ព្យុះហៃយ៉ានចេញពីវៀតណាម មកដល់ចិនសំលាប់មនុស្សយ៉ាងហោច៦នាក់
បន្ទាប់ពីបានបោកបក់នៅវៀតណាមនៅព្រឹកថ្ងៃចន្ទនេះ ព្យុះហៃយ៉ានបានបន្តដំណើរមកដល់ឆ្នេរភាគខាងត្បូងប្រទេសចិន និងបានធ្វើអោយមនុស្សស្លាប់យ៉ាងហោច៦នាក់។ ក្រុមសង្គ្រោះចិនកំពុងស្វែងរកអ្នកកប៉ាល់ដឹកទំនិញ៥នាក់ ដែលបានបាត់ខ្លួន។ ផ្ទុយទៅវិញ មុនមកដល់ចិន នៅវៀតណាមនៅព្រឹកថ្ងៃចន្ទនេះ ព្យុះហៃយ៉ានបានបន្ថយឥទ្ធិពលខ្លួន និងមិនបានបង្កការខូចខាតធ្ងន់ធ្ងរ និងសំលាប់មនុស្សណាម្នាក់នោះទេ។ ប៉ុន្តែមានមនុស្ស៣នាក់បាត់ខ្លួន។ នៅពេលនេះ សហគមន៍អន្តរជាតិកំពុងតែផុសផុលផ្តល់ជំនួយ ធ្វើប្រតិបត្តិការជួយជនរងគ្រោះនៅហ្វីលីពីន។ តួលេខអ្នកស្លាប់នៅហ្វីលីពីនចុងក្រោយ មានជាងមួយម៉ឺននាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៧
ព្យុះហៃយ៉ានបានធ្វើដំណើរចេញពីវៀតណាម ទៅដល់ឆ្នេរភាគខាងត្បូងប្រទេសចិន នៅរសៀលថ្ងៃចន្ទនេះ ដោយបានសម្លាប់មនុស្ស និងបំផ្លាញផ្ទះសំបែង អគារ ជាច្រើនខ្នង។
អាជ្ញាធរចិនបានជម្លៀសមនុស្សសន្ធឹកសន្ធាប់ នៅកោះហៃណាន។ នៅចិន ព្យុះហៃយ៉ានបានបន្ថយល្បឿនខ្យល់បោកបក់មកត្រឹម១១៨គីឡូម៉ែត្រ ក្នុងមួយម៉ោង។
មុនមកដល់ចិន ព្យុះហៃយ៉ានឆ្លងកាត់វៀតណាម និងបានបន្ថយឥទ្ធិពលខ្លួនច្រើន ដោយល្បឿនខ្យល់ធ្លាក់មកត្រឹម១២០គីឡូម៉ែត្រ ក្នុងមួយម៉ោង។ គឺខុសពីនៅហ្វីលីពីនដែលល្បឿនខ្យល់មានរហូតជាង៣០០គីឡូម៉ែត្រ។ នៅវៀតណាមកាលពីព្រឹកមិញ ប្រជាជនប្រមាណ៦សែនកន្លះ ដែលអាជ្ញាធរបានជម្លៀសនោះ ត្រូវបានអនុញ្ញាតអោយត្រលប់ទៅផ្ទះវិញហើយ។
ព្យុះហៃយ៉ានបានប្រែទិសរបស់ខ្លួន ដោយធ្វើដំណើរទៅភាគខាងជើងវៀតណាមវិញ មុននឹងទៅដល់ចិន។ ខុសពីការព្យាករណ៍ទុកកាលពីដំបូងទី ដែលថាព្យុះនេះត្រូវវាយប្រហារភាគកណ្តាលវៀតណាម។ រដ្ឋាភិបាលវៀតណាមបានប្រកាសផ្តល់ជំនួយបន្ទាន់ជាង១សែនដុល្លារ ជួយជនរងគ្រោះ។
នៅហ្វីលីពីន អង្គការផ្សេងៗនិងប្រទេសជាច្រើនកំពុងធ្វើសកម្មភាពផុសផុលជួយជនរងគ្រោះ។ នៅហ្វីលីពីន អាជ្ញាធរខ្លាចថា ចំនួនអ្នកស្លាប់អាចកើនឡើងដល់រាប់ម៉ឺននាក់។ អង់គ្លេសបានផ្តល់ជំនួយ៩លាន៦សែនដុល្លារ កាណាដាផ្តល់៥លានដុល្លារ។ អូស្រ្តាលីសន្យាជួយហ្វីលីពីន១០លានដុល្លារ។ ហើយចិនក៏សន្យាជួយមួយសែនដុល្លារដល់ហ្វីលីពីនផងដែរ។
អាមេរិកបានបញ្ជូនទាហានខ្លួនដែលមានវត្តមាននៅជប៉ុន អោយចូលរួមប្រតិបត្តិការ នៅហ្វីលីពីន។ អង្គការយូនីសេហ្វ អុកស្វាំ និងអង្គការគ្រូពេទ្យគ្មានព្រំដែន បានបញ្ជូនសំភារៈនិងជំនួយផ្សេងៗដល់ប្រជាជនរងគ្រោះ។ នៅថ្ងៃអាទិត្យម្សិលមិញ សម្តេចសង្ឃប៉ាប ហ្រ្វង់ស៊័រ បានអំពាវនាវអោយគ្រិស្តសាសនិកនានាផ្តល់ជំនួយជាក់ស្តែងដល់ហ្វីលីពីន។
បញ្ហាចោទនៅហ្វីលីពីនពេលនេះ គឺការខ្វះខាតទឹកស្អាត ចំណីអាហារ ថ្នាំពេទ្យ និងការព្យាបាលអ្នករបួស។ ជនរងគ្រោះមានការអស់សង្ឃឹមខ្លាំង ហើយបានធ្វើការលួចប្លន់សំភារៈ និងចំណីអាហារផ្សេងៗរបស់ក្រុមសង្គ្រោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ