៅដោះស្រាយអំពើហិង្សា នៅរដ្ឋរ៉ាក់ឃីន ប៉ុន្តែ បែរជាធ្វើការបង្រ្កាបតែទៅលើទៅលើជនជាតិភាគតិចកាន់សាសនាអ៊ីស្លាមទៅវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
ឧត្តមស្នងការអ.ស.ប.ទទួលបន្ទុកសិទ្ធិមនុស្សបានឲ្យដឹងថា អំពើហិង្សារវាងអ្នកកាន់ពុទ្ធសាសនា និងជនជាតិភាគតិចកាន់សាសនាអ៊ីស្លាម នៅរដ្ឋរ៉ាក់ឃីន ដែលបានផ្ទុះឡើង កាលពីខែឧសភា បានបណ្តាលឲ្យមានមនុស្សយ៉ាងតិច ៧៨នាក់បាត់បង់ជីវិត។ ទីភ្នាក់ងារទទួលបន្ទុកជនភៀសខ្លួនវិញបានឲ្យដឹងថា មានមនុស្សប្រមាណ ៨ម៉ឺននាក់ បានរត់ចោលផ្ទះសម្បែង ដើម្បីគេចពីអំពើហិង្សានេះ។
គួររំឭកឡើងវិញថា អំពើហិង្សានេះបានផ្ទុះឡើង ក្រោយពីស្រ្តីអ្នកកាន់ពុទ្ធសាសនាម្នាក់ត្រូវបានបុរសកាន់សាសនាអ៊ីស្លាម ៣នាក់ រំលោភ និងសម្លាប់ ហើយក្រុមអ្នកកាន់ពុទ្ធសាសនាក៏បាននាំគ្នាវាយសម្លាប់អ្នកកាន់សាសនាអ៊ីស្លាម ១០នាក់ ដើម្បីជាការសងសឹកវិញ។
លោកស្រី ណាវី ភីឡៃ បានលើកឡើងថា លោកស្រីបានទទួលរបាយការណ៍ពីប្រភពឯករាជ្យថា កងកម្លាំងដែលអាជ្ញាធរភូមាបញ្ជូនឲ្យទៅដោះស្រាយអំពើហិង្សា នៅរដ្ឋរ៉ាក់ឃីននេះ បែរជាបានធ្វើការបង្រ្កាបដោយហិង្សា តែទៅលើជនជាតិភាគតិចកាន់សាសនាអ៊ីស្លាមទៅវិញ ហើយពេលខ្លះថែមទាំងបានញុះញង់ឲ្យមានអំពើហិង្សាទៅលើជនជាតិភាគតិចទាំងនេះទៀតផង ជាពិសេស ទៅលើសហគមន៍ជនជាតិភាគតិចរ៉ូហ៊ីងយ៉ា។
លោកស្រីភីឡៃបានសម្តែងនូវការស្វាគមន៍ចំពោះសេចក្តីសម្រេចរបស់អាជ្ញាធរភូមា ដែលបានអនុញ្ញាតឲ្យបេសកជនអ.ស.ប. ធ្វើដំណើរទៅកាន់រដ្ឋរ៉ាក់ឃីន នៅសប្តាហ៍ក្រោយ ក៏ប៉ុន្តែ លោកស្រីបានបន្តថា សេចក្តីសម្រេចនេះមិនទាន់គ្រប់គ្រាន់នៅឡើយទេ។ រដ្ឋាភិបាលភូមាគួរតែអនុញ្ញាតឲ្យមានការស៊ើបអង្កេតឯករាជ្យទៅលើអំពើហិង្សានៅរ៉ាក់ឃីននេះ។
គួរបញ្ជាក់ថា នៅក្នុងរដ្ឋរ៉ាក់ឃីន មានជនជាតិភាគតិចរ៉ូហ៊ីងយ៉ារស់នៅប្រមាណ ៨០ម៉ឺននាក់។ សហគមន៍រ៉ូហ៊ីងយ៉ានេះ គឺជាអ្នកកាន់សាសនាអ៊ីស្លាម ហើយមិនត្រូវបានរដ្ឋាភិបាលភូមាទទួលស្គាល់ថាជាជនជាតិភាគតិចនោះទេ ហើយក៏មិនត្រូវបានទទួលស្គាល់ជាពលរដ្ឋភូមានោះដែរ។
នៅពេលនេះ សហគមន៍អន្តរជាតិកំពុងតែអបអរចំពោះកំណែទម្រង់នយោបាយរបស់រដ្ឋាភិបាលភូមា ក៏ប៉ុន្តែ ក្នុងពេលជាមួយគ្នា គេក៏កំពុងតែបារម្ភដែរថា ការរើសអើងប្រកាន់ពូជសាសន៍ចំពោះជនជាតិភាគតិច កំពុងតែចោទជាបញ្ហា ដែលអាចជាឧបសគ្គដ៏ធំមួយ ចំពោះកំណែទម្រង់ប្រជាធិបតេយ្យភូមា។
កាលពីថ្ងៃពុធកន្លងទៅនេះ នៅក្នុងសុន្ទរកថាជាលើកដំបូង នៅចំពោះមុខសភាភូមា លោកស្រីអ៊ុង សានស៊ូជី បានទាមទារឲ្យសភាភូមាអនុម័តច្បាប់ ដើម្បីការពារសិទ្ធិជនជាតិភាគតិចទាំងអស់នៅភូមា ដោយបញ្ជាក់ថា ច្បាប់នេះមានសារៈសំខាន់ ដើម្បីឲ្យភូមាប្រែក្លាយទៅជាប្រទេសប្រជាធិបតេយ្យពិតប្រាកដ និងជាប្រជាជាតិមួយ ដែលចេះគោរពគ្នាទៅវិញទៅមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ